THUKHENTUTE 16 - Ngawm Bible

Gaza Ah Samson

¹ Samson cu Gaza ah hawhin, mahlai munah numei pha ngawl pa khat mu in, a lakah cam tukin hawh hi.

² Gaza khua miten a khua hawah Samson um tih a theih haw ten kimin, zankhua khuapi kulhtian kongpi pen pang haw hi. Zankhua imah bawl ngawlin dai khipkhep haw hi. A lungmu sungno haw in, “Khuavak tian pang nung inna, that thei tuk hung,” tin ngaisung haw hi.

³ Mahnaven Samson cu zanngil tian bek zau hi. Tho in khuapi upnak kongpi khuam le a holhte a venghawngin dokin, a ko humah suanin, Hebron khua pen ngalden a um mualhum tian pua hi.

Samson le Delilah

⁴ Mahnung ten Samson in, Sorek Munlawn a um numei nu pa khat a min Delilah a tihmi haw cu ngai hi.

⁵ Filistin hotu kumpi pa nga cu Delilah lakah hawhin, “Na tangval pa hi leem inna, ita hiti bang leita in ngil kaw tih le iti bangin nehin, manin, ken thei tuk ung him tih theih tumin hi. Na tithei tale ngun tangka thawng khat le za khat ten pia tuk ung,” tin ti haw hi.

⁶ Mah hangin Delilah in Samson lakah, “Iti bang lawlawmin ngil thei cim hilh poh vele. Tehkipnakin midang ten khauvawhin, a mantum haw bang ahin iti bangin man thei haw tuk kaw,” tin dong hi.

⁷ Samson in, “A ko laih ngawlmi thalkhau thak salih tuah a ken haw tale ka tha bo tuk a, midang bang hi tuk poh ing,” ti hi.

⁸ Mah hangin Filistin hotu ten a ko laih ngawlmi thal khau salih cu Delilah pia in, mahmi tuah Samson cu ken hi.

⁹ Inn khan pa khat sungah mi khenkhat koihin Delilah in, “Samson, Filistin mite hung haw,” tin au hi. Mahnaven meihal mi nimzang bangin thal khau cu Samson in baihno in, botcat khawng hi. Samson i ngilnak thukuh cu thei haw ma hi.

¹⁰ Delilah in, “Ngaisung tehin; zolthu sonin, cekpan bawlnak thongin maw na man. Atu-in phano hilh tohin, itin miten ken thei haw tuk kaw?” tin Samson cu dong hi.

¹¹ Samson in, “Kuamah i man awng ngawlmi khauhual tuah a ken haw tale ka tha bo in midang bang leng tung,” ti hi.

¹² Mah hangin Delilah in khauhual thak tampi la in, Samson cu a ken nungten, “Samson, Filistin mite hung haw,” tin au leleu hi. Mi khenkhat ten langkhat lam khan pen pang haw hi. Mahnaven Samson in, a khut a kennak khauhual cu nimzang khatno bangin botcat khawng leleu hi.

¹³ Delilah in Samson lakah, “Cekpan bawlnak men mangin zol leleng ci. Itin ken thei haw tuk kaw, hilh poh vele,” tin, Delilah in dongta leleu. Samson in, “Ka samphek phek salih hi nimzangah kencih inna, thiamvang tuah kho zetin khencih inna, ka tha bo in midang bang bok leng tung,” ti hi.

¹⁴ Delilah in Samson cu a hihbuh ten sialin, a sam phek salih cu la a, thiamah kencih hi; thiamvang tuah kho zetin kencihin, “Samson, Filistin mite hung haw,” tin au hi. Samson cu khanglo in, a khuam tuah le a thiambu pi tuah thawh toh pih lulut hi.

¹⁵ Mah hangin Delilah in, “Na lungmu sungin na deih ngangai ngawlpi ita deih ing ti kam? Vei thum tian loli zawnsak, ita hi bangin ngil nge cim, tih hei hilh nuam ma ci,” tin Samson cu ti hi.

¹⁶ Ni khat nung ni khat, keimah hilhin hi, tin a nget tittet hangin Samson cu a lungbingin thih hei nuam saw tuk hi.

¹⁷ A dawlbel ten a thukuh cu phuang hi. “Ka sam hi meh awng ngawlmi hi. Ka suah bek ten Topa i lakah piakmi Nazir mi ing. Ka sam hi met a hin, ka tha bo khawngin, midang bangin hi lehbok tung,” tin hilh hi.

¹⁸ Delilah in thutak hilh zo tih a theih ten Filistin hotu tei lakah thucahin, “Tu vei khatno hung hih un. A thu kuh hilh zo,” ti hi. Hung haw a, tangka vang cawicih haw hi.

¹⁹ Delilah in Samson cu a kawng humah sialin, a hihbuhtik ceng ten mi pa khat sam, Samson i samphek phek salih cu talh khawng hi. Delilah in haksatnak pia panin, Samson cu a tha bo in, a ngilnak hempoh pai khawng hi.

²⁰ Delilah in, “Samson, Filistin mite hung haw,” tin au leleu hi. Samson cu khanglo in, “A laih ngawl bangin tho nang inna, luat tuk poh ing tin ngaisung hi.” Topa in zamsan zo tih cu thei ma hi.

²¹ Filistin miten man haw in, a mit pholh haw a, Gaza ah hawhpih haw hi. Mahlai ah daal tuah bawlmi kol bulh haw hi. Thawnginn sung pen sangvut ngawitik haw hi.

²² Mahnaven a sam cu tawtleh pan hehet hi.

Samson Thi Hi

²³ Lungdam zetin i tukin le a pathian Dagon lakah biakpiaknak nase zetin pia tukin Filistin kumpi cu munkhatah khawmdun haw a, “A pathian uhin, a ngal uh Samson cu, a khut sung uhah nehnak pia zo!” tin ti haw hi.

²⁴ Mipi in Samson amuh haw ten a pathian Dagon cu thangphatin, “Samson in ka ngam uh cu ka luang uh dimtik hi, ka pathian uhin ka ngal uh ka khut sungah hengtik hi,” tin ti haw hi.

²⁵ Thawnginn pen Samson cu pui haw a, cekpan bawlnak mangin khuam pa nih laklawhah dingtik haw hi.

²⁶ Samson in, a khut lenin, a puitu naupang pa i lakah, “Hi inn khuamte hi zentik hemin, ngaingam nuam ing,” ti hi.

²⁷ Mah inn sungah numei le pano a dimin um haw hi. Filistin hotu pa nga hei um haw a, cekpan bawlnakin, a mat haw mi Samson zo nuamin, mihing thawng thum val cu humta khanah um haw hi.

²⁸ Samson cu thungenin, “Maw Cungnungbel Topa kei hu thei zazalin hi. Topa, nangmah in ka mit khua muleh thei in, Filistin mi ka thuk kik theihnak tukin, ngilnak pialeh zalin,” tin Pathian nelah ngen hi.

²⁹ Samson in inn dotu khuampi pa nih cu pomin, a khut khatin khuam pa khat veve lenin, tha a lak ceng ten,

³⁰ “Filistin mite tuah thi nang ngei,” tin au thahin, khuampi pa nih cu a tha neihtawp tuah nawmin, innpi cu mipi le hotu tei humah cim lulut hi. Samson in mahlai pen a thahmi mihingte cu a nunsung, a thahmi hempoh sangin tam saw hi.

³¹ A unaute le a innkua ten a luang cu la in, pinpih haw a, Zorah le Eshtaol laklawh a pa Manoah i khanah vui haw hi. Samson in kum sawm nih sung Israel hotu dek hi.