THUPAUCAP 4 - Ngawm Bible

Cihnak i Nemcuamnak

¹ Ka cate aw na pai zilhmi thute phano in ngai un, Theihtupnak na neihnak tukin cing leng un.

² Ka zilhmi thute phazet hi. Cing lelengin hi.

³ Capa neihcalam kei, ka neulaihin

⁴ Ka pan hitih bangin thu hilh hi. Ka hilhmi thute cing leleng inna, ituk mahten phawkngil pahsun, ka hilh bangin dek inna, nung thei tuk ci.

⁵ Cihnak le theihciannak la in, na ka hilhmi thu hi thupi sa ngawlin nunghek pahsun.

⁶ Cihnak cu zamsan pahsun, nangmah cingkhawi tuk hi, it inna, himdamno in hup tuk hi

⁷ Cihnak neih cu na bawl theih mi thil thupibel hi. Adang na hempoh sangin diknak cu nei saw in hi.

⁸ Cihnak cu deih inna, nangmah khaisang tuk hi, pom lo inna, upat takin cangtik tuk hi.

⁹ Amah cu na lu humah a mawi zetmi paakkual hi tuk a, na minthannak sui lukhuh hi tuk hi.

¹⁰ Ka capa, ka hilh mi thu hi thupi zetin vong inna, na khansau tuk hi.

¹¹ Nundan pha hilh zo ing, cihnak vang zilh ing.

¹² Cingcai zetin, na hawh tale na lamtuanah imah in khak thei tukma hi, na tai ten vangin bah tukma hi ci

¹³ Ka zilhmi thute hi lenkho inna, phano in cingkhawi in hi, na nunnak tuk hi.

¹⁴ Mipha ngawl tei hawhnakah tel kha pahsun, mi sesuak tei nundan vang cung pahsun.

¹⁵ Bawl hihim pahsun; Mipha ngawl tei lak pen taisanin, amuh pialin hawhngutin hi.

¹⁶ Mi sualte cu thil sual pa khat beek bawlta ngawlin hihbu thei haw ma hi. Mi pa kha khat liamsuahta ngawlin hihbu thei haw ma hi.

¹⁷ Sualnak cu an bangin ei in, mitei siatnak tuk cu zu meh haw hi.

¹⁸ Mahnaven midik tei lampi cu zing khuavak pen sun tiang a vak dedeuhmi vaknak tuah bangve hi.

¹⁹ Mipha ngawl tei lampi cu zan khuathim tuah bangve hi. I sikkha in lum hung ngim tih hei thei haw ma hi.

²⁰ Ka capa, ka hilhmi thu hi phano in ngai inna, ka awnkam hi phano in zui in hi.

²¹ Na lak pen ituk mahten paitik hihim pahsun, cing leleng inna, na lungmu sungah komno in kemin hi.

²² A theitumtu hempoh ca in nunnak hi in, amutu tei ca in tisa damnak hi.

²³ Ngalling zetin thu ngaisungin, itahim titale na ngaihsut mi thu in, na nunnak puahto tuk hi.

²⁴ A dik ngawlmi thu son pahsun. Awn mawi ngawl le zolthu son pahsun.

²⁵ Mailam cam zetin zo inna, muangduncop zetin hawhin hi.

²⁶ Na deh tukmi nate phano in bawl hamsa in, mahtih bang a nadeh mite cu komzetno in deksuak thei tuk hi ci.

²⁷ Thil pha ngawl cu pial inna, mailamah cam zetin hawhin hi. Lam dik pen kal khatno hei pial pahsun.