1 Korindus 9 - ALA WENE HIVIS DIRUP WATUGWA

Lakbogogi menda en ogagu dogop wene

¹ An ako, avakwa en, “Yerogo ogarup, nderogo ogarup,” yuknugusigik adigat ogasiga embetep? An ap lakbigik menda dogogiluk, Ala en mondok okbanenggetek ombasagwi? Eke, Nenowa Inis Ombok Yesus an nil des erogo hegetek nombasagwi? Nenowa eyavup ogasiga ako, enggen yugup ovagak hirat agipik akora?

² It ap ninen, “Hat lakbigik menda dek o,” yuknugusigik ovara, hit halok andi, anderogo yup dek. Hit andi, an yukhirigya neyagek, hit Ala aburi agagup andi vaga dibaniluk lakbigik menda avyarat agarik nombarisagwi akora?

³ It avakwa en navok weyak yuguselok, anen wene onggo yerogo yugeraliga:

⁴ “An Ala eyavup ogasiga ako onggo henagarom-henagas wokneres,” yukheraup andi weyak ombasagwi?

⁵ It ap lakbigik menda nin inim, At Nenowa aori ambetaga endago menda inim, Peterus inim, Ala wene wolok nagu dugwit, enogwai wogonombolok lendagwi ako wane-wane, nit ogo anderogo ogarup meyan ombasagwi?

⁶ Ata, it andi, ogarit lagusigik, an Mbarenabas niperen adigat Ala wene yugeregek nagu dugwit, nit neneyave sek dogoguluk, nininggis vaga adigat sakdida okhedegek nagu dogop sek umbutu dugwit, yagalagwi?

⁷ It enayegen werek ako ndup ogari wunggu dugwit, eneyave sek dogop yiluk, ininggis vaga adigat sakdida erogo nelagwi ombasagwi? Dek, it enasini en enagarom wogerelagwi. It ap yavup ogasagwi menda en enggen yugup heralogo nin it inim nelagwidek ombasagwi? Eke, it ap ndomba vagenombogo agarwik en ndomba enagadyak amok nodogo it inim naup meyan ombasagwi? Naup sek aro, yiluk, yukheraliga, naswei.

⁸ An wene yukheraliga andi, nit avakwa ogasagwi menda ako adigat wakhegek yukheraligadek. Ata, muk Ala en Musa wene yugogogi ako, anderogoat dirup warek agarik.

⁹ “Wam sapi en inisok vaga gandum enggen enggenit lagya hegek nin naguven yiluk, enelagap heda marogo bisaup moga o,” yiluk, Ala en wene Musa yugogogi dirup warek agarik ako andi, Ala en sapi ake yiluk, yagagi a,

¹⁰ ata, nit nenake-at yiluk, yagagi a? Nit avakwa nenake-at yiluk, yagagi. At ap yavup ogasiga inim, at ap enggen enggenit landiga inim, iperen en, “Hivis nirat nunggu dogosogom o,” yiluk, enendawi wenggelek dugwit, ogasagwi andien, wene andi nit nenake-at yiluk, yagagi.

¹¹ Anderogo wane-wane, niren Ala wene ako henendawima awi yakbigigugup atma, yogak enggen yugup hit henangge nin nit wokneraup meyan yiluk yagalagwi?

¹² It endak Ala wene henendawima awi yakbigilagudek menda en, “Enangge nin wokneraup,” yiluk, henovaga enendawi vanggabaluk iniselok, hirenen wogerelagwi. Wogerelagwi ovara, nit endak yakbigigugup akoen, “Wokneranes o,” yiluk, yukheraup meyan embetep? “Wokneranes o,” yiluk, yukheraup segat ovara, Sek Wene Keretus yukneragagi wene ako mbigalit lagyama, sup monggabaguven yiluk, “Wokneranes o,” yukheregetek nininggis vaga enat okhedegek lendagwi.

¹³ It Ala awi valekma yavup ogasagwi ako, yavup ogasagwi onggo erom Ala ake bagao nin hidugwi, eke, it ap Ala anggom warogo wogisagwi ako, warogo wogugu dugwit, nin it nunggwi, ogasagwi ako hinunggut dugwit yagalagwi?

¹⁴ Andi wane-wane it ap wene Sek Wene yugeralagwi ako, eneyave sek dogopwak yiluk, “It enane welagwi menda akoen yi menda ndi menda wogurugu dogopwak o,” yiluk, Nenowa Inis Ombok en hologo bagagi.

