THUHILHTU 9 - Ngawm Bible

¹ Nasezet ngaisung ing a, midik, micip le a thil bawl haw mi hempoh cu Pathian kut sungah um hi. Itnak le huatnak a neimi vang a khut sungah um hi. Ka mailam a ummi kuamah in thei haw ma.

² Mi hempoh humah bangtenin heng hi. Midik hihen, misual hei hihen, mipha hihen, mipha ngawl hihen, mi thiangtho hihen, mithiang ngawl hei hihen, biakpiaknak a piatu hei hihen, a pia ngawltu hei hihen, a tawh haw mi bangten khawng hi. Mipha cu misual sangin, met saw cuang ma hi. Thutiamtu cu a tiam ngawltu sang hei in, met saw cuang ma hi.

³ Leihum a, thilpha ngawlbel hi. Mi hempoh ca in, thulai tannak bangtenin heng hi. Mihing lungmu cu a nun sung hawah, silnak le phat ngawlnak tuah dim hi. Mahceng ten mithi tei lakah hawh haw hi.

⁴ Mahnaven mihing i sialcihmi ca in, muansannak umlaih hi. Itahim titale a thi mi kiosa sangin, a nungmi uico pha saw hi.

⁵ A nungmi ten thileh tuk ung, tih bek thei haw; a thisa ten imah thei haw ma toh. Amu ca in, laksawng umma toh; phawkngil vingviang haw hi.

⁶ A mi ihnak, a mihuatnak le a tumtahnakte cu thihpih khawng zo haw hi. Leihum a nadehnak sungah tel theihnak imah nei haw ma toh.

⁷ Hawh inna, na an cu lungnop zetin ei in hi. Na sabittui cu lungdam zetin, in pohin! Pathian in, na bawlmi cu lungkim pih zo hi.

⁸ Na van ngotik leleng inna, na sam cu sathau noih lelengin hi.

⁹ Vanhaang nuai a, hun comno sung Pathian in, nunnak a piakmi sungah na ihmi na zi tuah nop zetin um un, Itahim titale leihum na nun sungin, mahmi cu na nadeh man laksawng hi.

¹⁰ Na tawhmi nadeh hempoh cu na zaangtha neih hempoh tuah dek pohin; itahim titale na hennak tuk Sheol ah nadehnak hihen, ngaihsutnak hihen, theihnak hihen, cihnak hihen um tukma toh hi.

¹¹ Hih leihumah thudang pa khat ka muh lehmi cu: tai zuamdunnakah mi ngilbelin, neh cuang ma, ngaldonakah ngalthiamte bekin neh cuang haw ma. Micipte bekin, an ngah cuang ma, a cipte vang hau leleng haw ma, theihtupnak a neite lawhtin leleng sap haw ma hi; mi hempoh humah bawngsiatnak ngihngeh heng hi.

¹² Mihingin, a hun can thei awng ma hi. Ngasa cu suuk tuah a mat haw bangin le vano cu thang tuah a awh haw bangin, mihing hei cu ngaihsut khak ngawlin siatsuahnak cu a hum hawah heng tuk hi.

Cihnak le Silnak Hum A Ngaihsutnak

¹³ Cihnak tehkip tak pa khat mu ing a, mah cu thupi zetin, ngaisung ing.

¹⁴ Khua pa khat umin, khuasungmi cu demno haw; kumpi ngilzetin do in, a kil khawng ceng ten mah khua, a lak theihnak tuk nase zetin, zuam hi.

¹⁵ Mah khuasungah ca-ngah zetin, micipzet pa khat um hi; ma pa bekin, a cihnak tuah mah khuasung cu nunpan zo tuk hi. Mahnaven kuamah in, mi ca-ngahpa cu phawk kha haw ma hi.

¹⁶ “Cihnak cu Thangilnak sangin pha saw,” ti ing. Mahnaven mi ca-ngahpa i cihnak cu imah simsial ngawlin, a ot hei kuamah in, ngai kha nuam haw ma.

¹⁷ Misilte uktu khonsil upa pa i au lih sangin, micip tei nemno a sonmi zaknop saw hi.

¹⁸ Cihnak cu ngal hiamnam sangin pha saw in, misual pa khatin thilpha tampi siatsuah thei hi.