1 Korindus 1 - ALA WENE HIVIS DIRUP WATUGWA

^1-2 Hit Ala aburi o Korindus homarisagwi ako, nowa-nasin wa. An Paulus Ala endawi imbitigi vaga Keretus Yesus en neyanggup iri lagagirik, lakbigik menda okbaninggigi ako, nenaswe Sotenes niperen en, wene yi dirup warogo henadema lakba wendagwi. Hit o Korindus menda Ala en heneyanggup iri lagagimu, Nenowa Keretus Yesus hinim hunik werekma, Ala en At aburi adik denogo betagagirikmu agipik. Anderogo dugwit, avakwa yi awi ndi awi andoma en, it inim, nit ninim, Nenowa Inis Ombok Yesus Keretus inis yagalagwi menda hinim ovok erogo wene yi dirup warogo henadema lakba wendagwi andi aro.

³ Nenasin Ala Nenowa Inis Ombok Yesus Keretus iperen henabwa en okbugugwis, hit henendawi ugun seyalek adenggen dogovovok yiluk, okhinipwis, ogagu dogopwak o.

Paulus en Ala “Wa,” yiluk, yugogogi wene

⁴ Keretus Yesus hinim hunik halok, Ala henabwa en sek adigat okbigigaliga andi vaga, anen o hutun howam, Ala, “Wa,” yiluk, hai warisiga.

⁵ Hit Keretus hinim hunik hiniselok, Ala en yi menda ndi menda ovok erogo andok okbigigirikmu agipik. Anderogo dugwit, Ala wene yi adem ndi adem hinilup agu lagagupik, yi wene ndi wene mondok sek erogo yagalagwi.

⁶ Andi vaga, wene Keretus avok yukheragagis ako, wokbaluk, henendawima eve des erogo yakbagagirikmu agipik.

⁷ At Nenowa Yesus Keretus wagya haoen abyam hinigik, Ala en sek adigat okbigigaliga ako, okbugugu dugwit, ambi mondok hekbigigitek wane-wane-at okbugugu haliga.

⁸ At Nenowa Yesus Keretus warup hudi vaga hit weyak ogagetek sek werekma hinisa warupwak yiluk, yogak en mbikit, hivis At warup hudi vaga henendawi mondok wadokdek dogovovok yiluk, okbugugu dogosogon.

⁹ At Ala en At Abut Nenowa Inis Ombok Yesus Keretus hinim hunik dogoguluk, heneyanggup yukheraliga. At Ala akoen mondok atma nggedok des erogoat ogasigama, henendawi At ovaga vanggabaluk, mondok wadokdek dogovovok yiluk, okbugugu dogosogon.

Ala aburi enendawi hunik dek werekma yugeragagi wene

¹⁰ Nowa-nasin. Nenowa Inis Ombok Yesus Keretus inis vaga, an wene ambi henaruk warisogon. Hit henendawi mondok dambulik dugwit, ogarit lagu dogovovok yiluk, yukheraliga. Hit naburuk-haburuk yugu dugwit ogot hedelagwi ako mbobaluk, henendawi henane ambiat akluk ogarit lagu dogones.

¹¹ Nowa-nasin. Wene andi, it avakwa hwa Kelowe amwa en wagu lagarwik, yuknugu dugwit, “It avakwa andoma, ir-it winimuk yagalagwi o,” yiluk, yukniri wagu lagaoma, yukheraliga.

¹² Hit ninen yugu dugwit, “An nasin Paulus,” yugwi, hit ninen, “An nasin Apolos,” yugwi, ninen, “An nasin Kepas,” yugwi, eke ninen andi, “An Nasin andi Keretus,” yugwi, yugu dugwit, henadik-henadik enhedelagwi naruk hunggu lagirik, yukheraliga.

¹³ Hit anderogo yagalagwi andi, At Keretus eyave mberen-henggam agarik yiluk, yagalagwi? An Paulus henake yo winik vaga natugwa ombasagwi? Eke, hit an ninis vaga ima wombagagup ombasagwi? Mondok dek.

^14-15 Hit ninen yugu dugwit, “Nit Paulus inis vaga ima wombagagup,” yiluk, yugu hinisaoen, anen hit ovok ima wombabigigitek. Ata, it ap Kiripus Nggayus iperen enadigat ima wombabogogis atma, “Wa,” ombasiga.

¹⁶ Eke, at Sepanus aburi inim andi ogo, ima wombabigigis ovara, it ninen “Paulus ima wombabininggigi,” yagalagwi ako dek ai? An ninggut.

¹⁷ At Keretus en avakwa ima wombabisilin lagya dogogiluk, an lakbani wagetek. Ata, Sek Wene yugeregek lagya dogogiluk lakbani wagagi. An Sek Wene yugeraliga ako andi, Keretus yo winik vaga watugwa ako, un enam warogo hombagagi umbutu inisaoen, an it avakwa wen vaga menda enendawi wenggebaluk yagan nelagwi hak, an anderogo yugeregek landigadek.

“Ala anye inim, endawi werek inim, andi Keretus aro,” yugeragagi wene

¹⁸ It avakwa enelokwe degerogo bisayogon akoen Yesus yo winik vaga hombagagi wene ako hobaluk, “Yi ap wes enane ovagak yagan nelagwi o,” yiluk, enaganda yasagwi. Anderogo ovara, nit nenagap wendakninivisiga menda akoen, wene andi, welagwi vaga, Ala nenagap wendakninivisigama, “Wene andi, Ala anye menda-at helagwi o,” yiluk, ombasagwi.

