TITUS 1 - Ngawm Bible

¹ Pathian nadektu le Jesuh Khrih kamtai palai keimah Paul in laikuat ing. Pathian in, a tenmi a mihing tei umnak haw kho deuhtik tukin le eimu biaknak thudik sungah pui tukin, Pathian in tengin hah hi.

² Mah a biaknak uh cu kumkhua nunnak muansannakah bulphuh pha mi hi. Zolthu son awng ngawl Pathian in hi nunnak cu leipi a bawl laih ngawlin a tepsami hi in,

³ a hun kim ten mahmi cu a Thuthangpha sung pen langtik hi. Mahmi cu ka lakah pia in, pantu Topa i thupiaknak bangin phuang ing.

⁴ Upnak bangve a neih uhmi sungah ka ca ngangai a himi Titus, na lakah hilai hi ngan ing. Pa Pathian le Nunpantu Khrih Jesuh in hehpihnak le lemdaihnak thupha pia tahen.

Khrit Tuikulh Pen Titus i Nadehnak

⁵ Crete ah deh kulmi deksuak tukin le khua hempoh ah pawlpi upa koih tukin Khrit tuikulhah ka tanhihnak hi. Ka thu zilhmite cing lelengin hi.

⁶ Pawlpi upa cu mawhsiatnak a nei ngawlmi; zi pa khat bek neitu; a cate cu thu umtu hi loli haw henna, pualthaunak le thu ngaihngawlnak lamah thangsia ngawlmi hi haw hen.

⁷ Itahim titale pawlpi lamhuaitu cu Pathian na dehvo a neitu a hih hangin mawhsiatnak tuk a nei ngawlmi hihen; mi pualthau le mi thincom, zukham misil, mi ngilo le sum deih leita mi hi ma hen.

⁸ Mikhual le danglengte zothiamtu hi henna, thilpha a ngai na mi hihen. Amah le mah ukdun theitu hi henna, midik, mi thiangtho le ziaza pha mi hihen.

⁹ A upnak uh a bulpi tuah a khawthu mi le muantak zetmi a thuthangpha khim zetin, a pomtu hihen. Mahten midang khi a zilh uhmi thupom tuah thazaang pia thei tuk a, mah thuman a eltu tei khialhnak vang langtik thei tuk hi.

¹⁰ Uk theih ngawl mi tampi um a, mahmi cu Judah biaknak pen Khristian biaknak a tummi sungah tam cuang haw in, zolthu tuah mi tampi zol haw hi.

¹¹ Mahmi cu kham kul hi. Itahim titale zilh tuk ngawlmi a zilh haw hangin innkua tampi buaitikin, a zilhnak haw cu zahcakhuai zetmi sumpai deihnak thong hangin hi.

¹² Amu Krete mi lala profet ahi bokmi in, “Krete mite cu zolthu sonmi haw hi, ngamsa bangin mipha ngawl, mi thazawng le longaak haw hi,” tin ti in,

¹³ mahtin a tihmi cu a manmi hi. Mah hangin a muhte cu nase zetin liat inna, mahten upnak dik nei haw tuk hi.

¹⁴ Judah mitei neihmi tangthu thawthong le thutak a eltu tei a ken haw mi mihing tei thukhamte sial tuk ngawlin thutak hilhin hi.

¹⁵ Mi thiangtho tei ca in, ihempoh hi a thiang khawng hi. Mahnaven mi nawngkai le umngawltu tei ca in, a lungmu haw a nawngkai hangin a thiangmi imah umma hi.

¹⁶ Amuh ten Pathian theitu ung hi tiduncop haw hi. Mahnaven a deh le a bawlnak haw in zuileh ma hi. Mitkem hahzet le thu ngai ngawlmi haw hangin iti bang thilpha bawltu tuk hei in tak haw ma hi.