1 Korindus 14 - ALA WENE HIVIS DIRUP WATUGWA

Ala eyavup ogagu dogop andok okbininaliga ambi inim yugeragagi wene

¹ Andi halok, nendawi-hendawi hunik ogagu dogop wene andi, henelokwe amor-amot okbaluk, ogagu dogones. Ogagu dugwit, Ala eyavup ogagu dogop andok okbininapwak en yiluk, At yugugu dogones. Yugugu dugwit, navi Ala en yukhirigya hegek yugurugu dogop inim andok okbigigapwak yiluk, At yugugu dogones.

² It avakwa enane inggut adik-adik menda Ala Averiniki en yugirigya halok yagalagwi ako andi, avakwa dibagetek inigik yagalagwi atma, avakwa enaruk hulupwak yiluk yugerelagwidek. Ata, Ala Averiniki enendawima atma des yi nunggwigya halok, wene agose hwilago menda yagalagwi atma, At Ala aruk hulupwak yiluk, yagalagwi.

³ Eke, it ap Ala en yugirigya hegek yugerelagwi menda akoen halok andi, avakwa enendawi hoda erogo bugwis, enaruk watwis, enendawi aik wakbugwis, ogasagwi.

⁴ It enane inggut adik-adik menda yagalagwi ako andi, it enadik enendawi hoda okhidugu dogogwen yiluk, yagalagwi ovara, it ap Nenasin Ala en yugirigya hegek yugeralagwi ako andi, Ala aburi wonggalek agarwik ovok enendawi hoda erogo bisaugen yiluk, yugeralagwi.

⁵ Hit ovok en enane inggut adik-adik menda yugu dogop andi, anen segat ombasiga ovara, anen hit ogarup mondok hogop ombasiga andi, “It ovok Ala en yugirigya hegek yugurugu dogopwak sek ai,” henombasiga. Enane inggut adik-adik menda yagan nelagwi ako andi, segat ovara, Ala en yugirigya hegek yugeralagwi ako, mondok iya. Eke, enane inggut adik-adik menda yagan nelagwi ako andi, it Ala aburi wonggalek agarwik ovok enendawi hoda arupwak yiluk, avut dagalogo yugeraup halok, andi ogo mondok sek.

⁶ Anderogo atma, naswei o. An henadema wagya dogomindik, Ala en wene ambi sigam erogo yuknugu hegek mamulhirigya, wene ambi des erogo hinilup okbugugu, navi ovagak wene Ala yuknugu hegek yukhirigya, wene yugathirigya, ogagetek dugwit, un enane inggut adik-adik menda yukheraigen yiluk henadema wagya neyalok, “Yi nano okbininaik yiluk waga?” henendawi nombarusogom akora?

⁷ Andi wane-wane mbunggengge ogagya dugwit, ane sek dek hegek un ane nggonggol adigat ogagya halok, avakwa en, “Wene andi menda yagaliga,” yiluk, nggarogonggan en dibaup ombasagwi?

⁸ It avakwa ndup ogarugen yiluk, ane ombok ogasiga menda trompet ako ane wulup-wulup sek erogo ogagetek halok, nggarogonggan it ap ndup inim sumburup ako, eneyak-enanggom adik-adik homari warup ombasagwi? Meyan o.

⁹ Andi wane-wane, hit enane inggut adik-adik menda yagalagwi ako des erogo yugeregetek hiniselok, hit yagalagwi ako sanien, atma des erogo hulusogom ombasagwi? Dek o. Hit yagalagwi andi, havut ane ovagak, un enam warogo-at yagan nagu hinigis.

¹⁰ Eke, o wen vaga yoma it avakwa enane adik-adik wisane yagalagwi ovara, wene adem dek hegek yagalagwi ambi mondok dek o.

¹¹ It wene yugusigik, an it enane hunggitek neyalok, iren, “Ap yi, huru ai,” numbutwi, eke, anen ogo, “It yi, ap huru ai,” yiluk, inimbita, ogasagwi.

¹² Andi halok, hiren, “Ala eyavup ogagu dogosogom yiluk, ambi andok okbanupwak ai,” yiluk, umbutu hiniselok, Ala aburi wonggalek agarwik ako, enendawi hoda okbisaup ako menda andok okbigigapwak yiluk, At yugugu dogones.

