1 Peterus 2 - ALA WENE HIVIS DIRUP WATUGWA

Helep owak bago wadokdek ako, Yesus Keretus-at

¹ Andi halok, hit weyak ogasagwi menda andi mondok hekbaluk dogones. Huluk wene yagalagwi inim, enagavoval yagalagwi menda inim, haterek-anderek yagalagwi inim, navok-havok yagalagwi inim, andi ovok erogo hekbagu dogones.

^2-3 Nenasin Inis Ombok en sek okbininaliga ako, hit okbigigas vage hegep halok, avyak swi endago menda isa agadyak uvup en hunik-hunik naliga ako hak, At Ala en henagap wendakhinipigi atma, henendawi modo okhinipu dogopwak yiluk, eve wene andi adigat, “Ai,” yiluk, wugu dogones.

⁴ At Yesus eve helep iluk agarik menda ovagak andi, adema omanes. Helep ako segat hegek avakwa en “Helep andi weyak,” yiluk, hekbagagwa ovara, At Ala en andi, “Mondok segat hegek mbobagagwa,” yiluk, enogo bagagi.

⁵ Hit ogo andi, helep iluk menda ovagak, At Ala en At awi valek hit vaga valhedaliga. Andi en hit Yesus Keretus hinim hunik dugwit, it ap imam-imam en Ala awi valekma Ala ake warogo belagwi hak, hit ap imam-imam At ake enek menda ovagak dugwit, Ala endawi hogop ombasiga menda At ake ogagu dogones o.

⁶ Andi, Ala Wene endak dirup warek ambi vaga, Ala en iri dugwit: “Anen helep idi menda enogo baluk, o Sion vaga ndalogo mondok okbagagis atma, ap ambi saen helep andi vaga endawi vanggabaluk avyarat imbita halok, anggadi arisogonbuk o,” yiluk, yagagi dirup warek agarik.

⁷ Hit avyarat ombasagwi menda akoen, “Helep andi, nit nenake-at okbagagirikmu, mondok idi-at agarik,” yiluk, dibelagwi. Ovara, it avakwa enendawi avyarat ombasagwidek menda akoen, Ala wene ambi yi, it vaga atma asiga: “Hit o valisagwi menda akoen helep vaga vanggu dugwit, helep ambi mbobagagwa ako, mondok-mondok helep owak ndalaga o,” yiluk, dirup warek andiat agarik.

⁸ Eke, Ala wene ambi iri dugwit: “Helep andi vaga it avakwa inisogavit denggwes erogo yakhidugu dogosogom o,” yiluk, yagagi dirup warek ako andi, it avakwa enendawi avyarat embetetek menda akoen, Ala wene wokbaluk ogarit lagetek iniselok, inisogavit denggwes erogo yakhedelagwi ako At Yesus-at, yiluk, helagwi. It anderogo ogagu dogopwak yiluk, Ala enat imbitigi ovara,

⁹ hit andi, o hwiserekma welagagup ako hekbaluk, At Ala en At o awiya eve mondok iya-at agarikmu akoma dogovovok yiluk, henayonggo bigigu lagagirik, At mondok sek ogasiga menda sigam erogo yugurugu dogovovok yiluk, enogo bigigi. Aren “Hit An menda aro,” yiluk, enogo bigigu, imam-imam ovagak dugwit, At Nenasin Inis Ombok ake ogagu dogovovok yiluk mendek okbigigu, “Hit An naburi nake sek adik enek dogogup o,” yiluk, enogo bigigu, eke, hit hininis unggul At inis unggul menda salogo bigigu, ogagagi.

¹⁰ Hit o endak Ala aburi degat welagagup ovara, yogak andi, At aburi okhinipigirikmu agipik. Eke, hit endak At Ala aigwak aberen okhinivup ako hinil hegetek dugwit welagagup ovara, yogak andi, At Ala aigwak aberen okbigigaliga ako dibelagwi.

Ala ayeloman dugwit, ogagu dogop wene

¹¹ Nowa-nasin o. Hit ap huru ovagak ap enanggelekma agipik ako, wene ambi yukherayogon o. Hit henendawi en weyak ogarup henanggon umbutu dugwit ovara, wokhiniviluk landiga ako, mondok amusek laguven yiluk, yukheraliga.

