1 Korindus 6 - ALA WENE HIVIS DIRUP WATUGWA

Wene ambi agya halok adem senggu dogop wene

¹ Ap Ala aburi hit menda ambien asweim wenemuk yuguselok, it Ala aburi adik denek menda en adem senupwak yiluk, wogonombolok enadema laup andi sek. Sek ovara, lagetek dugwit, henanggadidek mbikit it Ala wene wegetek menda enadema bisa lendagwi andi mondok weyak.

² Nit Ala aburi adik denek akoen it avakwa wen vaga menda hivis enowak dilogo wene enovaga baup ako hit hinunggut agipik? Eke, hivis enowak dilogo wene enovaga baup nirat andok okbininggigi hegek, yogak yoma dugwit, wene madugat agya halok, adem senup meyan atma yiluk, agipik?

³ Eke, it malaikat enawene enowak dilogo wene enovaga baup ako, nirenen enowak dilusogom. Anderogo halok, nit Ala aburi en wen vaga yoma yi wene ndi wene adem senggu dogop andi sek aro.

⁴ Wene ambi agya halok, nit segat adem senggu dogop hegek, hit nggarogo yiluk it Ala aburi hinim homasagwidek menda en adem senggu dogopwak yiluk, yugeralagwi?

⁵ Hit henanggadi arovovok yiluk, yukheraliga o, naswei. Ap endawi werek ambien aswei weyak ogaguselok, enawene adem senogo yugeraup henanggelekma agarikbuk halok, ogasagwi yi?

⁶ Werek hegek ovara, it Ala wene wegetek ako menda en adem senupwak yiluk, henaswei wogonombolok bisa lendagwi andi weyagat hinigis.

⁷ It ap avyarat embetetek menda en enawene amburup mbalupwak yiluk, hit henaswei avyarat ombasagwi menda ovara, wogonombolok bisa lendagwi andi vaga hit Ala aburi menda henagayuk dek okhedelagwi hinisaliga. Hit weyak erogo bugugwis, henangge-henangge ugun ininggidimot wugwi, ogagusigik, hininis sek dogopwak yiluk, onggo yugeregetek mbuverek dogop andi segat.

⁸ Mbup erek dogop sek ovara, at ambi angge at ambi hedegek ogasagwi vaga hit henaswei hinimat weyak okhedelagwi.

^9-10 Eke, it weyak adigat ogasagwi halok, Ala avema bisaligama bisayogonbuk ako, hit hinunggut a? It avakwa ugun-ugun oginivit lendagwi menda inim, madis inis adup ogasagwi menda inim, ap ogwa werek hegek hwa agun werek hegek ogasagwi menda inim, ap-ap wanggis welagwi menda inim, enonggop welagwi menda inim, yi menda ndi menda hogop ombasagwi menda inim, amburup nunggu lagarwik, nenek ovagak yagan lendagwi inim, avakwa nin ininis weyak erogo biselagwi menda inim, avakwa enangge enonggop hedaguluk, enambukmu dagasagwi menda inim, avakwa andi menda Ala avema bisaligama bisayogon mondok dek atma, avakwa en henambukmu unggu dugwit, wene adik yukherelagwi halok, enane hulup mondok moga o.

¹¹ Hit o endak en ap anderogoat welagagup ovara, Nenowa Inis Ombok Yesus Keretus ogagagi vaga Nenasin Ala Averiniki akoen henomaduk horogo bugugu, Ala aburi adik denogo bugugu, eke, “Ap yi, segat,” yiluk, wokhinupu, ogagagi o.

Neneyave vaga sek adigat ogagu dogop wene

¹² Hit ninen yugu dugwit, “An yi menda ndi menda ugunat ogarup segat,” yiluk, yagalagwi ovara, an nendawi en, yi menda ndi menda ovok erogo andien sek okbininayogonbuk yagaliga. Nin nit weyak okbininaup hegek un enam warogo-at ogarit nelagwi. “An yi menda ndi menda ugunat ogarup segat,” yiluk, yagalagwi ako, ogarit lagwi vaga, yi menda ndi menda andi anye agya dugwit heda makninivisiga atma yiluk, an anderogo okbanup andi nanggon.

¹³ Nenagarom andi, nenalot ake, eke, nenalot andi, nenagarom ake ovara, hivis At Ala en, andi iperen degerogo bayogon. Neneyave ako andi, avakwa ugun oginivit lagu dogop yiluk ake bininggitek. Neneyave andi, Nenowa Inis Ombok ake denek agurik. Eke, Nenowa Inis Ombok andi, neneyave ake denek agarik.

¹⁴ Ala en Nenowa Inis Ombok iluk erogo mondok okbagagirikmu, nit ogo, At anye vaga niniluk erogo mondok okbininayogon.

¹⁵ Hit heneyave andi, Keretus inggis-isok hak hunik agurik ako hinunggut a? Hit heneyave Keretus inggis-isok hak At eyave vaga hunik agurik ako, weralogo hwa yanenggek ovaga lobalogo betaup sek embetep? Mondok moga.

¹⁶ At Ala en iri dugwit, “Iperen eneyave mberen ovara, ambiat arusogom o,” yiluk, yagagi dirup warek agarik ako hinunggut a? Dirup warek agarik halok, ap ambi hwa yanenggek iperen dambulusogom halok, iperen eneyave ambiat arusogom o.

¹⁷ Anderogo ovara, ap ambi saen Nenowa Inis Ombok inim hunik agarik halok andi, iperen enendawi ambiat dambulik agarwik.

¹⁸ Andi halok, avakwa ugun-ugun weyak oginivup okhinipu halok, “Ogarup nenanggon o,” yiluk, mbobagu dogones. Yi weyak ndi weyak henendawi wenggelogo ogasagwi halok andi, henagamut weram en ogasagwi ovara, avakwa ugun-ugun oginivit nagu dugwit, weyak ogasagwi andi, heneyave ilimat mondok weyak okhedelagwi aro.

^19-20 Hit heneyave andi, Ala Averiniki awi valek agarik ako hinunggut? At Ala en onggo ombok vaga henonggo mbanggya lagagirik, Ala Averiniki wokheragagi henendawima werekma, hit heneyave andi, hit henangge dek. Ata, At Ala angge atma, At inis ombok arupwak yiluk, heneyave vaga sek adigat ogagu dogones.