ZEKHARIAH 9 - Ngawm Bible

Elkim Miphun Humah Thukhennak

¹ Topa i awnkam cu hi bangin hi. Hadrak ngam le Damaskas khuapi dantat tukin thukhen cat zo. Israel miphunte bek hi ngawlin Siria ngam khuapi vang Topa ta hi.

² Hadrak ngamngi a ummi Hamath khua vang amata hi a, mahti bang lelengin, Taiar khua le Sidon khua vang a thil thiamnak haw tuah Topa ta hi.

³ Taiar khua cu kulhtian nase zetin, a bawl tawtok haw i humah sui le ngun tamzet khawlin, a tam dan cu buakseh bang cang thong hi.

⁴ Mahnaven Topa in Taiar khua i neihmi hempoh cu laksak khawng tuk hi. A hauhnak hempoh haw cu tuipi sungah vawk sak khawng tuk a, mah khua cu mei tuah halvam tuk hi.

⁵ Ashkelon khua ten amuh haw ten lauzet haw tuk hi. Gaza khua in mu bok tuk a, thasiazet tuk hi. Mahti bangin Ekron khua vangin mu bok tuk a, muansannak a neihmi hempoh bo khawng tuk hi. Gaza kumpi vang bo tuk a, Ashkelon cu khing diudeu tuk hi.

⁶ Ashdod khua ah miphun tokhelnokin umleh haw tukma toh hi. Topa in, “A pualthau zetmi Filistin mite cu nautabelin khesuk tung ti hi.

⁷ Sa cu a thisan tuah eicihleh haw tukma toh hi, kham mi an vang eileh haw tukma toh hi. A tang calam cu ka miphunah tel bok haw tuk a, Judah hinnam sungah hinnam khat bangin cang haw tuk hi. Jebus mite bangin Ekron mite vang ka miphunin cang haw tuk hi.

⁸ Ka ngam cu cingkhawi in, a sungah a koi ngalkap hei hawh thei haw tukma hi. Hehpihnak nei ngawl ngamuktu kuamah in ka miphun nuainemleh haw tukma toh hi. Ka mihing tei thuaknak mu khawng zo ing,” ti hi.

A Heng Tukmi Kumpi

⁹ Lungdam un, Zion mite, na lung uh dam un! Jerusalem mite aw, lungdamin au leilui un! Na kumpipa uh a hun laihin, zo un! Ngalnehtu a hih uh hangin nehnak tuah hung hi, mahnaven mi niamkhiatnak tuah laak dawnno, laak cano hum khungin hung hi.

¹⁰ Topa in, “Israel pen ngaldonak cipuhlengte vawk tung. Jerusalem pen cipuh ngalkapte laksakin, thalte cu siatsuah khawng tung hi. Na kumpipa uhin miphun hempoh tei nelah lemdaihnak bawl tuk hi. Langlam tuipi pen lang khatlam tuipi tiang uk tuk hi. Eufrates ngunpi pen leimawk khatlam tian uk tuk tin,” ti hi.

Pathian i Mihing Tei Kihlehnak

¹¹ Topa in, “Biakpiaknak thisan tuah kipkhotikmi nangmuh tuah ka thutiamnak bangin, Na mihing uhte cu suakcatik tung; saltannak mun, tui um ngawl khuk sung pen suakcatik tung hi.

¹² Kikleh un, muansannak neitu saltangte! Himnak mun nangmu ngamah kikleh un; Atu-in hilh ing hi: haksatnak na thuak uhmi hangin a let nihin muicu pialeh tung hi.

¹³ Judah cu ngalkap tei thalkung bangin mang tung a, Israel cu thalcang bangin mang tung. Zion mite cu ngalnam bangin mang tung a, Grik mite dotu tukin,” ti hi.

¹⁴ Topa cu a mihing tei humah langin; a thalcangte khuaphelep bangin kap tuk hi. Cungnungbel Topa in, a pengkul cu tumin; Hanglam huihpi sung pen hawh tuk hi.

¹⁵ Cungnungbel Topa in, a mihingte panin; a ngalte siatsuah khawng tuk hi. Ngaldonak mun pen zukham bangin au beibuai haw tuk a, ngalte thisan luangtik haw tuk hi. Mah thisan cu biaklandawhah a ummi kuang sung pen leihmi, biakpiaknak thisan bangin luang tuk hi.

¹⁶ Mah ni a kim ten, Topa in, a mihingte pan tuk hi. Tuucingtu pa in, a tuuhonte launak sung pen a pat bangin; sui lukhuh hum a, suang manpha bangin, a ngam sungah vak haw tuk hi.

¹⁷ Izahta ngampha le ngam mawi hi tuk nan tim! Vainim le sabit ei in, a khangnote cu n gilzet haw tuk hi.