¹² It ap weram enendawi avyarat ombasagwidek menda akoen, “It weyak ogarit nelagwi o,” yiluk, henavok yagalagwi ovara, hit sek adigat ogarit lendagwi dibigigu dogomundik, Yesus wagya andi vaga Ala siyabapwak yiluk, enanggelekma dugwit, henova hwalogo dogones.

^13-14 Nenasin Inis Ombok weyak erogo baguven yiluk, avakwa pemerintah menda mendek okbogogwa ako, enavema dugwit, enane des erogo hunggu dogones. Ap inis ombok winimen agarik Kaisar ako inim, eke at avema menda it avakwa sek ogasagwi ako siyabugwis, weyak ogasagwi ako anggin enovaga bugwis, ogagu dogopwak yiluk, mondok okbiselagwi ako inim, enavema dugwit, enane des erogo hunggu dogones.

¹⁵ At Ala endawi ombasiga andi, nit sek adigat ogagu dogop. Sek adigat ogasagwi vaga it avakwa enendawi dek wene inunggut dugwit yagalagwi andi, enane sovalogo bugu dogosogom atma, sek adigat ogagu dogones.

¹⁶ Hit weyak menda avema werekma, Ala en heda visilogo bigigirikmu agipik atma, weyak ambi inim hwilagago ogarubuk. Ata, Ala ayeloman dugwit At ombasiga menda ndatak ogagu dogones.

¹⁷ It avakwa ovok erogo henendawi sagain vaga henane sek erogo yugurugwi, henaswei avyarat ombasagwi menda henendawi hunik oginipwis, Ala henalon umbutwi, ap pemerintah inis ombok Kaisar ako agayuk wutwis, ogagu dogones.

Keretus idup-mbidup wogogi hak, wakhegek ogagu dogop wene

¹⁸ Hit nin, avakwa enayeloman onggo hunik menda agipik ako, it henasini enavema dugwit, enovavut sek enendawi sagain menda adigat enagayuk wurogo enane hunggu dogobuk. Ata, it enandogon weyak menda inimat enagayuk wurogo enane hunggu dogones.

¹⁹ Hit weyak ogagetek hinigik, henasini en idup-mbidup henovaga bigiguselok, “An Ala endawi ombasiga menda ogarup,” yiluk, umbutu dugwit, henendawi wadokdek wugu hiniselok, Ala adenggen henovaga bigigu hagup.

²⁰ Hit weyak ogarumwi vaga henatusigik, henanedek mbuverek hiniselok, avakwa en sek henombarumwi? Dek o. Weyak ogagep vaga henasagwi atma, “Segat hinitao,” henombarusogom ovara, sek ogarit lendagwi vaga hinitusigik, henendawi wadokdek wugu hiniselok andi, Ala henabwa imbita dugwit, adenggen henovaga bigiga hagup o.

²¹ At Keretus idup-mbidup okbagagwa ako andi, hit henake-at wogogi atma, At ogagagi ako hak, hit anderogo wane-wane ogagu dogovovok yiluk, Ala en heneyanggup yukheragagi o.

²² Ala wene ambi iri dugwit: “At weyak ambi ogagetek, At elagapma ane huluk ambi mondok dek,” yiluk, yagagi.

²³ It ninen wiyiknom-weyaknom erogo bagusigik, Aren onggo wiyiknom-weyaknom erogo yugeregetek. Eke, watusigik, Aren, “An hivis onggo ambi hinirisogon,” yiluk, yugeregetek. Ata, At endawi Asin Ala ovaga vanggabaluk, “Nasin wene atma des erogo adigat enowak dilisiga akoen nawene yisogon o,” yiluk, endawi wadokdek dugwit, wigya lagagi.

²⁴ Nit endak weyak ogagu lagagup ako, yogak ambi inim ogagetek dugwit, sek adigat ogarit lagu dogoguluk, At eyave yo winik vaga hambigya dugwit, nit weyak ogasagwi menda ako ovok erogo wogogi. Eke, At agamut libik-ndendok erogo watugwa ako vaga nit sek okbininggigi.

²⁵ Hit endak ndomba yelemele erek hak ugun ogarit nagu lagagup ovara, yogak andi At vakhenombogo dugwit, malhenombogo agarik ako avema dogoguluk, adema wagagup.