ZEKHARIAH 10 - Ngawm Bible

Topa i Patnak Thutiam

¹ Topa i nelah ha thak ten nguahzu tuk ngen un. Mi hempoh tei lo ngam hingtiktu, nguahtui le meingo a umtiktu cu Topa hi.

² Mihing ten milim le mipolte thudong haw naven a hilhmi haw cu phukthongin, zolthu ngeh poh hi. Mi khenkhat ten manglet bok haw naven zolthu tuah hawhpih haw hi; lungmu nemnak tuah a ot haw mi cu nemcuamnak imah nei ma hi. Mah hangin mipite cu a paimi tuu bangin vakvai haw hi. Puitu a neih haw ngawl hangin haksatnak tawk haw hi.

³ Topa in, hi bangin ti hi. Ka mihingte a uktu ngamdang tei humah ka thinuk ing. Mah hangin dantat tung hi. Judah mite cu keima ta a hih haw hangin, Cungnungbel Topa keimah in cingkhawi tung. Amuh cu a ngil zetmi ka ngaldonak cipuh hi haw tuk hi.

⁴ Amu sung pen mi uktute, mi puitute le ngal bawite suak haw tuk a, ka mihingte uk haw tuk hi.

⁵ Lampi cinciak lakah a ngalte a tanpek litu ngalkapte bangin Judah cu nehtu hi haw tuk hi. Topa cu amu nelah a um hangin ngaldo haw tuk a, ngal tei cipuh ngalkapte vang neh haw tuk hi.

⁶ Judah mite cu mi ngil zetin bawl tung a; Israel mite pan suak tung hi. Amu humah hehpihnak nei in, amu khua le ngamah pui kikleh khawng tung. Ka lawl awng ngawlmi miphun bangin ngaisung tung hi. Kei mah cu a Topa Pathian ka hih hangin, a thu ngetnak haw cu ngai tung hi.

⁷ Israel mite cu ngalkap bangin ngil zetin, sabittui in bangin a lung haw nop tuk hi. A casuan ten hi nehnak cu cing leleng haw tuk a, Topa i thil bawlmi hangin a lung haw dam tuk hi.

⁸ “Ka mihingte sam tung a, munkhatah cawm khawm tung hi. Pan suakin, amasa bangin mi tam zetin pungzaileh haw tuk hi.

⁹ Miphun dang tei lakah lengkek zo haw naven ngam khawlapi cawng pen keimah cu thei haw tuk hi. Amuh le a cate vang suakca in, a khua le a ngam tekah kikleh ten haw tuk hi.

¹⁰ Izipt ngam le Assiria ngam pen pui kiklehin, amu ngam sungah cennak tuk mun bawlsak tung hi. Gilead le Lebanon ngamah cengtik tung a, ngam buppi ah mihing dim haw tuk hi.

¹¹ Haksatnak tuipi a kaltan haw ten Topa keimah in tuihualpi cu vat tung a, Nail ngun thukpi cu kang khawng tuk hi. A pualthau zetmi Assiria cu zakca zetin, a ngil zetmi Izipt cu a huham bo tuk hi.

¹² Ka mihingte ngil zetin bawl tung a; keimah bia in, ka thu zui haw tuk hi.” Topa in hilh zo hi.