1 Korindus 7 - ALA WENE HIVIS DIRUP WATUGWA

Ap en hwa hedaup yugeragagi wene

¹ Hit dirup warogo lakbani wagagup ako, yogak an wene onggo ambi yukherayogon o. Ap en hwa hedegetek un dogop andi segat.

² Segat ovara, ap en akwa inim ugun weyak ogagu inisaoen yiluk, it ap enadik-enadik en enogwai hidugwi, eke, akwa en ogo, enaguni hidugwi, ogagu dogopwak o.

³ Hidugu dogomundik, iperen nogo yugu dugwit, ogarup ombasagwi ako ogagu dogop sek aro.

⁴ At hwa eyave andi, at adik andok dek, at agun andok-at agarik. Eke, ap andi, eyave at adik andok dek, at ogwa andok-at agarik. Anderogo atma, ogwa en ogarup imbita hegek, agun en at eyave idi okhedaup andi moga. Eke, agun en ogarup imbita hegek, ogwa en at eyave idi okhedaup andi ogo moga.

⁵ Wene adik vaga dek o. Ata, samban adigat ogagu dogopwak yiluk, agun ogwa iperen wene wenggenggu dugwit, “Un sidok ndugwis anderogo vaga dambunggitek mbuverek dogosogom o,” yiluk, enendawi ambiat okbaluk, mbuverek dogop andi, sek. Sek ovara, ndugwis wisane erogo iniselok, Sile en weyak ogarup enendawima mali wagya haoen, enendawi ninggya halok, ipi welagetek hodorogo-at dambulupwak.

⁶ An wene yukhirigi andi, nane anye vaga yukheraligadek. Ata, “Anderogo ogarup sek ai?” yiluk, yukheraliga.

⁷ An nogwa dek segat agirik ako hit ovok wane-wane anderogo dogop segat ombasiga. Segat ombasiga ovara, Ala en ogarup andok okbininggu dugwit, “Ambi yerogo ogagya dogopwak, ambi anderogo ogagya dogopwak,” yiluk, nenadigetap andok okbininggigirikmu, ogagu dogosogom o.

⁸ It akwa sawe ap sawe enaguni-enogwai hedegetek inim, akwa sogwa inim, ako yukhirigya dugwit, “An nogwa dek segat agirik anderogo hit wane-wane dogop andi sek aro,” yiluk, yukheraliga.

⁹ Anderogo yukheraliga ovara, “Henagun-henogwa hedegetek dugwit, henamuya aganggen en henendawi ninggya hegek dogop andi weyak, eke, henagun-henogwa werek dogop andi weyak dek atma, ogarup okhinipu ako sovalogo baup meyan agya halok, henagun-henogwa hidugu dogop sek aro,” yiluk, yukheraliga.

Agun-ogwa hekbisaup moga wene

^10-11 Eke, hit henaguni-henogwai werek ako andi, ambi yukherayogon o. “Hit ap en henogwai hekbisaup andi moga. Eke, hit akwa ogo, henaguni hekbisaup andi moga. Hit akwa en henaguni hekbisiluk, wunggu hiniselok andi, sawe-at dogop a, ata heneyami vaga henaguni heda warup a, andi segat ovara, ap adik hedaup andi, mondok moga,” yiluk, yukheraliga. An yukheraliga andi, anen dek. Ata, Nenowa Inis Ombok en yuknugu halok wene yi yukheraliga.

¹² Eke, hit nin an yukheraliga andi, Nenowa Inis Ombok en dek. Ata, anenat yukheraliga. Hit ap Ala aburi ap ambien ogwa endawi avyarat ombasigadek menda iperen dugwit, hwa akoen, “Nagun ninim dogop sek,” imbita hegek, ap akoen, “Nogwa yi nanggon o,” yiluk, hekbaup andi moga.

¹³ Eke, hit akwa Ala aburi menda ambien agun endawi avyarat ombasigadek menda endak hedagagi inim dugwit, ap akoen, “Nogwa ninim dogop sek,” imbita hegek, ogwa akoen, “Ap yi, nanggon o,” yiluk, hekbaup andi ogo, moga.

