1 Peterus 1 - ALA WENE HIVIS DIRUP WATUGWA

¹ Hit Ala en mikhinipigi o Pondus inim, Nggalatia inim, Kapadokia inim, Asia inim, Mbitinia inim, hit o Propinsi ovok erogo andoma yi awi ndi awi sak yagan lagagup ap huru ovagak agipik ako, At Yesus Keretus ayonggo lakbigik menda okbaninggigi an Peterus akoen wene ambi yukherayogon o.

² At Nenasin Ala en hivis ogagu dogop ovok amor erogo baliga atma, o muk imbitigi ako wane-wane, Ala Averiniki en okbigigu hegek hit At aburi sek adigat ake enek dogovovok yiluk, mikhinipigi. Andi halok, hiren At Yesus Keretus yagagi wene ako wokbaluk wane-wane ogasagwi, eke At amuya vaga hokhinivisiga. At Ala henabwa en okhinipu, henendawi ugun seyalek adenggen dogovovok yiluk okbigigu, ogasiga ako, ambi inim eve iya erogo okbigigu dogopwak o.

Yesus nenape wenggelek dogop wene

^3-4 At Nenowa Inis Ombok Yesus Keretus Asin Ala inis siyabagu dogosogom o! At Ala aigwak aberen sek okbininggu dugwit, At Yesus Keretus hambuluk lendagwima en iluk erogo mondok okbagagi ako vaga, nit nenendawi swi endakninipigi. Nenendawi swi endakninipigirikmu, nenape wenggelek dugwit, “Nenake enogo mavorangge ovagak vidis agya, isip bagya, dek agya, ogasigadek mondok mbogot vaga vaknenombogo agarik ako hedalasogom atma,” mondok nenape wenggelek-at agurik.

⁵ Henangge vakhenombogo agarik hedalaguluk hit ako andi, At Ala ovaga vanggabaluk, avyarat umbutu hiniselok, atok vaga henagap wendarup imbitigi ako, hivis anderogo yedok okbigigagiluk, yogak At anye vaga nggetok erogo vakhenombogo agarik.

⁶ Anderogo atma, nowa-nasin. Anggin-mbanggin adik-adik menda henovaga agarik ako vaga henendawi anggin durik agipik ovara, “Hivis nenangge vipuk erogo bininggigi ako hedalasogom atma, yi andi, un sidogat okbininalagwi atma, sek aro,” yiluk, henendawi adenggen ombok erogo umbutu dogones.

⁷ Mbusi emas onggo ombok menda andi, un sidok dek arup menda hegek, “Eve sek a, weyak a,” yiluk, hali vaga avut mbalisagwi ako wane-wane, hit avyarat ombasagwi ako andi, mbusi emas wane-wane dek. Hit avyarat ombasagwi ako andi, mondok eve iya atma, anggin-mbanggin henovaga agya halok, “Wadokdek isami a, dek a? yiluk, henavut mbalisiga atma, henendawi wadokdek hiniselok, hivis Yesus Keretus eyave sigam ari wagya dugwit, “Segat ogagep o,” yiluk, adenggen henovaga bigigu, hininis siyabigigu, “Wi!” yiluk, vok yukhirigya, ogari warisogon.

^8-9 Hit Yesus hinil hegetek ovara, hegek, henendawi hunik ogagwi, eke, yogak At eyave hinil hegetek ovara, henendawi At ovaga vanggabaluk, avyarat umbutwi, ogagu dugwit, “Nit nenendawi avyarat ombasagwi vaga, nenagap wendarup ako atma asiga,” umbutu dugwit, henendawi adenggen ombasagwi ako andi, mondok eve iya erogo agarik atma, nggarogo yubuk erek aga.

^10-11 Hit henagap wendakbaluk, sek erogo bigigaup wene ako andi, it ap navi-navi Ala en yugirigya hegek yugurugu lagagwa menda akoen, “Ala endawi hunik en sek okbisaup ako o mera okbisami?” yiluk, embetek werekma, At Keretus Averiniki ako it enendawima dugwit, “Keretus ako hivis idup-mbidup erogo bagup andi vaga Ala en siyabagwi o,” yiluk, yugirigya lagagimu, iren yugu dugwit, “Nggarogonggan en nenagap wendarisogon? Eke, o mera hudi sigam arimi?” yiluk, Ala wene bikhugwi, dibagwi, ogagu lagagwa.

