1 Korindus 4 - ALA WENE HIVIS DIRUP WATUGWA

Keretus lakbigik menda en ogagu dogop wene

¹ Anderogo atma, “Ala agose mbauk hwilago menda it avakwa yugerapwak yiluk andok okbogogi atma, it At Keretus ayelomani-at inigup o,” yiluk, ninumbutu dogones.

² Ap ombok ambien ayelomani ambi ogagu dogop andok okbisiluk, ogarit lagusigik, “An yugirigi dibaluk, ogagu samwi a dek a?” yiluk, il dombabisaliga.

³ Anderogo atma, hit a, ata it avakwa enowak dilisagwi menda a, an ogagya dibaniluk, yuknuguselok, “Andi avyarat yagao,” ombarisogonbuk. Eke, an ogasiga ogo, nowak nadigen dilhedaligadek.

⁴ An ogarit lagya dugwit, weyak ogagi ambi nendawi wenggelek agirikbuk. Ovara, weyak ambi werek helan, “Sek adigat ogasiga,” iri neyaoen, nane yegetek mbauk agirik atma, At Nowa Inis Ombok en adigat dibaniluk, yuknisogon o.

⁵ Andi halok, it avakwa enowak dilup hologo bagagi hudi ao horok ari wagetek hegek, hiren avakwa enowak dilogo weyak enovaga lobalogo bugu dogobuk. Ata, Nenowa Inis Ombok wagya dogomindik, nit avakwa nenendawima mbauk ombasagwi hwilago agarik ako sigam erogo bagya, eke, nenagose ombasagwi ako ombokma en vagalogo yuknirigya, ogarisogon. Ogarisogon halok, wagetek hegek avakwa enowak dilogo weyak enovaga lobalogo bugu dogobuk. At wagya hudi vaga Ala en nenadik-nenadik ogasagwi ako wane-wane adenggen nenovaga bininayogon.

⁶ Anderogo atma naswei o. “Wene dirup warek hegek, adik ogasagwi andi moga o,” yagalagwi ako, Apolos niperen ogasagwi menda hit mamulhedavovok yiluk, an wene yukheraliga andi, nit neneyave vaga wakhegek yukheraliga o. Mamulhidugu hiniselok, hiren, “At ambi iya, eke, at ambi weyak,” yugu dugwit, wogobatugu dogobuk.

⁷ Nit avakwa siyalek dogop, sovalek dogop andi, saen hologo bininaliga embetep? At Ala en wokheregetek hiren adigat hedagagup ambi ngga vagago agipik? Eke, Aren adigat wokheragagi hegek, nggarogo yiluk, henadik en hedagagup ovagak okhedelok an ap iya okhedelagwi?

⁸ Hit yi menda ndi menda sek menda ovok hininggimu agarik embetep? Hit hininggis ovok werek embetep? Eke, nit ao okbininggitek hegek, hit henendak hininis werek agipik embetep? Dek o. Hit avyarat hininis werek duklip en, nit ninimat nininis werek duklu ovara, dek atma, ai ombasagwi.

⁹ Nit andi, avakwa enanggon menda avakwa inivaga ombokma hivis eneyave bigitbisiluk enanggadi warogo inarisagwi hak, nit At Ala en lakbigik menda ako, avakwa inim, malaikat inim, inivaga anderogoat okbininaliga ombasiga o.

¹⁰ Nit andi, Keretus wene yugeregek nelagwi vaga ap wes ovagak nenombasagwi ovara, hit andi, “Nit Keretus ninim hunikmu, nenendawi werek,” ombasagwi. Hit henanye wisane ovara, nit andi, nenanyedek nenombasagwi. Hit siyalek-at agipik ovara, nit andi, meyanat nenombasagwi.

¹¹ O muk en yogak hudi nit wen vaga yenam dugwit, nenagas-nenagarom uvup okbininggu, nenasum hivirik-mavirik ogarek hegek nagwis, yoyawi ninitwis, nenawi valek dekma ugun o hunogoma ya nogo yigik ogarit nagwis, ogarit lendagwi o.

¹² Andi ogarit lagu dugwit, nininggis vaga adigat sakdida okhedegek nelagwi. Homanane nenovaga bininggusigik nenadenggen enovaga bugwis, anggin-mbanggin okbinunggusigik nenendawi seve yiluk, mbauk wugwi,

¹³ wiyiknom-weyaknom erogo nenavok mbanggusigik, niren wene onggo sek adigat yugwi, ogasagwi. Ogagu ninigik, agamut angge mbobo ugogo mbombo ha lendagwi wane-wane, avakwa wen vaga menda o muk en yogak hudi vaga anderogoat okbininelagwi o.

¹⁴ An wene dirup warogo wokheraliga yi andi, henanggadi wakbigigaigen yiluk, warogo wokheraligadek. Ata, hit an naburi nendawi hunik atma, un henaruk warisiga.

¹⁵ Ap hinim dugwit, Sek Wene Keretus avok mamulhirugu dogop ako, eneyave ovok 10.000 hak dogop sek ovara, ovok henasini dek o. Ata, Keretus Yesus en lakbaninggigi henanggelekma dugwit, Sek Wene endak yukhirigya lagagis nadik anatma, henasin an nadik aro.

¹⁶ Anderogo atma, an ogasiga hit wane-wane ogagu dogovovok yiluk, yukheraliga o.

¹⁷ An ogasiga hit wane-wane ogagu dogovovok yiluk, an nabut nendawi hunik Timotius ako, henadema lakba wagi. At Timotius ako, Nenasin wene mondok des erogo ogarit landiga. Aren henanggelekma dugwit, an Keretus Yesus inim hunik dugwit ogagya, eke, Ala aburi yi awi ndi awi homasagwi ako yugeregek lagya, ogasiga wene ako aren yukhirigya dogosogon.

¹⁸ Hit ninen, “At bikninisa warisogonbuk o,” yiluk, wogobetelagwi ovara,

¹⁹ Nenasin Inis Ombok en, an bikhinisa warup sek imbita halok, an mbikit bikhinisa wasogon ombasiga. Henadoma wagya dogomindik, it avakwa en, “An anderogo ogagi o,” yiluk, wogobetelagwi ako, “It avyarat Ala anye vaga ogagu dugwit yagalagwi a, ata un enane vaga adigat yagan nelagwi a?” yiluk, dibigigagiluk warisogon o.

²⁰ Ala avema bisaliga ako andi, avakwa enane ugun yagan nelagwi ako dibisiluk, avema bisaligadek. Ata, At anye enendawima okbugu hegek, sek ogarit lendagwi ako adigat, avema bisaliga.

²¹ Anderogo atma, an bikhinisa wagya dugwit, yo nabirok wolok bikhinisa wasogon a, ata nendawi sagain vaga henabwa imbita dugwit, bikhinisa wasogon a? Hit henendawi wenggenggu dogones.