1 Korindus 15 - ALA WENE HIVIS DIRUP WATUGWA

Yesus iluk akluk mondok yagagi wene

¹ Nowa-nasin. Yogak an Sek Wene endak yukheragagis wagagup vaga henendawi avyarat umbutu lagagupik vagago agipik ako dibavovok yiluk ambi inim yukherayogon.

² Yukheragagis ako hiren mondok wadokdek vagago dogosogom halok, Sek Wene andi vaga henagap wendarisogon. Anderogo ovara, hiren mondok wadokdek vagago dogosogombuk halok, un enam warogo avyarat umbutugup ai?

³ Anderogo atma, an wene wagagis ako hit “Wene yi mondok iya,” yiluk, ombarovovok yiluk yukhirigya lagagis ako eyave yi: Ala wene dirup warek wane-wane, nit weyak ogagu niniselok, At Keretus nit nenake-at hombagagi.

⁴ Hambigya lagagimu, At eyave legogo wimu mabagagwa. Mabagu lagagwama, Ala wene endak dirup warek wane-wane, ndugwis mberen dukluk, ndugwis ambi vaga Ala en iluk erogo mondok okbagagi.

⁵ Mondok okbagya lagagimu, At Yesus en Peterus il neyapwak yiluk, At eyave inuk lagya lagagirik, eke, hivis it denogo bigigi menda 12 ako inil neyapwak yiluk, At eyave inugeragagi.

⁶ Ako inugirigya lagagirik, okbaluk, hivis nenaswei eneyave wisane 500 hudi ambekma wonggalek welagagwa ako, inil neyapwak yiluk, inugeragagi. It avakwa enadema inugeragagi ako andi, nin vage hombagagwa ovara, nin wisane hambegetek ao iniluk agarwik.

⁷ Ako inuk lagya lagagirik, hivis, Yakobus il neyapwak yiluk inuk lagya, andi okbaluk, it lakbigik menda ako ovok erogo inil neyapwak yiluk, inuk lagya, ogagagi.

⁸ Andi ogagya lagagirik, an ako, avyak endaklarup hudi ao hegek, enape wenggelekdekma supuk erogo endaklendagwi ovagak, an anderogoat nape wenggelekdekma il neyapwak yiluk, o hivis erogo an nadoma inuknogogi.

⁹ An o endak en Ala aburi homarit lagu lagagwa ako anggin-mbanggin oginivit lagya lagagis atma, “Lakbigik menda,” yuknugu duklipuk ovara, an ako, ap lakbigik menda denogo baninggigi o, avyak. An Ala aburi anggin-mbanggin oginivit lagya lagagirik, it lakbigik menda nin ako winimen inigik, an andi, iya erogo dekma, enavema agirik.

¹⁰ Anderogo atma, At Ala nabwa imbita lagagirik, okbaninggigi ako vaga yogak nandogon adik ogarit lagya neyalagwi andi aro. Ala nabwa imbita dugwit, okbaninggigi ako andi, un enam warogo okbanenggetek. It lakbigik menda nin ako andi, we un horogat ogagu lagagwa ovara, an andi, mondok wisane erogoat ogagya lagagis. Andi ogagya lagagis ako andi, anenen andi dek. Ata, Ala nabwa imbita dugwit, okbaninggya hegek, wisane erogo ogagya lagagis atma yiluk yigi.

¹¹ It ogagu lagagwa vaga a, an ogagya lagagis vaga a, andi iya erogo dek. Ata, nit ovok wene eyave ambiat yukheragagup hit avyarat umbutugup andiat, mondok iya.

Ala en niniluk okbininaliga wene

¹² At Keretus ako hambuluk lendagwima en iluk erogo mondok okbagagi wene niren yukhirugu ninigik ovara, hit ninen yugu dugwit, “Avakwa hambisagwi ako iniluk arusogom dek o,” yiluk, nggarogo yiluk yagalagwi?

¹³ “Nit hivis hambuluk, niniluk arusogom dek o,” yiluk, avyarat umbutu duklipmu en, At Keretus ogo, hambuluk, iluk aklipuk avyarat umbutu duklip.

¹⁴ Eke, At Keretus hambigya lagagirik, iluk aklipuk en, nit wene yukherelagwi ako andi, un enam warogo huluk-huluk ovagak yukhirugu duklu atma, hit ogo, henendawi un enam warogo avyarat umbutu duklip.