¹² Ogagusigik, At Ala en it navi-navi ako yugirigya dugwit, “Wene yi andi, hit henake yiluk yukheraligadek o. Wene yi andi, it hivis endaklendagwi menda enake-at yukheraliga,” yiluk, sigam erogo yugirigya lagagimu, wene andi yugu lagagwa. Wene andi, hivis Ala Averiniki mbogot vaga en lakba wagya lagagimu, ap enendawima nunggwigya lagagirik, yogak Sek Wene Yesus Keretus avok wene ako yukheragagwa. Wene andi, it malaikat ogo dibaup hogop ombasagwi ovara, nit nenake yiluk yugurugu lagagwa helagwi.

Weyak ogagetek dogoguluk neneyanggup yagagi wene

¹³ Anderogo atma, nowa-nasin. “Hivis At Yesus Keretus wagya andi vaga Ala endawi hunik en sek okbinina warisogon o,” yiluk, wene andi vaga henape mondok wenggelek dugwit, alep mbabetaluk henova anggat erogo dogones.

¹⁴ Hit endak Ala hinunggut dugwit, henendawi en ninggya halok ugun-ugun ogarit nagu lagagup ako, hekbaluk, asin iri halok, abut hobaluk wane-wane ogasiga hak, Henasin Ala en iri halok adigat ogarit lagu dogones.

^15-16 At Ala en iri dugwit, “An weyak ogasigadek sek adik enek agirik wane-wane, hit ogo weyak ogagetek sek adik enek anderogoat dogones o,” yiluk, yagagi wene dirup warek agarik atma, At Ala henayonggo bagagi ako weyak ogasigadek sek adik enek agarik ako, hit ogo anderogo wane-wane, yi menda ndi menda ogagu dugwit, weyak ogagetek sek adik enek dugwit, ogarit nagu dogones.

¹⁷ At Ala andi, avakwa enelose vaga dibisiluk, ambi sek okbugu, ambi anggon imbita, ogasigadek. Ata, nit ogasagwi ndatak nenowak dilisiga atma, hiren “Nenasin Ala o,” yiluk samban ogagu hiniselok, hit o wen vaga yoma sidok ap huru ovagak dugwit, Ala adigat henalon okbaluk, ogarit nagu dogones.

¹⁸ O endak hit henombawi ogarit nagu lagagwa mamulik menda ako, dek arup hegek un enam warogo ogagu lagagwa atma, hit anderogo ogagu hinisaoen, Ala en henonggo mbabaluk visilogo bigigigi andi hinilup aro. Henonggo bagagi andi, yoparip mbusi perak inim, mbusi emas inim, yi menda ndi menda dek arup menda andi vaga henonggo bagetek.

¹⁹ Ata wam ndomba eyak eyave mondok sek adigat agarik ako hak Keretus amuya mondok onggo ombok ako vaga henonggo bagagi o.

²⁰ At Keretus ako andi, At Ala en wen-mbogot ao bagetek dugwit, endawi wenggebaluk enogo bagya lagagirik, o atok yogak yi vaga hit henake sigam erogo lakba wagagimu henagap wendakhinipigi.

²¹ At Keretus ogagagi vaga nit Ala ovaga vanggabaluk avyarat ombasagwi. At Ala andi, At Keretus hambuluk lendagwima en iluk erogo mondok okbagya lagagirik, siyabagagi atma, nit nenendawi At Ala ovaga vanggabaluk, avyarat umbutwi, eke “Hivis At yagagi ako atma arisogon,” yiluk nenape wenggenggwis, ogasagwi.

²² Hit eve Sek Wene wokbaluk, ogarit lagu dugwit, weyak henendawima agarik ako hokhedagagup atma, yogak henaswei Ala aburi menda henendawi hunik oginivisagwi andi, ambi inim ombok erogo henendawi eyave vaga nendawi-hendawi hunik oginipu dogones.

²³ Andi, Ala en henendawi swi endakhinipigi andi, avakwa hambisagwi menda en endaginivisagwi andi hak endakhinipitek. Ata, At Ala itok mondok iluk agarik ako, At ane dek asigadek mondok itok agarik menda vaga, endakhinipigi o.

²⁴ Andi, Ala wene endak dirup warek ambi, yerogo yagagi: “Avakwa ovok erogo, eneyave yoangga-hedangga ovagak, avakwa sek yiluk vok yagalagwi andi, yo agare yugu halok avakwa “Wi,” yiluk vok yagalagwi hak aro. Yo angga mbuk agya dugwit, agare yabo-yabo wambisiga.

²⁵ Nit avakwa neneyave anderogo hak ovara, Nenasin ane andi, mondok itok agarik o,” yiluk, Ala wene endak dirup warek ako, Sek Wene yukheragagup yi aro.