1 Korindus 2 - ALA WENE HIVIS DIRUP WATUGWA

Keretus yo winik vaga watugwa wene

¹ Nowa-nasin o. An endak Ala agose mbauk hwilago welagagi ako yukheragiluk henadema wagya lagagirik, hit henendawi adenggen ombarovovok yiluk, “An ovok nilup, nendawi werek,” imbita dugwit, nane ombok-ombok vaga yukhirigya lagatek.

² An henanggelekma dugwit, yi wene ndi wene ugun yukheraup embetetek. Ata, Yesus Keretus ogagya lagagi wene yukhirigya dugwit, At yo winik vaga watugwa wene ako adigat nendawima wenggelek dugwit, yukhirigya dogosogon imbitigis.

³ An neyave nanyedek atma, nalon en nowak dede iri dugwit hinim welagagis.

^4-5 Hit henendawi avyarat ombasagwi ako, avakwa wen vaga menda enendawi wenggebaluk, yegek nelagwi vaga vanggabaluk dogobuk. Ata, Ala anye vaga okbigik landiga ako vaga adigat vanggabaluk dogovovok yiluk, an henanggelekma ninim wene mbanggwis, Ala wene yukhirigya, ogagya lagagis. Ogagya dugwit, “Wene ovok nilup ovagak,” ombakluk, nane ombok-ombok vaga henendawima molalit nagu lagatek. Ata, hit avyarat ombarovovok yiluk, Ala Averiniki anye vaga okhinipu hegek, yukhirigya lagagis ako.

Ala agose mbauk hwilago welagagi wene

⁶ It ap enendawi hoda halok andi, wene nit ninilup ako yugerelagwi. Yugerelagwi ovara, wene nit ninilup nenendawi werek dugwit, yugerelagwi ako andi, wen vaga wene ako menda dek o. Eke, it ap enagayuk werek wen vaga yoma yogak agarwik dek arit lendagwi ako, wene inilup dugwit, yugerelagwi ako menda dek aro.

⁷ Ata, ninilup nenendawi werek dugwit, yagalagwi ako andi, Ala agose mbauk hwilago welagagi akoat yagalagwi. Wene andi, o muk wen-mbogot ao ogagetek hegek, Ala en, “Nit siyabininayogon,” ombakluk agose mbauk hwilago welagagi ako adigat yagan nelagwi.

⁸ At Ala agose mbauk hwilago welagagi ako andi, it ap wen vaga yoma enagayuk werek agarwik akoen dibagetek. Iren dibalipmu en At Nenowa mondok siyalek agarik yo winik vaga watugwa ako waklipuk.

⁹ Ala wene endak dirup warek ako vaga, wene ambi yi dirup warek agarik: “At Ala en it avakwa enendawi hunik ombasagwi enake vipuk okbigigi agarik ako, avakwa en eyave inil hegetek, ane iris enaruk hunggitek, enendawima mondok embetetek, ako menda At Ala en vipuk erogo bigigi o,” yiluk, dirup warek ako agarik.

¹⁰ Dirup warek ako wane-wane, At Ala en At agose mbauk hwilago welagagi ako, nit sigam haguluk, At Ala Averiniki yugugu hegek, nit yukneragagi. At Ala Averiniki akoen yi wene ndi wene adem ovok erogo dibaliga atma, dibagya dugwit, Ala agose endawima hwilago agarik menda inimat dibaluk, yukneraliga.

¹¹ Ap ambi endawi ombasiga ako, it nin inunggut inigik, at adik ilup agarik andi wane-wane, Ala ombasiga ako Ala Averiniki adigat ilup agarik.

¹² Niren, avakwa wen vaga enendawi ombasagwi ako menda hedegetek. Ata, Ala en onggodek nit unat wokneragagi ako ninilup aruguluk, Ala en Averiniki lakbinini wagagi akoat hedagagup.

¹³ Andi halok, Ala en wokneragagi yukherelagwi ako andi, it avakwa wen vaga menda enendawima en, “An nilup atma, nendawi werek dugwit yukherayogon,” yiluk, yagalagwi ako hak, nit yukherelagwidek. Ata, Ala Averiniki nenendawima dugwit, mamulnirigya hegek, wene adem ako des erogo mbilinogo yukherelagwi.

¹⁴ Ala Averiniki en hologo yukneraliga ako andi, nit Ala Averiniki nenendawima agarik andi yedok helagwi. Ovara, it avakwa wen vaga menda ako, Ala Averiniki enendawima agarikbuk atma, wene andi, hobaluk, ugun dibagetek dugwit, “Yi ap wes enane ovagak higyo,” yiluk, hekbelagwi.

¹⁵ Anderogo hekbelagwi ovara, nit Ala Averiniki nenendawima agarik halok andi, yi menda ndi menda inim, yi wene ndi wene inim, dibaluk ogarup ndak. Dibaluk ogarit lagu ninigik, avakwa ninen, “Weyak ogarit lendagwi higyo,” yiluk, yukneraup mondok dek.

¹⁶ Ala wene endak warek ambi iri dugwit: “Ala endawi ombasiga ako, saen ilup dugwit, At mamulirup sek embetep? Mondok dek aro,” yiluk, yagagi dirup warek-at agarik, ovara Keretus endawi ombasiga ako nirat vagago agurik.