ZEKHARIAH 7 - Ngawm Bible

Lungmu Tel Ngawl An Cannak

¹ Darias in kumpi a deh kum linak kum, ha kuah ha, ni li ni-in, Topa i thu cu ka nelah heng hi.

² Bethel mipi ten Sharezer, Regemalek le amu mihingte cu Cungnungbel Topa i Biakinn ah Topa i muicu ngen tukin le,

³ thiampi le profet tei lakah thudong tukin hawh haw hi. A thudot haw mi cu, “Biakinn pi siatsuah khawng a hih hangin, kum tampi sung ka bawl zo uh bangin ha nga ha ten an cangin thasia le khawngai in umlaih ni ung maw?” tin dong haw hi.

⁴ Topa i thu cu ka nelah heng hi.

⁵ Topa in, “Hi ngam a mihing le thiampite cu hilhin: kum sawm salih sung, ha nga ha le ha salih ha an cangin, a taulih haw cu keimah a upat haw hang hi kha ma hi.

⁶ Tui le an a in, a eih haw ten hei in, amu deih thu poh hi.”

⁷ Jerusalem cu khangto le neinung zetin umin, mihing tampi a umlaih hun haw le khua elkim tei lakah mi tampi a um haw bek sial ngawl, hanglam ngam le nitumnak lam mualbulah mi tampi a um haw laihin, hi bangin Topa in, tanglaih profet mangin, a hilhsa mi hi.

Topa i Thu Zui Ngawl Hang Saltang

⁸ Topa in, hi thu cu Zekhariah nelah hilh hi.

⁹ Tanglaihin, hi thutiamte cu ka mihing nelah pia ing. Cam zetin thuson unna, pa khat le pa khat humah hehpihnak le itdunnak nei ta un.

¹⁰ Meivongte le ca-ngah siat theite, nangmu lak a, um ngamdang mite le mi haksate nemsuk pahsuh un. Pa khat le pa khat siatsuahdun tuk vang tum pahsuh un, ti ing.

¹¹ “Mahnaven ka mihingte cu mi lunglian leita haw in, ka thupiakmi hei zui nuam viang haw ngawlin,

¹² a lungmu haw cu suangtum bangin cang hi. Kum ngeipi laih a, ka hahmi profet tei thuzilhmite a ngaih nuam haw ngawl hangin amu humah ka thinukzet ing.

¹³ Thu ka hilh ten a ngaih nuam haw ngawl hangin amuh vang thu a nget haw ten ngai nuam bok mang.

¹⁴ Huih siapi bangin nawtvawkin, ngam dadangah lengkektik khawng ing. Hi tihzah ngampha sungah kuamah um ngawlin ngamko in cang zo tin,” ti hi.