THUHILHTU 4 - Ngawm Bible

¹ Leihum a, bawlsiatnak a thuaktu tei thu la ngaisung ing. Bawlsiatnak a thuaktu tei hitui mu ing; thapiatu kuamah nei haw ma! Mi bawlsiatute cu a khutsung hawah thil tih theihnak nei haw in, a bawlsiat haw mite cu kuamah bawmtu nei haw ma.

² A nungdam laihte cu a thi sate sangin mi bawngpha saw haw hi, tin ngaisung ing.

³ Amuhte sangin mi bawngpha saw cu leihum a, na pha ngawl bawlmi hempoh amu laih ngawltu le a piang ngawl laihte haw hi.

⁴ Mihingin, haksa zetin nadekin, a bawlsuah theihmi hempoh hi: a mihing pih a iksik hangin hi, tih mu ing. Hi hei hi phukthong, huih hil li bang thong hi.

⁵ “Misil cu nadek ngawlin a khut zakawi in, a umthong hangin a dawllam ten an ngawlin thi,” ti haw hi.

⁶ “Khut nih tuah cimzet nadekin, huih mat tuk tum lih sangin, lungmu nop zetin, demno neih cu pha saw, ti ing.”

⁷ Nun sung a, imah tuk ngawl pa khat mu lehleu ing.

⁸ Mi pa khat cu capa nei ma, unau hei nei ngawl; amah bek um a, mihau hi nuamin, cawlngawlin nadek li naven a hauhnakah a lungkim awng ma hi. “Akua i ca kaw hi bang lawlawm nadekin, nunnopnak hun hei nei ngawlin ka um?” tih hei ngaisung kha awng ma. Hi hei hi phukthong hi in, a nop viang ngawlmi nunnak hi.

⁹ Mi pa nih cu pa khat sangin pha saw haw, itahim titale dehman tam saw in ngah haw hi.

¹⁰ Pa kha khat a bah kha sual hei in, adang pa khat saw in, phongin, domto hi. Mahnaven mi pa khat bek cu a bah kha sual tale hehpihhuai em, phongtotu kuamah nei ma hi.

¹¹ Mi pa nih a zaukawm haw tale, a khua haw lum hi. Mahnaven mi pa khat bek cu iti bang khawlum thei tuk heng?

¹² Mi pa khat bek cu neh baihzet; mahnaven pa nih cu tang kawm theizet haw tuk; khauzang thum hual cu baihno in, cat awng ma hi.

¹³ Midang tei ngaihsutnak piakmi hei a sang nuam ngawlmi, a teksil zo kumpi sangin, khangno ca-ngah micip pha saw hi.

¹⁴ Thawnginn pen a suakmi cu kumpi hei cangleh thei a, a ngam sungah ca-ngah siat thei in, a piangmi hei in, kumpi in suak thei hi.

¹⁵ Hi leihumah a ummi, mihing hempoh tei thu ka ngaihsut ten mah mihing tei lak pen ama ngam sungah kumpi dek thei munkhatah um tih thei ing.

¹⁶ Kumpi i ukmi cu mihing sial ceng ngawl hi haw tuk naven, a thih ten a bawlmi nate hangin, a humah kuamah a lungdam um cuang haw tukma hi. Hi hei hi phukthong haw a, huih hil li bang leng thong hi.