ZEKHARIAH 4 - Ngawm Bible

Mei-inn Khuam Muhnak

¹ Ka nel a, thuhilh litu vancungmi cu hunglehin, a hihbu mi phong bangin phong hi.

² “Imu cim? tin dong hi.” “Sui tuah bawlmi mei-inn khuam mu ing.” A humah meitui koihnak kuang um hi. Meitui kuang humah mei-inn salih um hi. “Mei-inn le meitui kuang pehdunnakah mei ca khuam salih um hi.

³ Mei-inn khuam elah olif thingkung pa nih, a pang veve ah a um cu mu ing, tin donleh ing.”

⁴ vancungmi lakah, “Hi thil tei a sullam cu ihum, Topa?” tin dong ing.

⁵ “Amah in, a sullam thei ma cim?” a tih ten, “Thei mang,” tin donleh ing.

^10b Vancungmi in, “Mei inn salih cu leihum khua hempoh amu theitu Topa i mit salih tihnak,” ti hi.

¹¹ Mahten keimah in, “Mei inn umnak pang a ummi olif thingkung pa nih i sullam i hum?

¹² Olif thau luannak sui a bawlmi dawng pa nih el a, olif thing kak pa nih i sullam cu i hum?” tin dong leleu ing.

¹³ Amah in, “A sullam thei ma cim maw?” tin ti hi. Kei in, “Topa thei mang tin ti ing.”

¹⁴ Amah in, “Hi mite cu leihum buppi i Topa, Pathian i tenmi le sathau a thihmi mihing pa nihte haw tin hilh hi.”

Zerubabel Nelah Pathian Thutiamnak

⁶ Vancungmi in, Topa i nel pen a hengmi thu cu Zerubabel hilhtik hi. Topa in, “Hiamnam cahnak le nangma ngilnak hang hei hi ngawlin ka hawvang tuah lawhting tuk ci.

⁷ Na mai ah khaktu mualpi tia a um vangin pha thong khawng tuk hi. Biakinn cu tungdingleh tuk ci a, biakinn saknak a dawlbel suang na tian uhten mipi ten mawizet hei, mawizet hei, tin au haw tuk tin,” ti hi.

⁸ Topa i thu cu ka nelah heng lehin hi.

⁹ Biakinn tawphah cu Zerubabelin tiang pan zo toh a, sa suak tuk hi. Mah hun a kim ngangai ten, ka mihing ten amu nelah, nangmah a hahtu cu keimah ing hi tihmi thei haw tuk hi.

^10a A Biakinn sak nadeh cu thung viang ma hi tih a theih haw ten a thasiazet haw tuk hi. Mahnaven Zerubabelin Biakinn cu teima zetin sa li hi tih amuh haw ten a lungdam lehzet haw tuk tin,” ti hi.