¹⁹ Andi, Ala wene endak warek ako vaga, At Ala en iri dugwit: “It ap enendawi werek en enendawi werek dugwit, yagan nelagwi ako, Anen degerogo bugu, eke, it ap enendawi anggat menda akoen, enendawi anggat dugwit, yagalagwi ako, enendawi apik erogo bugu, ogasogon,” yiluk, Ala en yagagi ako dirup warek agarik.

²⁰ Dirup warek agarik atma, it avakwa enendawi werek ako inim, it yi wene ndi wene adem inilup menda inim, eke, yi adem ndi adem dombalisagwi menda ako inim, un enam warogo ogasagwi. It wen vaga menda en, “Nendawi werek dugwit, yagaliga o,” yiluk, yagalagwi ako, At Ala en, “It ap wes ovagak dugwit ogasagwi,” ombasiga hegek, yagalagwi ako dek?

²¹ At Ala endawi werek en iri dugwit, “It avakwa wen vaga menda nenendawi werek ombasagwi ako enendawi wenggelit nelagwi vaga, An yedok neyasogom mondok dek. Ata, it ap An nane yugerelagwi menda ako, avakwa en, ‘Andi ap wes enane ovagak,’ yiluk, umbutusigik ovara, it ninen wene ako avyarat umbutuselok andi, enagap wendarisogon o,” yiluk, Ala en ombasiga atma, yukheraliga.

²² It ap Yakuri menda en, “Nenendawi dibaugen yiluk, nggarogo ogarubuk menda ogagu hiniselok, ninil helok avyarat ombarusogom yiluk, ogarubuk menda ogaru,” yiluk, yagalagwi. Eke, it Yunani menda akoen, “It avakwa enendawi werek menda enane yuguselok, dibaluk, avyarat ombarusogom o,” yiluk, yagalagwi.

²³ Anderogo yagalagwi ovara, nit andi, Keretus yo winik vaga watugwa wene ako adigat vagalogo yugerelagwi. Wene andi, it Yakuri menda en hobaluk, “Wene yi yagalagwi vaga yidilogo bininaliga atma, waup nenanggon,” yiluk, yagalagwi. Eke, it weram Yakuri dek menda en hobaluk, “Andi ap wes enane ovagak higyo,” yiluk, yagalagwi.

²⁴ Anderogo yagalagwi ovara, nit Ala neneyanggup yukneragagi Yakuri menda inim, Yunani menda inim, akoen wene andi hobaluk, “Ala anye inim, endawi werek inim, andi Keretus aro,” umbutu dugwit, yugerelagwi.

²⁵ Wene andi, Ala awene ovara, it avakwa wema menda en, “Wene andi avakwa wes menda en yagalagwi hak,” yiluk, yagalagwi ovara, At Ala endawi mondok werek en yagagi. It avakwa enawene enendawi werek en yagalagwi andi, enendawi apik en yagalagwi. It avakwa wema menda en, “At Ala anyedek,” ombasagwi ovara, At anye wisane. Eke, nit avakwa en, “Nenanye wisane,” ombasagwi ovara, nenanyedek.

²⁶ Nowa-nasin. Ala en ao yanggup yukheregetek hegek endak welagagup ako henendawi dibas. It ap enendawi werek menda inim, enagayuk werek menda inim, ininis siyalek menda endago inim, it ap wen vaga menda en, “Wi! Iya!” yiluk, enombarisagwi menda ako inim, hit avakwa wisane anderogo menda hiniselok, heneyanggup yukheregetek.

²⁷ Ata, it ap, “An nilup nendawi werek,” embetek nelagwi ako, enanggadi arupwak yiluk, At Ala en it avakwa enendawi apik menda enombasagwi ako miginipigi. Eke, it enagayuk werek siyalek agarwik menda ako enanggadi arupwak yiluk, it avakwa sovalek menda-at miginipigi.

^28-29 It avakwa en Ala ivaga wogobetugu saoen, it o wen vaga yoma agarwik mondok iya ombasagwi ako, degerogo bisagiluk, ogagagi. Degerogo bisagiluk ogagagi ako andi, Ala en ininis dek menda inim, eneyave meyan enombasagwi menda inim, meyan ombakluk mbobiselagwi menda inim, avakwa andi menda halok miginipigi.

³⁰ At Ala enat nit Keretus Yesus ninim hunik okbininggigirikmu agurik. Ninim hunik dugwit, At Keretus ogagagi vaga At Ala endawi mondok werek yedok helagwi. Nenendawi sek erogo okbininggu, Ala aburi At ake dogoguluk, denogo bininggu, eke, heda marek welagagup ako, nenonggo mbalogo baluk, heda visilogo bininggu, ogagagi ako andi, Keretus aro.

³¹ Anderogo atma, Ala wene endak dirup warek ambi iri dugwit: “Ap ambien wene siyabaup imbita halok, Nenowa Inis Ombok en okbininaliga wene ako adigat siyabagu dogopwak o,” yiluk, yagagi wene endak dirup warek ako wane-wane-at siyabagu dogones.