¹⁵ Eke, it avakwa hambisagwi ako iniluk erogo mondok okbisaup avyarat duklipuk en, Ala en Keretus iluk okbagetek hegek, “Dek o, iluk erogo mondok okbagagi o,” yiluk, yukhirugu lagagup atma, nit yagalagwi ako hulugat yagalagwi ninumbutu duklip.

¹⁶ Eke, it avakwa hombagagwa ako, hivis iniluk erogo mondok okbisaup dek umbutuselok, At Keretus hambigya lagagirik, iluk agagi ako iluk agetek mondok-mondok hombagagi umbutu duklip.

¹⁷ Eke, At Keretus iluk erogo mondok okbalipuk en, hit henendawi avyarat ombasagwi ako andi, un enam warogo avyarat umbutu dugwit, henomaduk mondok henovaga durigat duklip.

¹⁸ Eke, At Keretus iluk aklipuk en, it Keretus inim hunik dugwit hombagagwa ako ogo, ugun yelemele yilip.

¹⁹ Eke, nit ogo un wen vaga yenam en adigat Keretus sek okbininayogon nenendawi wenggenggu duklurigen, “Hit avyarat embetetek menda henabwa o,” yiluk, yugerelagwi ovara, iren, “Ayi! Hit henabwa edok erek hiniselagwi,” yiluk, yuknirugu duklip.

²⁰ Anderogo ovara, At Keretus hambuluk lendagwima en iluk erogo mondok okbagetek andi dek o. Avyarat mondok okbagagi atma, endak ap manggum wane-wane, it hambuluk lendagwima en At endak iluk erogo mondok okbagagi ako andi, Arat.

²¹ Ap ambien weyak ogagagi ako vaga nit ovogat hambit lendagwi andi wane-wane, ap ambi ogagagi ako vaga nit ovok hambuluk lendagwima en niniluk erogo mondok okbininayogon.

²² Nit ovok Adam ninim hunik dugwit, hambisagwi andi hak, nit avakwa ovok Keretus ninim hunik dugwit hambisagwi halok andi, mondok niniluk dogoguluk, mondok okbininayogon.

²³ Andi ogagya dugwit, hivis endak niniluk erogo mondok okbininayogon. At Keretus andi, ap manggum-at endak iluk erogo mondok okbagagi atma, At hivis wagya dogomindik, At aburi ninim hunik agurik ako, At ambetaga ovogat niniluk erogo mondok okbininayogon.

^24-25 Mondok okbininggu halok, o hivis atok vaga arup akoat ari warisogon. At Ala en, “It ninim ogorek agarwik ako sovalogo bigitek neyagek, Keretus adigat inis ombok siyalek dogopwak o,” yiluk, imbitigi. Imbitigi atma, yi madis ndi madis inim, ap ombok avakwa vagenombogo agarwik inim, enanye werek menda inim, it Ala inim ogorek agarwik menda ovok erogo At Yesus en degerogo bisayogon. Degerogo bugu dogomindik, nit Nenasin Ala avema dogogwen yiluk, At aburi okninipigi ako adigat woknenombolok Ala avema binina layogon.

²⁶ Ala inim ogorek agarwik ako degerogo bugu dogomindik, atok vaga andi, hambisagwi adem ako mondok degerogo bayogon.

²⁷ “Yi menda ndi menda ovok erogo At avema dogopwak yiluk bagagis o,” yiluk, yagagi dirup warek agarik. Andi, At Ala en, “Yi menda ndi menda,” yagagi ako andi, At yi menda ndi menda Keretus avema bagya dugwit, “An neyave inim At Keretus avema seve yiluk, dogogwi en,” yiluk, yagagibuk.

²⁸ Ata, yi menda ndi menda inim, yi avakwa ndi avakwa inim, ovok At Ala en sovalogo Keretus avema bisagwi. At avema bugu dogomindik, At Ala adigat siyalek dugwit yi awi ndi awi At ane adigat mondok hudi bago dogopwak yiluk, Abut en iri dugwit, “Hat Nasin yi menda ndi menda navema bagagin ako, yogak An Habut havema seve yiluk, dogosogon o,” imbita dugwit, yugugu hagup o.

