THUHILHTU 10 - Ngawm Bible

¹ Tho thisa in, pak namtui cu uihtik thei hi. Silnak dawmno in, cihnak tampi susia thei hi.

² Micip ngaihsutnak cu thumanah nungca in, Misil ngaihsutnak cu thusia lamah kawi hi.

³ Lam hawhthah hei in, ngaihsutnak nei ma hi. Mi hempoh lakah a silnak phuang pepel hi.

⁴ Bawi pa khat na humah a thinuk ten, Na nadeh pen tul pahsun. Niamkhiatnakin, khelhnak tampi damtik hi.

⁵ Hi leihumah thuman ngawl ka muhmi umin, Uktu tei thuman ngawlnak pen a piangmi hi.

⁶ Misil ten dinmun sang nadeh dek haw a, mihaute cu nemsuk haw hi.

⁷ Cipuh humah salte khung haw a, bawite cu sila bangin ke tuah a hawh haw mu ing.

⁸ Khuk a cotu cu a sungah amah cak tuk a, kulhtian a phia tute cu ngulin, cik tuk hi.

⁹ Suang a cotu cu maliamnak tawk tuk hi. Thing phuk ten thing tuah liam tuk hi.

¹⁰ Heipi mawlzet cu a tat masa ma tale, zaangtha tampi a man kul tuk; cihnak a nei ahin, lawhting deuh tuk naven.

¹¹ Ngul mat dan a thei ten a man masa haw ma tale, ngulin amah cik masa tuk hi.

¹² Micip cu a awnkam tuah mi i hehpih co hi. Misil cu ama mukkamin siatsuahdun hi.

¹³ Zolthu vocang a kam pen tul a, A ot tawpnak cu sil tawpnak na hi leng.

¹⁴ Misil ten awntam li haw hi. A hilh tukmi thu hei kuamah in thei haw ma. Ama nungten i cang tuk hum tih theih ma hi.

¹⁵ Khuapi hawhnak lampi hei thei zo ngawl Misil ten tha tehin nadek haw hi.

¹⁶ Ngam uktu kumpi khangno zetin, a hotu hawte zankhua in puai bawl haw. Mah ngam cu mailam ca muansan tuk nei ma hi.

¹⁷ Mahnaven kumpi miphun u hi in, pasal pha thuson thiambel a hih i humah, ngam sung hotute cu hun man zetin tui an ei haw hi. Supnak nei in, zu um ngawlnak ngam cu mi bawngpha ngam haw hi.

¹⁸ Zulzau hangin innsun cimsuk lawluangin, Thazawng hangin inn nguah cak kukuih thei hi.

¹⁹ An cu mi lungdamtikin, sabit cu mi lungnoptiktu hi, sumin, na hempoh cangkimtik hi.

²⁰ Kumpi cu a kuhno hei in, tam kha pahsun. Na zaunak khanah hei in, mihau sonsia pahsun. Itahim titale huih lak a, vano ten na thuson uh hempoh lenpihin, pua kha haw tuk hi.