¹⁴ Ap endawi avyarat ombasigadek ako ogwa avyarat ombasiga ako vaga agun ako Ala en At avema bawandiga. Eke, hwa endawi avyarat embetetek ako agun avyarat ombasiga vaga Ala en ogwa ako At avema bawandiga. Iperen Ala avema ari waklipuk en, it eneyak-enabut endago ako andi, weram menda hak duklip ovara, iperen Ala avema ari wagao andi vaga Ala en, “Yi An naburi aro,” yiluk, inim avema bisa waga higyo.

¹⁵ Eke, at ambi endawi Yesus avyarat ombasigadek menda akoen, agun ata ogwa endawi avyarat ombasiga menda ako hekbaup imbita halok andi, hekbaup-at. Eke, hwa a, ap a, hekbagao ako andi, Ala en enendawi ambiat adenggen vaga dambulik dogop ombasiga ovara, dambulik dogop meyan halok, enadik-enadik dogop sek aro.

¹⁶ Hwa Ala abut yi wai. Hagun hiperen dugwit, hat ogarimi vaga Ala en hat hagun agap wendarisogon a, dek a, hilup atma yiluk, hat yagaliga? Eke, ap Ala abut yi wai. Hat anderogo ogarimi vaga Ala en hogwa agap wendarisogon hilup a, dek a? Hat hinggut atma, hogwa inim henendawi ambiat dambulik dogop segat.

Heneyanggup irisim welagagup akorogo dogop wene

¹⁷ Wene ambi an Ala aburi yi awi ndi awi homasagwi ako yugeraliga andi, yi: Hit Ala en heneyanggup irisim welagagup ako, Nenowa Inis Ombok en anderogoat andok okbininggigirikmu, anderogoat dogones.

¹⁸ At Ala en henagamut mbalek hegek heneyanggup yagagi halok, henagamut mbalek-at dogones. Eke, henagamut mbalekdek hegek heneyanggup yagagi halok, henagamut mbalek degat dogones.

¹⁹ Henagamut mbalek inim, henagamut mbalekdek inim, andi iya dek. Ata, At Ala en “Yerogo ogarup, nderogo ogarup,” yukneraliga ako ogarit laup halok, andiat mondok iya o.

²⁰ Hit endak Ala heneyanggup irisim henadik-henadik welagagup ako, anderogoat dogones.

²¹ Avakwa enayeloman heda mago hinigik heneyanggup yagagi halok andi, wene anggin dekma, anderogoat dugwit, Ala musek lagu dogones. Anderogo ovara, henasini en visilogo wibugugu iniselok, “Nanonggal yuknerelagwima, lasogom o,” yiluk, lagu dogones.

²² Ap saen avakwa enayeloman heda mago akluk, ogagya hegek Nenowa Inis Ombok Yesus en yanggup yugugu halok, At Ala abut visilogo bagagi-at agarik. Eke, ap ambi avakwa enayeloman dek visilek hegek, yanggup yugugu halok, ap andi Keretus ayeloman heda magoat umbutu dogosogom.

²³ At Ala en onggo ombok ako vaga henonggo mbanggigirikmu, avakwa enayeloman heda marek arubuk.

²⁴ Nowa-nasin o. Hit endak Ala heneyanggup irisim henadik-henadik welagagup ako, At hinim hunik dugwit, anderogoat dogones.

Ap enogwai dek menda inim, akwa enaguni dek menda inim, ogagu dogop wene

²⁵ Hit avakwa henaguni henogwai hedegetek menda ogagu dogop Ala en wene ambi yuknigitek. Yuknigitek ovara, Ala en nabwa okbaninggya hegek, nandogon huluk yagaligadek menda dugwit, nendawi imbiti ako ambi yukherayogon o.

²⁶ O yogak anggin-mbanggin wisane nenovaga werekma, an nendawi en, “Hit yogak nggarogo agipik ako andi, anderogoat dogop,” ombasiga.