^13-14 Anen enane inggut adik-adik menda vaga samban ogagya halok, nendawi en avyarat ogarisogon ovara, “Adem ngga yiluk yigi,” an nendawi obak arisogon. Anderogo atma, ap sanien enane inggut adik-adik yagaliga menda akoen, “Nasin Ala, an enane inggut adik-adik menda iri dogomindik, avakwa enaruk hulisagwidek. It inunggut dogoguven, avut daganggu dogwegen yiluk, Hat andok okbaninok yiluk, yukhisiga,” yiluk, samban ogagya dogopwak o.

¹⁵ Andi halok, an nggarogo ogarik. Yerogo ogarisogon. Samban andi, ambi nendawi en enane inggut adik-adik menda vaga yisogon, eke, ambi nenane vaga nilup dugwit nendawi hobaluk en inimat yisogon, mberen andi yisogon. Eke, ndawi halok andi, ambi nendawi en enane inggut adik-adik menda vaga warisogon, eke nenane vaga nilup dugwit, nendawi hobaluk en warisogon, ndawi mberen andi warisogon.

¹⁶ Ala inis siyabagu dugwit, henape wenggelek dek hegek, enane inggut adik-adik menda vaga samban ogagu hiniselok, it avakwa nin hinim homakbaluk, samban ogasagwi ako, hat iris ako it dibaup meyan atma, nggarogonggan, “Avyarat yagas o,” yiluk, “Amin,” yusogom ombasagwi?

¹⁷ Hiren Ala wa yugisagwi andi segat ovara, hiren enane inggut adik-adik menda yagalagwi atma, it nin dibagetek inigik, hiren enendawi hoda okbisagup degat hinigis.

¹⁸ Enane inggut adik-adik menda andi, hirenen horogat yagalagwi. An andi, wisane erogo yagaliga, yiluk, “Ala wa,” yugisiga.

¹⁹ Ala aburi wonggalek agarwik enanggelekma dugwit, an enane inggut adik-adik menda ako vaga yugirigya neyalok, avakwa enaruk hulup dek atma, an nane adup wisane yugeraup nanggon. Ata, it dibapwak yiluk, it enane vaga wene dul inis 5 hudiat yugeraup andi, segat ombasiga o.

²⁰ Nowa-nasin. Hit henendawi wenggelisagwi ako andi, it avyak maridugi enendawi dek en wenggelisagwi andi hak, henendawi anderogo wenggenggu dogobuk. Ata, it ap enendawi werek wenggelisagwi ako wane-wane wenggenggu dogones. Weyak ogarup okhinipu haoen, avyak ao swi endago weyak ogasagwi inunggut agarwik ako wane-wane, hit anderogoat dogones o.

²¹ Andi, Ala wene endak dirup warek ako vaga, Nenasin Inis Ombok Ala en iri dugwit: “It ap huru enane adik yagalagwi menda en, avakwa An naburi yi, An nane yugerapwak yiluk, lakbisa warimi ovara, nane yugeramwi ako it des erogo enaruk hulup andi mondok enanggon o,” yiluk, Ala en yagagi dirup warek agarik.

²² Anderogo dirup warek agarik atma, it avakwa enane inggut adik-adik menda yagalagwi akoen, it avyarat ombasagwi ako inilup agek menda enake yagalagwidek. It enendawi avyarat embetetek menda en inilup agek menda enake yagalagwi. Eke, it navi Ala en yugirigya hegek yugurugu dogopwak yiluk, andok okbogogi ako andi, it avyarat embetetek menda inilup agek menda enake yagalagwidek. Ata, it avyarat ombasagwi menda inilup agek menda enake dibapwak yiluk yugerelagwi.

²³ Anderogo atma, it Ala aburi ovok ambekma wonggabaluk, it ovok en enane inggut adik-adik menda yuguselok, it ugun dibagetek menda a, Ala wene avyarat embetetek menda a, wagu dogomundik, irenen, “Ap yi, nenek ovagak yagan nagwis yi hinil yogisenes,” yiluk, yugu dogosogom dek embetep?

^24-25 Yugu dogosogom-at ovara, hit ovok erogo At Ala en yukhirigya hegek yugusim, it Ala wene wegetek menda waguselok andi, hit Ala en yukhirigya hegek yugurugu dugwit, wene agose it enendawima mbauk hwilago agarik ako ovogat vagalogo sigam yugurugwi hulusogom. Hunggu dogomundik, enasam helok, “Wene andi, nit niniselok, yuknirugu sugup o,” yiluk, enendawi wakhedasogom. Enendawi wakhidugu dugwit, Ala avema seve yiluk, Ala siyabagu dugwit, “Ai, Ala hinim avyarat agipik o,” yiluk, yukherasogom.

