THUPAUCAP 27 - Ngawm Bible

¹ Zingten ca in tuangkhawng pahsun, mah ni khua in, i suahpih tuk him tih thei kha ma ci.

² Ituk mahten nangmah le nangmah pahcawi duncop pahsun, midang ahimata mikhual ten na pahcawi saw hen hi.

³ Suang le philnel i a khing ngit daan cu sil man hangin a tawhmi haksatnak tuah tehkip ten, imah tih tham ma hi.

⁴ Thinuknak cu siakha zetin mi siatsuah thei hi, mahnaven iksiknak tuah tehkip tham ma hi.

⁵ Ita kei kinmawh ma cim ti in, a ngaihsut tuk sangin, mi pa khat maicang sidunin, a sualnak lepsak pha saw hi.

⁶ Ngualcam pha in, na thin a natik vangin deihsaknak pha na nei hi. Mahnaven na ngalin, na ko pen a kawi tale ngallingin hi.

⁷ Na von a vahta ahin khuaihum hei duh tukma navecin, na ngilkial laihtakin, a kha zetmi an vang hum tituk ci.

⁸ Mai innkua pen a taivaitu cu a bu a lawlmi vanote tuah bangve hi.

⁹ Namtui le sathau ngim pha in, na lungnoptik naven, thinhaknakin, na lungdaihnak siatsuah thei mek hi.

¹⁰ Na ngualcam pha hei hihen, na nu le na pai ngualcam pha hei hihen, phawkngil pahsun. Haksatnak na tawh ten na unau hilh pahsun; Ngam khawlapi a na unaute sangin na el nai a ummi na innnel ten na bawm thei saw tuk hi.

¹¹ Ka capa cip zetin na um tale ka lungdam tung a, keimah a sonsiatu tei awnkam lul thei tung hi.

¹² Micipin, haksatnak a hen tuk mu hamin, kian thei haw naven, thu ngaihsutnak nei cuam ngawlin haksatnak tawkin sikleh mek haw hi.

¹³ Theih awng ngawlmi pa i leiba hangin amahkhannak a bawl ngamtu cu a neihmi nate cu amahkhannak in laksak khawng hi tuk hi.

¹⁴ Zingtungno in, a hihbu laihmi na ngualcam pha cu nging zetin, na otpih ahi tale na tamsiat tuah bangve hi.

¹⁵ A phukciak lelengtu cu nguahcing tuah bangve hi.

¹⁶ Mah nu cu itin kaw na umdentik theih tuk? Huihtheu kham thei ni cim? Mahma tale na khut phalhin situi cawi thei cim?

¹⁷ Thik le thik a tahdun haw bangin mihingte vang pa khat le pa khat lak pen cihnak cung haw hi.

¹⁸ Theikung cu phano in, na tuamlawm tale thei min eih tuk nei tuk ci. A bawipa a zo phatu a umlawh cu upatnak co tuk hi.

¹⁹ Tui sungah na mel na muh bangin, na ziaza vang na lung sungah mu bok tuk ci.

²⁰ Mihing tei deihnak cu mithi khua bang hi. Deihnak cu bo ni nei ma hi.

²¹ Sui le ngun khi mei tuah na khingkhai haw hi, mihing tei ziaza vang pahcoihnakin khingkhai theihbok hi.

²² Misilte thi awndiakin, na vat hei in, a silnak cu vatvawk thei cuang tukma hi.

²³ Na tuuhon phano in tuamlawm inna, na khuihon vang cingcai in zo in hi.

²⁴ Itahim titale hauhnak cu kumkhua in kho ma hi. Kumpi lukhu hei kumkhua in, na kho bokma hi.

²⁵ Liang hap lak pen ankung cawm khawng ci. Kiak na bun ten ankung dawltate na po li laih hi.

²⁶ Na tuumul tuah puan tak thei ci a, na keel khenkhat na zuaknak a manin lo ngam lei thei ci.

²⁷ A tanglaihmi keel tei lak pen na innkua le na umlawh numei tei intuk keelnawi ngah tuk uh ci.