¹⁵ Hologo bagagi ovara, “Ambi wokneres o,” yiluk, an yukhirigya lagetek. Eke, yogak ogo, hit ambi okbanovovok yiluk, dirup yi warogo wokheraligadek. An hambup segat ombasiga ovara, “An Ala ake bagao mondok wayogonbuk,” yagaliga andi, wisane-at ombasigama, avakwa en degerogo banup andi dek.

¹⁶ An Sek Wene yugeregek landiga ako andi, Ala en, “Yugeregek lagya dogwen o,” iri halok, yugeregek landiga andi vaga an wogobetaup mondok dek o. An Sek Wene yugeregek lagatek neyalok, weyak okbanup atma, nalon ombakluk, yugeregek landiga.

¹⁷ An nendawi ombakluk yugirigya dukli en, “Onggo woknirupwak en,” nendawi wenggelek dogop sek ovara, Ala en At andok okbaninggigi halok, yugeregek landiga atma, onggodek unat yugeregek landiga.

¹⁸ Anderogo atma, an onggo hedaup andi, ngga embetep? Dek o. An yavup ogasiga onggo andi, wene yukheraliga ako vaga, “Onggo wokneres o,” yukheraup sek. Yukheraup sek ovara, hegek, sovalogo baluk, Sek Wene onggodek unat hinilup okbigilin landiga ako andi, an onggo hedaliga andi aro.

¹⁹ An avakwa enayeloman agirikbuk, un agirik ovara, avakwa wisane Ala aburi okbisagiluk, avakwa ovok erogo enayeloman akluk landiga.

²⁰ An andi it Yakuri menda Ala aburi okbisagiluk, enanggelekma dugwit, it Yakuri ogasagwi menda ogarit landiga. Eke, it Musa wene ogasagwi ako, an anderogo ogasigadek ovara, Ala aburi okbisagiluk, enanggelekma dugwit, Musa wene ogasagwi ako an wane-wane ogarit landiga.

²¹ Eke, it ap weram Musa wene ogasagwidek menda ako, Ala aburi okbisagiluk, enanggelekma dugwit, it ogasagwi hak, an wane-wane ogarit landiga. Anderogo ogarit landiga ako andi, Ala wene ako weyak erogo baluk ogasigadek. Ata, Keretus weneat ogagya dugwit, ogasiga yiluk, yukheraliga o.

²² Eke, it avakwa enendawi ao hoda agetek menda ako enendawi hoda erogo bisagiluk, it enanggelekma dugwit, it ogasagwi an wane-wane-at ogasiga. An yi ap ndi ap ovok enanggelekma lagya dugwit, it ambitap Ala en enagap wendarupwak yiluk, it yi ogagek ndi ogagek ogasagwi ako an wane-wane ogarit landiga.

²³ An ogarit landiga andi, ovok erogo it avakwa Sek Wene hobaluk, wugu dugwit, enendawi adenggen ombasagwi hak, an ogo nadenggen hayogon yiluk, yugeregek landiga.

²⁴ It avakwa onggo hedaguluk, hudi atok vaga mondok vupuk lagu dugwit, eneyave ovok erogo vupuk lendagwi ovara, ambiat adigat hudi atok vaga ari lagya halok onggo hedaliga ako, hit hinunggut a? Anderogo atma, onggo hedavovok yiluk, hit ogo anderogoat mondok vupuk lagu dogones.

²⁵ Ap ambi it avakwa mondok vupuk lendagwi ako inim at adigat hudi atok vaga endak laup imbita dugwit, ao hegek at endak anye arigiluk wal okhaliga. Wal okhigya dugwit, yi menda ndi menda ogarup ombasiga ako sovalogo baliga. At onggo nggudit-nggudit mendarek un sidok dek arup menda hegek yikbanup ombakluk, ogasiga ovara, nit andi, onggo nggudit-nggudit mendarek mondok-mondok dogop menda yikbininapwak yiluk, ogasagwi.

²⁶ Anderogo atma, vupuk lagya dugwit, an ugun-ugunat landigadek. Ata, ambi ogarigiluk, an nelokwe amor-amot mondok vupuk adigat landiga. An yi menda ndi menda ogasiga ako, an un enam warogo ogasigadek. Ata, an ambi mondok ogarigiluk-at ogasiga.

²⁷ Eke, it nin, “Ninim vupuk lagu dogosogom o,” yugerayogon ninim vupuk lagu ninigik, Ala en “Hat vupuk landiga andi weyagat vupuk landiga atma, hat onggo hedaup dek mbuverek dogwen,” yuknugu haoen, nanye arigiluk wal okhegek adigat ogasiga. An nanye vaga vupuk lagya dogomindik, onggo hedagiluk, yi menda ndi menda ogarup oknitya ako sovalogo baluk, nanye arigiluk wal okhegek adigat ogasiga.