THUPAUCAP 31 - Ngawm Bible

Kumpi Lakah Ngaihsutnak Pha Piakmi

¹ Hite hi kumpi Lemuel lakah a nui cahmi cih awnkamte hi.

² Nangmah cu ka ih zetmi ka capa, ka thu ngetnak hangin ka ngahmi capa ka sungsuak hi ci. I thu kaw ka hilh tuk?

³ Taksa hazawlnak lamah na zaangtha hempoh mang khawng pahsun; Na sum le pai hempoh vang numei humah mang khawng pahsun. Mah miten kumpi tampi siatsuah haw hi.

⁴ Ngai hemin, Lemuel, Kumpite cu misilte bangin zu in tukmi le thusia pawi nuamin zu duhnahnak vang neih tukmi kha haw ma hi.

⁵ Itahim titale zu a in haw ten daante cu phawkngil haw hi, mi nunhak tei covo vang theileh haw ma toh hi.

⁶ Mithi kuante cu zu pia inna, lungkham tei ca in sabittui pia in hi.

⁷ a in haw ahin, a lungnop haw ngawlnak le a zawnnak haw phawkngil haw tahen.

⁸ “Mah le mah a hilh thei ngawl tei ca in hilh sakin hi, Bawmtu nei ngawl tei covo khi humhim sakin hi.

⁹ Amuh tei ca in hilhsak inna, thukhentu dik na hi in hi. Mi ca-ngah le mi nunhak tei covo hupsakin hi.

Ngamtat Pha A Neimi Zi

¹⁰ Zi pha cu izahin ngah hak him? Suang manpha sangin man nei saw hi!

¹¹ A pasal cu ituk mahten cim le khamin um tukma hi.

¹² A nunsung hempoh a pasal humah thilpha bawl lelengin siatnak bawl awng ma hi.

¹³ Umthong tih nei ngawlin tuumul le pat puan tak mek hi.

¹⁴ Sumbawlmi timbaw bangin, Ngammawk deng pen a innkua ca in an na puak mek hi.

¹⁵ A innkua ca an zei tukin le, a umlawhte a nadeh haw sem sak tukin, zingtungno in, na tho mek hi.

¹⁶ Lei ngam zei in lei hi, A lawhmi sum le pai in sabit huan bawl hi.

¹⁷ Nadek tei zetin, a tha nei in, lol vang lol sih hi.

¹⁸ A thil bawlmi hempoh i man a neih daante thei in, taklam khuanuzet tianin, na dek hi.

¹⁹ Amahno in pat kai in ama puansilh vang tak hi.

²⁰ Mi ca-ngah le mi nun haksa tei lakah lawithiamzet hi.

²¹ A innkua hawng haw in angki lum nei khawng haw in, phalbi khawsik hun a hen hei ten lau hihim ma hi.

²² Zauphah takin sandup mawizet tuah tahmi puan na silh hi.

²³ A pasal cu mipi tei theihmi khua sungah hotu pa khat hi.

²⁴ Silhpuan le taikhapte bawlin sumbawl tei lakah zuak hi.

²⁵ A tha ngilin upatzet haw, mailam ca in lauthawngnak nei ma hi.

²⁶ Cingcai zetin le nemno in awn hi.

²⁷ Umthong tih um ngawlin a innkua tei kul le sapnak hempoh vaihawm leleng hi.

²⁸ A cano ten pahcawizet haw in, a pasal vangin pakzet hi.

²⁹ A pasalin, “Numei tampi hi zi pha hi khawng haw naven, nang hi a phabel hi ci,” ti hi.

³⁰ Iang neih hi mizol thei in mawinak vang paileh thei hi. Mahnaven Topa a kihcatu numei cu pahcawi le thangphat tak hi.

³¹ A bawlmi thil hempoh hangin amah cu thangphat un, mi hempoh tei upat tak numei hi.