²⁷ Henogwai werek halok, hekbisaup ombarubuk. Ata, ao wegetek agipik halok, hedaup henendawi wenggenggu dogobuk, yiluk, yukheraliga ovara,

²⁸ hit nin akwa woginivisagwi halok andi, weyak dek o. Eke, hit hwavyak sawe ao ndugum en henaguni hedelagwi halok andi ogo, weyak degat ovara, henaguni hidugu dogomundik, hinim dugwit, anggin-mbanggin henovaga oklarugwi en yiluk, yukheraliga.

²⁹ Nowa-nasin o. O hivis oklarup hudi ako vage horok vanggo yi wagarikmu, yogak en, hit ap henogwai werek akoen henogwai dek ovagak akluk, dogop.

³⁰ Eke, hit yup yasagwi ako andi, yup yasagwidek ovagak akluk, dogop. Hit henendawi adenggen agipik ako andi, henendawi adenggen dek ovagak akluk, dogop. Hit yi menda ndi menda hunisagwi ako andi, yi menda ndi menda henangge dek ovagak akluk, dogop.

³¹ Eke, hit wen vaga yi menda ndi menda wokbaluk, henendawi hunik ogasagwi ako, henendawi hunik dek ovagak akluk, dogop. Andi, o wen vaga yoma helagwi ako dek arup hudi vage horok ari wagarikmu, yiluk, yukheraliga.

³² Andi yukhirigi vaga hit henendawi anggin dogoguven yiluk, ambi inim yukherayogon. Ap ambi ogwa dek halok, at endawi imbita dugwit, “Nggarogonggan Nowa Inis Ombok Yesus endawi adenggen okbaik?” yiluk, ogarit landiga.

³³ Anderogo ovara, at ap ogwa werek akoen andi, “Nggarogonggan nogwa endawi adenggen okbaik?” yiluk, wene wen vaga menda adigat musek lagya dugwit,

³⁴ endawi mberen asiga. Eke, it akwa enaguni dek halok andi, “Nendawi inim, neyave inim, weyak ogagetek mondok Nenowa Yesus ake denek dogogiluk, Nenowa eyavup adigat ogarit lagya dogosogon,” imbita lagagirik, ogarit landiga. Ovara, at agun werek akoen andi, agun endawi adenggen ombarupwak yiluk, yi menda ndi menda wen vaga ogarup menda ako adigat endawi wenggelit landiga o.

³⁵ An wene yukheraliga yi, hiren ogarup moga atma yiluk, yukheraligadek. Ata, hit sek dogovovok yiluk, yukheraliga. Hit sek adigat ogarit lagu dugwit, Nenowa Inis Ombok eyavup adigat henelokwe amorerogo dugwit, musek lagu dogovovok yiluk, yukheraliga o.

³⁶ Ap ambien hwa onggo yi menda ndi menda endak bagya lagarik, “Hodorogo dambubanup ova,” yiluk, ombasiga ovara, hivis, okbaluk, hwavyak ako vage sawe agya halok, ap ako endawi ninggya dugwit, “Nogwa ninim dambubanup,” imbita halok, andi weyak dekma, dambubisaup segat.

³⁷ Segat ovara, ap adik ambien hwa onggo yi menda ndi menda bagya lagarik, endawi mondok wadokdek dugwit, aganggen ogagya ako sovalogo baluk, at endawi en, “Nogwa hodorogo dambubanup ova,” yiluk, imbita halok, andi ogo segat.

³⁸ Anderogo atma, at ap ogwa hedaup ombasiga ako andi, weyak dek sek ovara, sawe dogop imbita halok andi, mondok sek aro.

³⁹ Hwa agun ao iluk agarik halok andi, wene hobalek vaga iperen dambulik dogop ovara, agun hambigya halok andi, sogwa agya lagarik “Ap adik hedayogon,” imbita halok andi, hedaup sek ovara, hidigya dugwit, Ala abut halok adigat hidigya dogopwak.

⁴⁰ Ap hedegetek un dogop imbita halok andi, endawi adenggen wisane higya dogosogon ombasiga. An imbita dugwit, yukhirigi andi, Ala Averiniki en yuknugu hegek yukheraliga ombasiga o.