THUKHENTUTE 10 - Ngawm Bible

Tola

¹ Dodo i capa cu Puah hi. Puah i capa cu Tola hi. Abimelek thih nungten Tola cu Israel luattiktu in suak hi. Tola cu Issakhar miphun hi in, Efraim mualhum ngam Shamir khua a ummi hi.

² Tola cu kum sawm nih le kum thum sung Israel hotu dek hi. A thih ten Shamir khua ah vui haw hi.

Jair

³ Tola thih nungten Gilead a um Jair cu hotu in cang hi. Jair in kum sawm nih le kum nih sung Israel tei thukhentu dek hi.

⁴ Capa sawm thum nei in, laak sawm thum humah khung li mek hi. Gilead ngam sungah khuapi sawm thum nei haw in, tusun tiangin, mah khuapi cu Jair i khuapi ti leleng haw hi.

⁵ Jair cu thi in Kamon khua ah vui haw hi.

Jefthah

⁶ Israel mite cu Topa i mai ah sual leleu haw hi. Baal pathian, Astartes pathian, Siria pathian, Sidon pathian, Moab pathian, Ammon pathian le Filistin pathian bia haw hi. Topa Pathian cu nunghekin, bia nuam haw ma toh hi.

⁷ Mah hangin Topa cu Israel tei humah thinukin, Filistin le Ammon mite nehtik hi.

⁸ Mah kumin Israel mite uknehin, bawlsia haw hi. Amor mitei umnak Jordan Ngun pen nisuahnak Gilead ngam a ummi Israel mi hempoh cu kum sawm le kum liat sung bawlsia haw hi.

⁹ Amor miten Judah mi, Benjamin mi le Efraim mite do tukin Jordan ngun cu kaltan haw hi. Mah hangin Israel mite cu vancaukapin um haw hi.

¹⁰ Israel mite cu Topa i lakah kapin, “Ka Pathian uh, na humah sual zo ung hi; nunghekin Baal pathian bia ung hi,” tin sam haw hi.

¹¹ Topa in, “A bosa mi hun sungah Izipt mi, Amor mi, Ammon mi, Filistin mi,

¹² Sidon mi, Amalek mi le Maon miten a nuainep haw ten ka lakah kapin tau uh ci. Nangmuh pan ngawlin um awng ing maw?

¹³ Mahnaven kei cu nunghekin pathian dang bia leleng uh ci, mah hangin pan tukma toh ing.

¹⁴ Hawh unna, na ten saw uhmi pathian tei lakah kapin au un, haksatnak na tawh uhten amuh ten pan haw hen,” tin ti hi.

¹⁵ Mahnaven Israel miten, “Sual leita zo ung, na deih bangin bawlta poh inna, hehpihnakin tuni in pan zazalin,” tin Topa cu ngen haw hi.

¹⁶ Mah hangin ngamdang pathian a biaknak haw cu vawk khawngin, Topa cu bia haw hi. Israel tei haksat thuaknak amuh ten Topa cu a lungnop thei ma toh hi.

¹⁷ Ammon ngalkap cu khawmdun khawmin, Mizpah ah ngiahbuk samin, vaithawi bok haw hi.

¹⁸ Gilead mi le a puitu ten, “Ammon mite do tukin akua in lampui tuk kaw? Lampuitu cu Gilead mi hempoh humah hotu hi tuk hi,” tin pa khat le pa khat dongdun li haw hi.