1 Korindus 12 - ALA WENE HIVIS DIRUP WATUGWA

Nenadigetap ogagu dogop andok okbininaliga wene

¹ Nowa-nasin. Ala Averiniki en nenadigetap ogagu dogop andok okbininaliga ako, hit hinunggut dogoguven yiluk, wene yi yukherayogon.

² Hit endak, Ala wene hunggitek dugwit, huvuwak ane yagaligadek menda hegek, “Anderogo yukneraliga higyo,” yiluk, sup adik nomalogo lagu lagagup ako, hinilup aro.

³ An wene ambi hit hinilup dogovovok yiluk, yukherayogon. Ala Averiniki henendawima dugwit, “Hat Yesus yi, madis inis vaga vudilogo degerogo bagagi o,” yiluk, yugurup mondok meyan. Eke, Ala Averiniki henendawima dek dugwit, “Yesus andi, an Nowa Inis Ombok aro,” yiluk, yup ogo, mondok meyan.

⁴ Ala Averiniki en nenadigetap ogagu dogop andok okbininaliga ako andi, adik-adik wisane agarik ovara, At eyave andi, ambiaren wokneraliga.

⁵ Eke, nit yavup ogasagwi ako andi, adik-adik wisane agarik ovara, Nenasin ambiat eyavup ogasagwi.

⁶ Eke, nit ogarit lendagwi ako andi, elose adik-adik wisane ogarit lendagwi ovara, Ala eyave ambiaren okbinilin lagya hegek ogarit lendagwi.

⁷ Ala Averiniki en nit ovok erogo sek okhedegek lagu dogoguluk, nenadigetap andok okbininaliga atma, ogarit lagu dugwit, andok okbininggigi ako, yedok helagwi.

⁸ Ala Averiniki ambiat akoen ap ambi endawi werek dugwit, wene hologo yugirigya dogopwak yiluk, andok okbaliga. Eke ambi, wene adem ambi ilup akluk, des erogo yugirigya dogopwak yiluk, andok okbaliga.

⁹ Eke ambi, Ala Averiniki en at ambi endawi Ala ovaga vanggabaluk ombok erogo ogagya dogopwak yiluk, andok okbaliga. Ambi, avakwa aup edup halok, sek okbugu dogopwak yiluk, andok okbaliga.

¹⁰ Eke ambi andi, nggarogo ogarubuk menda ogarit lagya dogopwak yiluk, andok okbaliga. Ambi, Ala en yugugu hegek At ane yugirigya dogopwak yiluk, navi ovagak andok okbaliga. Eke ambi, avakwa en yagalagwi ako, “At andi Ala Averiniki endawima dugwit yagaliga a, ata madis endawima dugwit yagaliga a?” yedok higya dogopwak yiluk, andok okbaliga. Ambi, enane inggut adik-adik menda mbikit yugu dogopwak yiluk, andok okbaliga. Eke, at ambi enane inggut menda irisim, at ambi aruk hobaluk, “Adem anderogo yagas,” yiluk, it enane vaga avut dagalogo yugirigya dogopwak yiluk, andok okbaliga o.

¹¹ Anderogo okbininaliga ovok erogo At Ala Averiniki eyave ambiaren At endawi ombasiga wane-wane-at nenadigetap andok okbininaliga.

Nit Keretus inggis-isok agurik wene

¹² Nininggis-ninisok bagagi andi, wisane-at agarik ovara, neneyave ambiat agarik andi wane-wane, Keretus eyave ambiat ovara, At inggis-isok ovagak nit wisane-at agurik o.

¹³ Anderogo atma, nit Yakuri menda inim, hit weram Yakuri dek menda inim, hit avakwa enayeloman onggo hunik menda inim, enayeloman dek ugun agarwik menda inim, Ala Averiniki ako vaga en nit ovogat ima wombabinunggusim neneyave ambiat dambubininggigi. Eke, is liris ambiat nelagwi ako hak, At Ala Averiniki eyave ambiat nit ovok nenendawima mabininggigi.

¹⁴ Anderogo atma, nit avakwa neneyave andi, nininggis ambiat agarikbuk. Ovara, nininggis ninisok bagagi wisane erogo neneyave ambiat vaga adigat hunik agurik.

¹⁵ Andi halok, wene wakhegek vaga ambi yukherayogon. Ap ambi isok en iri dugwit, “An andi, at inggis menda dek atma, at eyave vaga hunik degat agirik,” iri halok, at eyave vaga hunik dek ombasagwi? Dek o.

¹⁶ Eke, aruk en iri dugwit, “An ogo, at il menda dek atma, at eyave vaga hunik degat agirik,” iri halok, at eyave vaga hunik dek ombasagwi? Dek aro.

