THUPAUCAP 10 - Ngawm Bible

Solomon i Thupaucap

¹ Hite hi Solomon i thupaucap hi. Capa cipin, a pa lungdamtikin, Capa silin, a pa thasiatik hi.

² A man ngawl a thil ngahmi in nemcuamnak pia tukma hi. Mahnaven diknakin, na nunnak hup tuk hi.

³ Topa in miphate ngilkialin um tuk phalma hi. Mahnaven mipha ngawl tei deihnak cu vawksak hi.

⁴ Thazawnnakin ca-ngahnak suaktik hi. Lolnakin hauhnak suaktik hi.

⁵ Ankung cop hun laihin ankung cawmtu cu micip hi. Ankung cop hun laihin, a hihbu lengtu cu zahcakhuaizet hi.

⁶ Mipha pa in thupha co tuk a, mipha ngawl pai awnkamin, a nuncan pha ngawlnakte im hi.

⁷ Miphate phawh leleng cu muicu pa khat hi. Mahnaven mipha ngawl tei min cu thamthong paih tuk hi.

⁸ Micip ten ngaihsutnak pha piakmi sang haw hi, misil kamtamte cu thamthong haw tuk hi.

⁹ Miphate cu himdamno in le lungmuang zetin um haw hi, mahnaven mipha ngawlte cu a phat ngawlnak haw lang tuk hi.

¹⁰ Thudik a imtu in haksatnak tultik hi, mahnaven dim ngawlin a phuangsuaktu cu lemnak a bawltu hi.

¹¹ Mipha pai awnkam cu nunnak ciktui hi, mahnaven mipha ngawl pa i awnkamin phat ngawlnak nunzia cu im hi.

¹² Huatnakin hauhdunnak piangtik hi. Mahnaven itdunnakin sualnak hempoh zah hi.

¹³ Micipin, a sullam neimi awn hi, mahnaven misilte cu leptuah kul hi.

¹⁴ Micipin cihnakte cawmkhawm hi, mahnaven misil tei awnkam cu haksatnak tuah kangdun ma hi.

¹⁵ Hauhnakin mihaute hup hi, zawnnakin mizawngte siatsuah hi,

¹⁶ Phatnak bawlman cu nunnak hi, mahnaven sualnakin sual dedeuhnak lamah mipui hi.

¹⁷ Nunhilhnak a ngahtute cu nung haw tuk hi, mahnaven sual ing a ti nuam ngawltu cu lauhuainak sungah um haw hi.

¹⁸ Huatnak lungmu sel a neitu cu zolthu sontu hi. Mi sonsiatnak thu a sontu cu misil hi.

¹⁹ Tam saw deuh na awn tale tam saw deuh sual tuk ci, micip na hi tale na awn suupin hi.

²⁰ Mipha pai awnkam cu ngun phabel tuah bangve hi. mipha ngawl pa i ngaihsutnak cu man nei ma hi.

²¹ Mipha pai awnkamin mi tampi nemcuamtik hi. Mahnaven na silnakin nangmah le mah thatduntik thei hi.

²² Topa i thupha cu nangmah hautiktu hi. Nadeh tampi nadehnakin nangmah hautik cuang ma hi.

²³ Thil sual bawlnop hi tin, a titu cu misual hi. Micipte cu cihnak sungah lungdamnak nei haw hi.

²⁴ Midik ten a thuduhsam haw mi ngah haw hi, mahnaven mipha ngawlte in, a lauhuaibel haw mi tawk haw tuk hi.

²⁵ Huihsia a theu ten mipha ngawlte cu mutvawk khawng tuk hi. Mahnaven midikte cu him haw tuk hi.

²⁶ Na nadektu tukin mi thazawng la pahsun, na la tale na ha ca in sabit thuk tuah bangve tuk a, na mit ca in meikhu bang hi tuk hi.

²⁷ Topa upatin, na nunkhua sau tuk hi, mipha ngawlte cu thih hun a kim ngawlin thi haw tuk hi.

²⁸ Mipha tei muansannakin lungdamnak suaktik hi. Mipha ngawl tei muansannak cu thawnthong hi.

²⁹ Topa in midikte hup hi. Mahnaven thilpha ngawl a bawltute cu siatsuah hi.

³⁰ Midikte cu himdamnak nei leleng haw tuk hi, mahnaven mipha ngawlte cu ngam sungah umnak nei haw tukma hi.

³¹ Midik ten cihnak thu hilh haw hi, mahnaven mipha ngawl tei lei cu tan hi tuk hi.

³² Midik ten son tuk thupha thei haw hi, mahnaven mipha ngawl ten mi siatsuahnak thu bek son haw hi.