1 Korindus 5 - ALA WENE HIVIS DIRUP WATUGWA

Ala aburi en weyak ogagagwa wene

¹ Nowa-nasin. Hit henanggelekma andoma avakwa ugun-ugun ogagwi naruk hunggis atma, wene ambi yukherayogon. Ap ambien at asin ogwa hegek, “Mbanggas,” naruk hunggu lagirik, yukheraliga. Avyak yoma wai. It avakwa Ala wene inunggut weram menda en hit ogagep andi, it wane-wane mondok ogasagwidek ovara hegek, hiren ogagep.

² Hit Ala aburi en ap ako weyak ogaga vaga henendawi wakhidugu dugwit, henanggelekma en nggigilogo wibaup segat hegek ovara, sagalogo baluk, “Yi iya erogo ogagetek o,” yiluk, henendawi adup wogobetegek nagu hinigis.

³ An ako, an neyave hinim dek, o adumu yoma neyagek ovara, nendawi hinimat agirik. Hinimat agirik atma, neyave ninim henanggelekma agirik ovagak dugwit, ap ogaga andi, vage owak dilogo bagirikmu,

⁴ hiren wibavovok yiluk, Nenowa Inis Ombok Yesus inis vaga yukheraliga. Ndugwis ambi vaga hit Ala aburi homagu dugwit, neyave hinim agirikbuk ovara, nendawi hinimat homasagwima Nenowa Yesus anye vaga ap ako yugurup.

⁵ Yugugu dugwit, “Hat hasam hanok yiluk, Sile en heyave weyak ogasiga ako weyak okbagagya dogopwak yiluk, heyave Sile inggimu bagalyagwi. Hat hasam higya heyalok, hivis Nenowa Yesus warup hudi vaga hendawi hagap wendarupwak en, yogak heyave Sile inggimu bagalyagwi o,” yiluk, yugugu dogomundik, mondok weram wibaup.

⁶ Hit henendawi adup wogobetelagwi andi, weyak aro. Roti virisiga menda horok ambukumat roti anggelekma baguselok, roti eyave ovok erogo virisiga ako hinunggut, yi!

⁷ Ala en hit horogo baluk At aburi adik denek okbigigigi. Anderogo atma, roti virupwak yiluk anggelekma bagetek ovagak dogovovok yiluk, ap weyak ogasiga ako roti virisiga menda ovagak henanggelekma agarik andi, mbobas. Isogo Vasika ndomba nenake warup Keretus ako andi, vage watugwa atma, nit isogo naup mondok vipuk ogarek agarik o.

⁸ Vipuk ogarek werekma, isogo nunggu dugwit, roti virisiga menda anggelekma baluk, isogo ako ovagak, muk menda nit ovok weyak adigat ndugurek-ndagarek ogagu lagagup akorogo ogagu dugwit, nunggu dogop moga o. Ata, roti virisiga menda bagetek isogo ovagak nenendawi mondok sek avyarat menda adigat ogagu dugwit, nunggu dogosogom o.

⁹ An endak dirup warogo wokhirigya dugwit, “It avakwa ugun-ugun oginivit nelagwi menda ako hinim dambulik dogobuk,” yiluk, dirup warogo wokheragagis ako vaga yisogon.

¹⁰ It weram Ala wene inunggut menda en avakwa ugun-ugun oginivit lendagwi menda inim, yi menda ndi menda hogop ombasagwi menda inim, avakwa enangge enonggop hedaguluk, enambukmu dagasagwi menda inim, madis inis adup ogasagwi menda inim, hinim dambulik dogobuk yiluk, dirup warogo wokheregetek. It avakwa weram Ala wene inunggut menda andi hinim dambulik dogobuk yiluk, dirup warogo wokherela en, o wen vaga yoma avakwa andi menda adigat werekma, hit nggoma duklip.

¹¹ An dirup warogo wokheragagis ako andi, iren, “Nit ovok Ala aburi-at,” ombakluk, “Nenaswei o,” yukherelagwi ako menda avok dirup warogo wokheragagis. Iren “Nit Ala aburi,” yukhirugu dugwit ovara, avakwa ugun-ugun oginivit nagwis, yi menda ndi menda hogop umbutwi, madis inis adup ogagwi, avakwa nin ininis weyak erogo bugwis, amburup nunggu lagarwik, nenek ovagak yagan nagwis, avakwa enangge enonggop hedaguluk, enambukmu unggwi, ogaguselok andi, “Hinim dambulik dogobuk. Eke, erom wokhiruguselok ogo, naup mondok dek o,” yiluk, dirup warogo wokheragagis.

^12-13 It weram Ala aburi dek menda enowak dilinivup ako andi, an novadombok dek. Ala enat enawene amburup mbabaluk, enowak dinggu hagup. Anderogo ovara, “Ap ambi weyak ogasiga ako, henanggelekma en vagarogo wibas o,” yiluk, dirup warek wane-wane, it Ala aburi hinim homarisagwi menda ambien weyak ogagya halok, hiren at owak dilup dek embetep? Owak dilup aro.