It Ala aburi wonggalek dugwit, ogagu dogop wene

²⁶ Andi halok, nit nggarogo yuk, naswei. Hit homakbaluk dugwit, ap ambien ndawi viyalup imbita halok viyanggu, ap ambien wene ambi mamuleraup imbita halok mamulirigya, ap ambi Ala en wene ambi sigam erogo yugugu hegek, yugeraup imbita halok yugirigya, ap ambi en, enane inggut adik-adik menda vaga yugeraup imbita halok yugirigya, ambi, “Anderogo yagas,” yiluk, avut dagalogo yugeraup imbita halok yugirigya, yi ogarup ndi ogarup andi ovogat ogagu dugwit, it Ala aburi enendawi hoda okbisaup ako menda halok adigat ogagu dogones.

²⁷ Hit enane inggut adik-adik menda yagalagwi ako andi, hit heneyave wisane en yup dek. Ata, heneyave mberen a, henggam a, adigat yugu dugwit, hivis-endak yugu hinigik, at ambien wene iri halok, at ambi en, “Yerogo yagas,” yiluk, avut dagalogo yukheregek ogagu dogopwak.

²⁸ Eke, ap, “Anderogo yagas,” yiluk, avut dagalogo yukheraup menda Ala aburi homago henanggelekma andoma eneyave dek halok andi, it enane inggut adik-adik menda yagalagwi ako enanedek, mbauk-at dugwit, enendawima en adigat yugwi, Ala yugugwis, ogagu dogopwak.

²⁹ It ap navi Ala en yugirigya hegek yugerelagwi menda ako eneyave mberen a, henggam a, irenat wene yukhirugu dogopwak. Eke, yukhirugusigik, hit ninen, “Wene yuknerelagwi andi, avyarat yagas a, dek a?” yiluk, dibagu dogones.

³⁰ It yukhirugusigik, ap adik ambi horaik werekma, Ala Averiniki endawima atma des iri dugwit, vagalogo yugugu hegek yup imbita halok, endak yagaliga ako, mbup yupwak. Mbup iri hegek at hivis ako yukherapwak.

³¹ Hit ovogat mamulhidugwi, hit henendawi aik war-wat yugwi, ogagu dogovovok yiluk, Ala yukhirigya hegek hivis-endak adik-adik yugurugu dogop andi segaro.

^32-33 Ala andi nadok-hadok ogasigadek. Ata, avakwa enendawi ugun adenggen dambulik okbisaliga menda Aratma, it navi Ala yugirigya hegek yugeralagwi ako yugeraup oginipu halok, mondok des erogo amor-amor-at ogagu dogones. It Ala aburi adik denek yi awi ndi awi homagu dugwit, ogasagwi ovagak,

³⁴ it akwa halok andi enanedek mbauk dogopwak. Musa wene ako wane-wane, hit homakbaluk dugwit, it akwa andi, enane yegetek, seve yiluk, dogopwak o.

³⁵ Ala aburi wisane homago enanggelekma dugwit, akwa en wene yuguruguselok, enanggadi arup atma, wene ambi it inunggut agya halok, ombokma andenam en hemerisabuk. Enamwa lakluk, enaguni en hemerinipuselok, yugeraup sek o.

³⁶ Ala wene endak wigalagagi ako, adem hit vaga wigalagagi ombasagwi? Eke hit adigat henake yukheragagi atma yiluk, yagalagwi? Anderogo dek.

³⁷ It sanien “An navi Ala en yuknugu hegek yugeraliga menda ai,” ata, “Ala Averiniki nendawima des yagas ai,” yiluk, imbita halok andi, aren “Wene Paulus dirup warogo wokneragagi yi, Nenowa Yesus en yugugu hegek dirup warogo wokneragagi avyarat ai,” yiluk, vagalupwak.

³⁸ Ap ambien an wene yogak dirup warogo wokheraliga yi, “Waup nanggon o,” yiluk, weyak erogo hekbagya halok, hit ogo, at ane weyak erogo hekbas.

³⁹ Anderogo atma, naswei o. Ala en yuknirigya hegek, yugurugu dogop navi ovagak andok okbininapwak en yiluk, umbutu dogones. Eke, it enane inggut adik-adik menda yagalagwi ako, “Moga o,” yiluk, yugerabuk.

⁴⁰ Hit yi ogagek ndi ogagek ogagu dugwit, mondok des erogo amor-amot halok adigat ogagu dogwes.