THUPAUCAP 8 - Ngawm Bible

Cihnak Pahcoihnak

¹ Ngai in! cihnakin samin, theih theihnakin mitei zak tukin au li hi.

² Lampi el muallek humah hei in hihen, lamkak hempoh ah hihen cihnak cu ding hi.

³ Khuapi tumnakah hei hihen, tumnak kongkapi el hei pen hihen, dingin cihnakin,

⁴ Leihum mihing hempoh nohtei lakah hehpih kun ing, leihum a ummi hempoh sam ing.

⁵ Ngaihsutnak piting ngawlte, ngaihsutnak piting tukin cung un. Misilte ngaihsutnak pha cung un.

⁶ A manpha mi ka thu ngai un, ka hilhmi thu hi dikzet hi.

⁷ Ka hilhmi hi thudik hi. Zolthu cu hua ing.

⁸ Ka muk pen a tulmi thu hempoh cu thuman hi. Pui sualnak le thudik ngawl umma hi.

⁹ A theiciantu tei ca in ciang khawngin, cihnak a mutu tei ca in man khawng hi.

¹⁰ Tangka sangin ngaihsutnak ka piakmi hi teng saw in, sui phabel sangin cihthiamnak teng saw in hi.

¹¹ Keimah cu cihnak ing a, suang manpha sangin pha saw ing. Na deihmi thildang tuah hei in tehkip theih tukma hi.

¹² Keimah cu cihnak hi ing a, theihciannak vang hi ing. Theihnak le thu khenkhuai thiamnak nei ing.

¹³ Topa kihcaknak cu sual huatnak khi hi. Uangkhonak le pualthaunak sualnak lampi le awnkam pha ngawl hua ing.

¹⁴ Tuptah hamnak nei ing a, deksuak khawng ing. Theih theihnak nei ing a, ka tha vang ngil hi.

¹⁵ Ngam uknakah kumpite bawm ing a, uktute uknak daan pha bawl tukin bawm ing.

¹⁶ Leihum ngam uktute, ngampi nadektute, uknak lam upa cu keima bopnak tuah ngam uk haw hi.

¹⁷ Keimah a ittu cu it bok ing a, keimah a zeitu in mu tuk hi.

¹⁸ Hauhsaknak le minthannak hei hihen khantohnak le nehnak hei hihen kata hi.

¹⁹ Ka lak pen na ngah mite cu, a phabelmi sui le ngun sangin pha saw hi.

²⁰ Diknak lampi ah hawh ing a, lamdik zui ing.

²¹ Keimah a ittu tei lakah hauhnak pia ing a, a inn haw cu thil manpha tuah dimtik ing.

²² Topa in tanglaihin, a bawlmi sung pen, kei cu a bawl masakbel mi ing.

²³ Leipi a pian laih ngawlin kei cu a masabelin, a bawlmi ing.

²⁴ Tuipi thuanthum le luituite a um laihngawlin kei cu um zo ing.

²⁵ Mual le luamte a um laihngawlin kei um zo ing a,

²⁶ Leipi le lo ngamte a masabel a, bawlmi leivulno hei Pathian in, a bawl laihngawlin kei cu bawl zo hi.

²⁷ Van a bawl laihtak le tuipi thuanthum mawk kim a bawl laih takin kei um zo ing.

²⁸ Meingote vanah a koih laihin le tuipi thuanthum tei tuinak a bawl laihin le,

²⁹ Tuipite a putnak haw sangin a sangsawah kai tuk ngawlin thu a piak laihin keimah um bok ing. Leipi a bul a phut ten keimah um bok ing.

³⁰ Inn luangzingtu thil thiampa bangin a elah um ing. Nisial a lungdamnakbel cu keimah hi ing a, a mai ah ka lungdam leleng ing.

³¹ Leipi le a hum um mihing tei humah, ka lungkim ing.

³² Ka cate aw, ka hilhmi thu hi ngai un, ka hilhmi bangin dek unna, na lung uh dam tuk hi.

³³ Ka zilhmi ngai unna, cih cung un, hi thu hi thupi sa ngawlin um pahsun.

³⁴ Ka thu ngai in, nisial ka kongbiangah umin ka inn sung tum tukin a ngaktu cu a lungdam tuk hi.

³⁵ Keimah a mutu cu nunnak co haw tuk a, amu humah Topa a lungdam tuk hi.

³⁶ Keimah a zei ngawltu cu amu nunnak a siatsuahtu na hi haw hi. Kei a huatu cu thihnak deih sawte na hi haw hi.