THUHILHTU 7 - Ngawm Bible

Cihnak A Thupi Dan

¹ Minphatnak cu zimui phabel sangin, pha saw hi. Thih ni cu suah ni sangin, pha saw hi.

² Puai bawlnak mun a, hawh sangin, mithi inn a, hawh pha saw hi. Itahim titale mihing cu a venghawng uhin, thihnakin, ngakleng hi tih cu theih leleng tuk hi.

³ Nuih sangin, khawngaih pha saw hi. Mitmai ah lungdamnak umtik ma naven theihnak khangtik hi.

⁴ Micip tei lungmu cu mithi innah cam leng hi. Mahnaven misil tei lungmu cu nopnak munah um.

⁵ Misilin, thangphatnak lasak zak sangin, micip i liatnak zak pha saw hi.

⁶ Misil nuih cu mei alh sung a, ling halcihin, a pokmi nging bang thong hi. Sullam imah nei ma hi.

⁷ Micipin, mi a zol ten misilin, bawlduncop hi. Nawhthuh na la tale na nun ziaza siatsuahdun hi ci.

⁸ Thu pa kha khat a pattung sangin, a tawplam pha saw hi. Ultungzet i um sangin, lungduai pha saw hi.

⁹ Baihno in, na thinuk pahsun; baihno thinuk cu misil tei dan vei.

¹⁰ “Ita tu hun sangin, tanglaih hun pha saw hum?” tin dong kha pahsun. Mah bang thudot cu micip tei thudot daan kha ma hi.

¹¹ Cihnak cu hauhnak sangin pha saw hi. Mihing tei ca in nemcuamnak saw hi.

¹² Sum le pai in, na lung a noptik bangin, cihnak vangin na lungnoptik hi.

¹³ Pathian i nadehnak hi ngaisung hem un: A kawitiksa mi cu akua in kaw a camlehtik thei tuk

¹⁴ Nopnak na ngah ni-in, lungdamin hi. Pathian in lungdamnak a umtik bangin haksatnak vang umtik hi. Mah hangin mailamah i um tuk tih kuamah in thei haw ma hi.

¹⁵ Ka nunnak nemcuam ngawl sungah na phunkim mu ing a, mawh nei ngawl cu mawh nei ngawl naven thi paihin, mipha ngawl cu a phat ngawlnak hangin kum ngeipi a nungmi mu ing.

¹⁶ Mipha ngawl leita hi pahsun; micip leita vang hi kha pahsun, nangmah le nangmah ita siatsuahdun nge cim?

¹⁷ Mipha ngawl leita hi pahsun; misil leita vang hi pahsun. Na huncan a kim laih ngawlin ita thi tuk nge cim?

¹⁸ Thil pa khat komzetno lenin, thildang vang hahsuah ngawl pha hi. Pathian a kihcatu in, a nam nihin lawhting haw tuk hi.

¹⁹ Khua hotu upa sawm khat ten khua ca in, cahnak a piak haw sangin, cihnakin, micip pa i lakah cahnak tam saw pia hi.

²⁰ Leihumah phatnak bebek bawlin, siatnak a bawl awng ngawltu kuamah um vingviang haw ma hi.

²¹ Mitei otmi hempoh thupi sa pahsun; mah ahimata na salte hei in, a sonsiatnak haw za kha tuk ci.

²² Nangmah hei, midang sonsia li ci tih theidun leng ci.

²³ Hi hempoh hi cihnak tuah khingkhai ing. Cip leng poh ing tin, ngaisungdun naveng cip viang ma ing.

²⁴ Nunnak tih hi akua in thei zo tuk kaw? Thu thuk zetmi hi a, kuamah i theih zawh tukmi kha ma hi.

²⁵ Mah hangin ka lungmu in, cihnak zei tuk le cung tukin le mu suak tukin ngaisung li ing a, ka tawh ngangai mi cu phat ngawlnak, mibat ngawlnak, silnak le buainakte hi saw haw hi.

²⁶ Numei ka tawhmi cu ka ca in, thihnak sangin kha saw in, a lungmu cu thang na hi lengin, a khutte cu thik taicin na hi haw hi. Patthan i hehpihmi cu mah numei sung pen luat tuk hi. Mahnaven misual cu mah nu in, hahsuah tukma.

²⁷ Thuhilhtu in, “Ka muh mi cu hi bangin na hi: thil pa khat nung pa khat, ka lungmu tuah ngaisung ngut ing a, thusuak zei ngut ing.

²⁸ Ngeipi zei naveng lawhting mang. Mi thawng khat sungah upat takmi pa khat mu ing, mahnaven numei cu pa khat hei mu mang hi.

²⁹ Ngai tehin, ka muhmi cu hi bangin hi: Pathian in mihing cu midikin, bawl naven amu deihnak le tumtahnakah lampial khawng haw hi,” ti hi.