¹⁷ Neneyave ovok erogo andi, ninil adigat ogaklipmu en nggarogonggan en nenaruk hunggu duklu ombasagwi? Eke, neneyave ovok erogo andi, nenaruk adigat ogaklipmu en, nggarogonggan en yi menda ndi menda amben hugu duklip ombasagwi? Anderogo dogop meyan o.

¹⁸ At Ala en endawi wenggenggu lagagirik, nininggis ninisok bagagi adik-adik ninunggumu en adik-adik hubininggik yagamu ninisokmu wombabagagi.

¹⁹ Nininggis-ninisok bagagi andi ambiat duklip en, nano vaga hunik duklip ombasagwi?

²⁰ Dek o. Nininggis ninisok bagagi andi, wisane-at ovara, neneyave ambiat andi vaga-at hunik agarik o.

²¹ Andi halok, nit ninil akoen nininggis yugugu dugwit, “Haren ambi okbanup dek atma, nanggon o,” yugugu, eke, ninunggul en ninisok yugugu dugwit, “Haren ambi okbanup dek atma, nanggon o,” yiluk, yugugu, ogarup sek ombasagwi? Anderogo yup dek aro, naswei.

²² Nit neneyave andi, nininggis-ninisok bagagi nin ako andi, anyedek ombasagwi ovara, dek halok andi, neneyave adik en ogagya dogop meyan atma, andi menda mondok iya aro.

^23-25 Nit nininggis-ninisok bagagi andi nin elose sek halok, un hekbelagwi ovara, nin elose weyak halok, sek erogo bagwi, nin nenanggadi arugwi en yiluk, nenasum vaga lovat hidugwi, ogasagwi. Nininggis-ninisok ambien ambi abwa ogagek, ambien ambi abwa ogagek, ogagu dogopwak yiluk, At Ala en neneyave ogarogo bininggigi. Eke, nininggis-ninisok ogorek dogoguven yiluk, elose weyak halok, sek erogo wet okhidugu dogopwak yiluk, ogarogo bininggigi.

²⁶ Anderogoat ogarogo bininggigi atma, hininggis anggangga ambiat mbaliga halok, heneyave ovok erogo edup okhinivisiga. Eke, ambi elose sek atma, avakwa en, “Vok,” yukhuruguselok, heneyave ovok erogo adenggen asiga.

²⁷ Andi wane-wane, hit heneyave dambup erogo andi, Keretus eyave-at. Eke, hit henadigetap ogasagwi andi, Keretus inggis-isok wane-wane-at agipik o.

²⁸ Eke, Ala en At aburi wonggalek agarwik enanggelekma en endak lakbigik menda denogo bugu, eke, it enavema navi Ala en yugirigya hegek yugerelagwi menda denogo bugu, eke, it enavema Ala wene mamulerelagwi menda denogo bugu, eke, it enavema nggarogo ogarubuk menda ogagwi, avakwa edup sek okbugwis, yonggar-inupwis, wene hologo bugwis, enane inggut adik-adik menda mbikit yugwi, nenadigetap ogarit lagu dogopwak yiluk, andok okbugu lagagirik, mondok okbogogi.

²⁹ Anderogo ogarit lagu dogopwak yiluk mondok okbigigirikmu, it ovok erogo lakbigik menda dogopwak yiluk, denogo bogogi ombasagwi? It ovok erogo At Ala en yugirigya hegek yugurugu dogopwak yiluk, navi mondok okbogogi ombasagwi? It ovok erogo mamulirugu dogopwak yiluk denogo bogogi ombasagwi? Ata, it ovok erogo nggarogo ogarubuk menda ogagu dogopwak yiluk, imbitigi ombasagwi?

³⁰ It ovok erogo edup halok sek oginipu dogopwak yiluk, yugeragagi ombasagwi? It ovok erogo enane inggut adik-adik menda mbikit yugu dogopwak yiluk, denogo bogogi ombasagwi? Ata, ovok erogo at ambi enane inggut menda irisim, at ambi aruk hobaluk, “Adem anderogo yagas,” yiluk, it enane vaga avut dagalogo yugurugu dogopwak yiluk, okbogogi ombasagwi?

³¹ Dek o, naswei. Ala en nenadigetap andok okbininggigi atma, yukheraliga. “Ala en nit At eyavup ogagu dogop andok okbininaliga menda ako, eve mondok iya menda andok okbigigapwak yiluk, At yugugu dogones o,” yiluk, yukheraliga ovara, wene ambi mondok iya erogo ogagu dogop ako yukherayogon o.