²⁹ It hambisagwi ako iniluk mondok okbisalapuk en, it ap hambisagwi enavoloma ima wombabiselagwi ako andi, nggarogo yiluk wombabiselagwi ombasagwi? It hombagagwa ako iniluk erogo mondok okbisalapuk en, nggarogo yiluk it enowa enasin hambuguselok, “Enavoloma ima wombabininapwak o,” yiluk, yagalagwi, ombasagwi?

³⁰ Eke, nit ogo andi, Ala en niniluk erogo mondok okbininelapuk en, nit hutun howam ninirup ogagusigik, nenendawi wadokdek duklubuk.

³¹ “At hambupwak o,” yiluk, ndugurek-ndagarek naruguluk ogagusigik, nalon dek dugwit, waliga hit huluk nombarubuk. Eke, Nenowa Inis Ombok Keretus Yesus hinim hunik dugwit, hit ogasagwi vaga an nadenggen imbita dugwit, Ala inis siyabaliga andi, avyarat numbutu dogovovok yiluk, yukheraliga, naswei.

³² Avakwa hambuluk lendagwima en iniluk erogo mondok okbisalapuk en, an o Evesus dugwit, it avakwa yangge do aninis werek menda hak, ninim yawi initu lagagis andi vaga an nano hedaup yiluk ogagya lagagis ombasagwi? Avakwa hambuluk lendagwima en iniluk erogo mondok okbisalapuk en, it avyarat ombasagwidek menda en yagalagwi hak, inim yilu: “Nit hutun-at hambusogom atma, yogak adigat sek menda nenggek lagu dogosogom o,” yiluk, yagalagwi ako ndatak-at yilu.

³³ Avakwa en yugu dugwit, “It nin enandogon weyak menda hinim dambulik nagu hiniselok, hit henandogon sek menda weyak okhedasogom o,” yiluk, yagalagwi ako andi, avyarat yagalagwi atma, avakwa en wene adik yukhirugu dugwit, henambukmu unggu saoen, henendawi dibas.

³⁴ Hit weyak ogasagwi andi, henasam helok, mbobagu dogomundik, henendawi werek ares. Hit nin Ala eyave hinunggut agipik andi, henanggadi warigiluk, yukheraliga.

Mondok-mondok niniluk okbininaup wene

³⁵ Hit ninen yugu dugwit, “Nit hambisagwi ako nggarogonggan mondok okbininaup ombasagwi? Neneyave nenelose nano wane-wane ovagak okbaluk mondok okbininayogon?” yiluk, yugwi hinigis atma, avyak.

³⁶ Hit ap wes ovagak dugwit yagalagwi! Iwabuk awi yakbagurikmu agamut nggolalogo bagetek hegek, avuduk dagasiga ombasagwi?

³⁷ Hit yi menda ndi menda awi yasagwi menda ako yagu dugwit, eyave apik awi yasagwidek. Ata, iwabuk awi a, ata yi menda ndi menda adik menda awi a, yagu dugwit, enggen ambiat yasagwi ovara,

³⁸ avuduk dagagiluk ogagya dugwit, eyave elose adik avuduk dagasiga ako andi, Ala en adigat endawi wenggebaluk, ogasiga o.

³⁹ Yi menda ndi menda amuya werek wakhagagi ako andi, eneyave ambiat adigat agarwikbuk. Ap eneyave adik, wam eneyave adik, swa eneyave adik, ikan eneyave adik-adik, anderogo agarwik.

⁴⁰ Mbogot vaga menda weregat, eke wen vaga menda ogo weregat. Mbogot vaga menda andi enelose adik-adik sek helagwi, eke wen vaga menda enelose adik-adik sek helagwi.

⁴¹ Mo abya andi sek adik, saut abya andi sek adik, dadiwap abya andi sek adik, eke, dadiwap nin andi abya sek adik-adigat agarwik.

⁴² It hambuluk iniluk erogo mondok okbisaup ako, anderogo wane-wane-at agarwik. Nit hambuluk neneyave vidis asiga menda andi, awi wen vaga yasagwi ovagak, neneyave wen vaga sabininggarwikmu, hivis neneyave vidis arup dek mondok-mondok dogop menda okbininayogon.

⁴³ Neneyave endak nenanggadi werek menda ako, wema sabininggu lagarwik, avoloma andi swi menda woknirigya, eke neneyave ndaik menda ako, avoloma nenanye werek mondok dogop menda okbininggu, ogarisogon o.

