1 Korindus 13 - ALA WENE HIVIS DIRUP WATUGWA

Enendawi hunik dugwit ogagu dogop wene

¹ An avakwa ininis unggul adik-adik enane nin wisane iris, malaikat menda enane iris, ogagya dugwit ovara, nendawi avakwa hunik okbigitek dugwit iri neyalok, an is owak nudik dekma, ane wulup yagaliga ako wane-wane-at yagaliga higi o.

² An navi ovagak dugwit, Ala ane yugirigya dogogiluk, andok okbaninggya, yi wene ndi wene adem nilup akluk, des erogo yugirigya, wene agose hwilago menda ovok yedok higya, nendawi avyarat imbita dugwit, “Ndom yi heyave adikmu wiklaru o,” yiluk, yugugu neyalok, adikmu wiklari lagya, ogagya dugwit ovara, nendawi avakwa hunik okbigitek dugwit ogagya neyalok andi, an un enam warogo-at agirik higi.

³ Anenen nangge-nangge yi menda ndi menda ovok erogo it ap enangge-enangge dek ako wogirigya, eke, Ala ake yiluk, “Neyave mondok warogo hali napwak yiluk, vakbanimanes o,” yugirigya, ogagya dugwit ovara, nendawi avakwa hunik okbigitek dugwit, ogarisogon halok andi, onggo an ambi hedayogonbuk un enam warogo-at ogarisogon.

⁴ It avakwa enendawi hunik dugwit ogasagwi ako andi, wene onggo hodorogo yugeregetek mbauk agarwik, eke enendawi sagain agarwik. Andi ogagu dugwit an iya hat iya yagalagwidek, enendawi wogobetelagwidek, an iya ombasagwidek,

⁵ enanggadidek heda ogarit lendagwidek, nit adigat sek okhedasogom yiluk embetek nelagwidek, enaninis mbikit wilisigadek, weyak okbugwis ako enendawima wenggelisagwidek. It avakwa enendawi hunik okbiselagwi ako andi, anderogo mondok ogasagwidek o.

⁶ It avakwa enendawi hunik okbiselagwi andi, weyak ogarup enendawi hunik ombasagwidek. Ata, avyarat wene sek erogo ogarit laup adigat enendawi hunik wisane agarwik.

⁷ It avakwa enendawi hunik okbiselagwi ako andi, weyak okbugusigik ovara, enendawi wadokdek dugwit wugwi, enendawi Ala ovaga vanggabaluk, avyarat umbutwi, yi menda ndi menda Ala yagagi ako vaga enendawi vanggabaluk wenggenggwis, yi menda ndi menda okligya halok, enendawi wadokdek dugwit wugwi, ogasagwi ako andi, dek agetek mondok hunik adigat ogasagwi.

⁸ Ala en yugirigya hegek yugurugwi, enane inggut adik-adik menda yugwi, yi wene ndi wene adem inilup agwi, ogasagwi andi, dek arisogon. Dek arisogon ovara, avakwa enendawi hunik oginivisagwi halok andi, dek arisogonbuk mondok-at dogosogon.

⁹ Yogak yi wene ndi wene ninilup andi, nin agako higirek yedok hugwi, eke Ala ane yuknirigya ako nin agako higirek yugurugwi, ogasagwi.

¹⁰ Yogak anderogo ogasagwi ovara, hivis nit mondok sek okbininaup ako vanggo yi wagya halok andi, yogak nin agako higirek yedok helagwi ako, dek agya dugwit, ovogat ninilup arusogom.

¹¹ An avyak maduk dugwit, it avyak mariduk enane yagalagwi wane-wane an nane iris, it ogarup enendawi sek ombasagwi ako an anderogoat imbita, enendawi wenggelisagwi ako wane-wane an nendawi wenggenggu, ogagya lagagis. Ovara, an nendawi werek agya lagagirik, it avyak mariduk enandogon wane-wane dugwit ogagya lagagis ako hekbagagis.

¹² Nit yogak wukagak o hwiserekma, bikhugu dugwit, nenelose des erogo bikhelagudek ako wane-wane, Nenasin elose agur-agut adigat helagwi. Ovara, hivis At eyave ninim avuk agu dogogurik, nenelose heyak-heyak yugup. Yogak an nin agako higirek adigat nilup agirik ovara, Aren an ogasiga ovogat dibaniluk ilup agarik ako wane-wane, an hivis At ogasiga ako ovok dibaluk, nilup arisogon.

¹³ Andi halok, wene adem henggam-at agarik. Ambi andi, nenendawi Ala ovaga vanggabaluk avyarat ombasagwi. Ambi andi, Ala yagagi ako avyarat arugwi atma yiluk, nenape wenggelek agurik. Eke ambi andi, avakwa enendawi hunik oginivisagwi, wene adem henggam andi agarik. Wene adem henggam andi agarik ovara, avakwa enendawi hunik oginivisagwi andi, mondok iya-at agarik.