THUKHENTUTE 5 - Ngawm Bible

Deborah le Barak i La

¹ Mah sunin Deborah le Abinoam i capa Barak ten hi la sa haw hi.

² Topa cu thangphat un! Israel hotu nase zetin panmun la haw a, Israel miten thatho zetin ngal a do haw hangin Topa cu thangphat un.

³ Maw kumpi ngai hem un! Maw uktu mengden hem un! Topa lakah tumnging tumin, Topa, Israel i Pathian nelah lasa tung hi.

⁴ Topa aw, Seir mual pen tulin, Edom ngam na hawh ten leipi hing dudumin, van pen nguahzu hi; Hi zuh hi, meingo pen tui cak hi.

⁵ Sinai Mual a Topa i mai ah mualte hing hi. Topa, Israel mi Pathian mai ah.

⁶ Anath i capa Shamgar khan le Jael i khansungah, khualzinnak lampite khing diudeu hi. khual a zin ten lamneu zui haw hi.

⁷ Israel khuapi khing diudeu khawng hi. Khaw-ngaih huai in dai diudeu thongta. Israel i nu, Deborah na hen laih ngawlin hi.

⁸ Israel in pathian thak a ten haw ten, a do tuk ngal a khua kongka ah heng haw hi. Israel mi thawng sawm li lakah, lumphaw le ceipi cawitu pa khat bek um haw a maw?

⁹ Ka lungmu cu Israel ngalbawi tei lakah cam leleng hi. Lungtho zetin ngal a dotu Israel tei lakah, Topa cu thangphatin um hen.

¹⁰ Hi thu cu hilh ten un. Laak ngo hum a khung mite, Cipuh khunnak hum a khung mite le, ke tuah a hawhtute hei in hilh ten un.

¹¹ Ngai un! Tuikhuk elah khawmin, a au thawm haw cu, Topa i nehnak Israel miphun i nehnak cu au pih haw hi. Topa i mihingte cu a khua haw pen hawh haw hi.

¹² Tho in, Deborah, tho inna, pui in hi! Tho in, lasa thahin pui in hi. Abinoam capa Barak, na mat mite pui in hi!

¹³ Israel mite cu a hotu lakah hung haw hi. Topa i mihing ten ngaldo tukin hung haw hi.

¹⁴ Efraim pen hungin munlawn heng haw hi. Benjamin hinnam ten zui haw hi. Machir pen ngalbawi heng, Zebulun pen bawite hung haw hi.

¹⁵ Issakhar hotu le Deborah tuah hung haw hi. Hi zuh hi, Issakhar vang hung a, Barak tuah munlawn ngamah zuidun haw naven, Reuben hinnamte cu khendun haw. Hawh bok tukin thusoncat thei haw ma hi.

¹⁶ Ita tuucingte i nunglamah ding leleng haw him? A tuu haw samnak aw ngai tukin maw? Hi zuh hi, Reuben hinnamte cu khenkhekdun haw hi. Telbok tukin khencat thei haw ma.

¹⁷ Gad hinnam, Jordan khatlam ngalah um haw hi. Dan hinnam cu ngan tatnak ngamah um haw hi. Asher hinnam cu Tuipi mawkah um haw hi. Tuimawkah umthong leleng haw hi.

¹⁸ Mahnaven Zebulun le Naftali hinnam cu ngal le sa lakah nunnak pia ngam haw hi.

¹⁹ Kumpi hungin ngaldo haw hi, Megiddo tui el Taanach khua ah: Kanaan kumpi ten do bok haw hi. Mahnaven sumpai lonmi nei haw ma.

²⁰ Van aksi hei in van a hawhnak haw pen. Sisera cu do bok haw hi.

²¹ Kishon ngun tuilunin tai khawng hi. Kumkhua luangmi Kishon in, ngil sesem tukin mai ah not tung.

²² Cipuh cu tai duaduamin, a ke tin haw in lei vat haw hi.

²³ “Meroz cu thusia piak hi tahen. Khuasung mi humah thusia um tahen, itahim titale Topa bawm tukin tul haw ma hi. Topa i ngaldo haw ma,” tin Topa i vancungmi in ti hi.

²⁴ Jael cu numei lak pen a bawngphabel hi; Ken mi, Heber i zi cu puanbuk a um numei lak pen Jael cu mi sunglawibel hi.

²⁵ Sisera in tui ngenin khuinawi pia hi, kuang manpha tuah khuinawi lap pia hi.

²⁶ A veilam khutin puanbuk khetnak ngolhzum cawi in, a taklam khutin, nadektu i sobul cawi hi. Sisera cu sepin, a lu keh hi. A lu cu paih letin sun hi.

²⁷ Sisera cu hoi lawluai in, lum hi, Jael i ke bulah lum hi. A kebulah hoi in lum hi, lupnak munah thi hi.

²⁸ Sisera i nu in tukvelh neuno pen khua cuan hi. Pang awng pen khua zo kaw kawi hi. “Ita a cipuhleng heng ma laih heng?” “Ita a cipuh khuanu haw heng?” tin ti hi.

²⁹ A numei lak pen a cipbel ten don haw, a hilhmi cu amah in hilhkik pepel hi.

³⁰ “A lon haw mi sum le pai sem haw, ngalkap pa khat ca tukin khanglai pa khat maw, pa nih maw, Sisera ca tukin puancoih manpha, Kumpi nui ngawng-awh tukin puancoih mantam,” ti haw hi.

³¹ Mah hangin, Maw Topa na ngal cu lalthong haw tahen. Mahnaven nangmah a ittu cu, Zinglam a tulmi ni bangin, vak haw tahen. Mah ngam sungah lemdaihnak kum sawm li um hi.