⁴⁴ Eke, neneyave wen vaga menda ako wen vaga sabininggarwikmu avoloma swi menda Ala Averiniki en mondok okbininayogon o. Nit wen vaga yoma dogopwak yiluk, neneyave wen vaga menda ogarogo bininggigi ako hak, hivis mbogot vaga dogosogom yiluk, neneyave mbogot vaga menda Ala Averiniki en okbininayogon.

⁴⁵ Ala wene vaga dirup watya dugwit, “Ap Adam endak menda ako, ogagarikmu, iluk agya lagagirik ane werek agagi o,” yiluk, dirup warek agarik. Eke, Adam hivis mbogot vaga menda ako andi, avakwa enendawi iniluk oginipu dogopwak yiluk, lakba wagagi.

⁴⁶ Andi halok, mbogot vaga menda endak wagetek. Ata, wen vaga menda endak ogagya lagagirik, okbaluk, hivis mbogot vaga menda lakba wagagi higyo o.

⁴⁷ Ap endak ogagagi ako andi, wen menda-at ogagagi. Eke, ap hivis menda ako andi, At awi adem mbogot vaga enat wagagi.

⁴⁸ It avakwa wen vaga menda andi, it enasin ap endak wen vaga ogagagi ako ndatak aro. Eke it ap mbogot vaga en wagagi aburi okbogogi halok andi, Enasin mbogot vaga menda ako hak aro.

⁴⁹ Nit yogak ap wen menda Ala en ogagagi ako elose wane-wane agurik. Eke, hivis anderogoat, nit At mbogot vaga en wagagi elose ako wane-wane-at okbininayogon.

⁵⁰ Nowa-nasin, an wene ambi yi yukheraliga: Neneyave-nenamuya yi, Ala avema bisaligama o mbogot vaga andoma dogosogombuk. Eke, neneyave vidis arup menda yi, neneyave mondok itok dogop menda arisogonbuk.

^51-52 Nowa-nasin o. Wene mbauk hwilago ambi yukherayogon. Nit ovok erogo hambusogombuk. Ugun werekma, o hivis andi hudi vaga ane ombok ogasiga trompet ako ane ogagya halok, mbikit supuk erogo ninil damok yagalagwi ovagak nit ovok neneyave mondok adik erogo okbininayogon. Ane ombok ogasiga trompet ako ane ogagya dogomima, it avakwa hombagagwa ako initok mondok iniluk dogopwak yiluk, mondok okbugu dogomindik, nit ovok neneyave elose adik menda okbininayogon.

⁵³ Neneyave vidis arup menda yi ako andi, nggolalogo hekbaluk, avoloma mondok dogop menda yikbininggu, eke, hambisagwi menda ako hekbaluk, niniluk mondok dogop menda ogarogo bininggu, ogarisogon.

^54-55 Neneyave vidis arup menda yi, nggolalogo hekbaluk, mondok dogop menda yikbininggu dugwit, hambisagwi menda ako hekbaluk, niniluk mondok dogop menda okbininayogon. Andi okbininggu halok, Ala wene endak dirup warek ambi yi atma des yisogon: “At Ala ayegen andugudis werek ako vaga inis ombok siyalek dugwit, hambisagwi adem ako mondok degerogo bayogon o,” yiluk, wene endak yagagi dirup warek ako atma des yisogon. Eke, “Hambisagwi adem andok yi, wai. Hat adem ngga ogagagin vaga hayegen inis ombok arisogon embeten? Hambisagwi adem andok yi, wai. Avakwa inirup yiluk hanye welagen ako adem ngga?” yiluk, avyarat atma des iri halok, yugu dogogup.

⁵⁶ Hambisagwi menda aik en hivitninivisiga adem andi, eve nit weyak ogasagwi andi vaga aik en hivitninipu hegek hambisagwi andi aro. Eke, nit weyak ogasagwi menda anye agarik andi, wene adem Musa en yagagi ako vaga anye agarik.

⁵⁷ Anderogo ovara, At Nenowa Yesus Keretus ogagagi vaga Nenasin Ala en At anye vaga nit weyak ogasagwi ako degerogo bininaliga. Anderogo atma, “Nenasin Ala wa,” yiluk, At adigat inis siyabagu dogosogom.

⁵⁸ Andi halok, naswei o. Hit henendawi mondok horaik wadokdek dugwit, Nenowa Inis Ombok eyavup-at ogasagwi halok andi, un enam warogo ogasagwidek hinilup atma, ndugurek-ndagarek musek-hasek ogagu dogones.