THUHILHTU 5 - Ngawm Bible

Thutiamnak Bawl Thawthong Pahsun

¹ Pathian biakinn a, na hawh ten ngalling zetin hawhin hi. Imah ngaisung ngawlin sualnak a bawltu misil tei biakpiaknak sangin, a thuzui nuamnak lungmu tuah hawh pha saw hi.

² Ngaisung masa ngawlin awn pahsun; Pathian mai ah nawhkhah zetin thutiamnak bawl thawthong tuk hei ngaisung pahsun. Pathian cu Vancungah um; nang cu leihumah um ci; mah hangin na ot tuk supin hi.

³ Thu ngaihsut a tam ten mang vang tam, Tam na awn tale, na silnak lang dedeuh tuk hi.

⁴ Pathian nelah thutiamnak na bawl ten, na thutiam bangin bawlsuak tukin na zuancum pahsun. Itahim titale Pathian in, misil cu a kinnak umma hi. Na thutiam bangin pia in hi.

⁵ Na thutiam bangin, na piak ngawl sangin thutiamnak bawl ngawl pha saw.

⁶ Na awnkamin, sualnakah pui pahsuh hen! A pui tale Pathian i thiampi mai ah, “Khial kha ing!” tileh pahsun. Mah ahimata na otmi humah Pathian a thinuk uk tuk a, na bawlmi hempoh thawnthong khawng haw tuk hi.

⁷ Mang a tam tale phukthong tamin, na kam a tam tale phukthong leleng betleh tuk hi. Mah hangin Pathian kihca in hi.

Nunnak Cu Phukthong Hi

⁸ Ngamkhen pa kha khat sungah mi ca-ngah nemsukin, a co haw tuk le a ngah haw tuk hei ngah ngawlin, um na mu uh tale lamdang sa pahsun; itahim titale bawi pa khat cu a humah bawi dang pa khat umlaihin, a venghawng haw i hum a, bawi upabelin, zoleng poh hi.

⁹ Leingam pen a suakmi cu mi hempoh ca hi. Kumpi hei in, leingam sung pen a suakmi muang hi.

¹⁰ Sum deihtu cu a lungmu bangin sum nei awng tukma hi; sum bebek a ngaisungtu in, izah a met hei in, dem leita ti leleng tuk hi. Hi hei cu phukthong ngeh hi!

¹¹ Neihmi a tam tale, a eitu tam bok haw; na neitu tei ca in, a na neih haw mi a mit tuah amuh tih sialngawl i nemcuamnak um kaw?

¹² Nadektu cu demno a ei hei in hihen, tam a ei hei in hihen, a hihbuhci leleng; mahnaven mihau pa cu tam leita a neih hangin hihbu thei ma.

¹³ Leihumah kinmawh zetin ka muhmi pa khat cu: mihingin amah siatsuahtu tuk hauhnak a khawl lih hi, hi.

¹⁴ A khawlmi cu phawhkhak ngawlin paithong a, capa lakah, a piak tuk imah tang ma toh!

¹⁵ Thacangin, a nu i pum sung pen a tul bangin thacang lengin, kikleh tuk; a nadehman hempoh cawi theih tuk imah nei tukma hi.

¹⁶ Hi hei hi thilpha ngawl ngangai na hi, a hun lam bangkekin kikleh tuk; nadek ung, huih hil ung a, mat tum ung; mahtih bekin, nadeh cu ama ca in nemcuamnak ikaw a neih?

¹⁷ A khan sung hempoh khuathim sungah an ei in, khaw-ngaihnak, natnak le thinuknak tuah um sih hi.

¹⁸ Mah hangin ka muhsuahmi cu hi bangin hi: Mihingin, a phabelin, a bawl theihmi cu Pathian in, hun comno a piak sungah ei le in henna, a nadeh suahmi sung pen a ngahmi nopsakpih na hi poh hi. Hi cu a covo hi.

¹⁹ Pathian in mihing cu a nopsaknak tukin hauhnak le nate a pia tale, a nadehman cu nopsak pihin, lungdam pih bok tuk hi. Mahmi cu Pathian i laksawng hi.

²⁰ Mahtibang mihingin, mi khancom a hihlam ngaisung kha sap tukma, itahim titale Pathian in, a lungmu cu lungdamnak tuah dimtik hi.