THUHILHTU 6 - Ngawm Bible

¹ Leihum a, thilpha ngawl pa khat ka muhmi cu mihing ca in, a ngit zetmi hi.

² Mi pa khat lakah, Pathian in hauhnak, neih le siah le pahcoihnakte pia in, a lungmu i hazawlmi hempoh neih ngawlmi imah nei ma; mahnaven a neih le siahte nunnop zetin man theihnak cu Pathian in pia ma; midangte saw in, nop zetin mang haw hi. Hite hi thil mawi ngawl le a mawi ngawl zetmi hi.

³ Mi pa khatin, cano za khat a nei hei in, kum ngeipi nungin, khan phazet ahi hei in, a neih le siahte nunnopin, mang ngawlin lungnopnak a ngah ma tale amah sangin, a thisa in, a suakmi nauno pha saw laih hi.

⁴ Mah naute cu suahman nei ngawl, thim lakah a thammi hi a, ituk mah ten a min lang awng ma hi.

⁵ Sun khuavak hei mu awng ngawlin, theihmi hei imah nei ma naven, lungnop ngawlpa sangin daidenno in cawlhnak ngah saw hi.

⁶ Mi pa khat cu kum thawng khat nungin, khan nih zomin, a nung hei in, lungmuannak a ngah ma tale i nemcuam kaw? Akua abang hei in, a hawhnak haw tuk cu munkhat leng ma maw?

⁷ Mihingin, a tisa ca bek nadek naven kham tih um awng ma.

⁸ Micip cu misil sangin, nemcuamnak ikaw a neih peng? Mi ca-ngahpa in, nundan tuk a thei hei in, ikaw a nemcuam?

⁹ Mah hangin lungmu vaivuanin, umtik lih sangin, na mai a, ummi neih le siah humah lungkim theih hi pha saw hi. Mah hei cu phukthong hi in, huih mat tum bang thongpoh hi.

¹⁰ Na a umsa mi hempoh cu minpiak sa ngeh hi haw a, iti bang na hum tih cu theihsa hi. Mihingin, amah sangin, a ngil saw deuh cu langpang thei tukma hi.

¹¹ Itahim titale tam a awn uh tale, tam deuh khialin, sullam nei ngawl dedeuh hi. Mah ahi tale mihing ca nemcuamnak i um tuk kaw?

¹² Mihing nunnak ca in, thilpha cu leihum hun comno a nun sung uh le lim bangin a pai tukmi a nunnak sungah akua in thei zo tuk kaw? Akua kaw, a thih nungten leihumah i piang tuk tih a son ham thei tuk?