THUHILHTU 1 - Ngawm Bible

Nunnak Hi Phukthong

¹ Jerusalem kumpi, David capa Thuhilhtu i hilhmite:

² Thuhilhtu in hi bangin ti hi: Phukthong haw hi, phukthong haw hi, Na hempoh hi, phukthong haw hi;

³ Mihingin leihum a nun sungin a nadehmi le a cimkhamnak hempohin, i nemcuamnak kaw a ngah?

⁴ Khan khat bo in, khan dang suak, mahnaven leihum cu kho leleng.

⁵ Ni vang suakin, tumkik, a suahnak lamah kikin, tumkik leleu,

⁶ Huih cu hanglamah theu in, saklamah theu kik, kot kawkawi in, a patnakah hengkikleh hi.

⁷ Lui hempoh tuipi thuanthumah luang haw naven tuipi thuanthum cu dim cuang ma hi; Lui cu a naaklamah kikleh haw a, A luandan bang lengin, luangkik haw hi.

⁸ Na hempoh hi lungkhamtiktu na hi haw; Mihing kam pen son zawh tuk kha ma hi. Mitin, a muhmi hi kham tih um ngawlin Beng hei in, a zakmi hi ciat tih nei ma hi.

⁹ Thil a um sa mite umleh tuk hi; Na bawlsa mite bawlkik hi haw tuk; Vanhaang nuai ah thil thak imah umma hi.

¹⁰ Akua bekin, “Zo hem un, hihi thil thak hi,” a tih theih haw mi um awng maw? Um ma, A suah laih uh ngawl cawngin, a umsa mi ngeh haw hi.

¹¹ Tanglaih khan cu kuamah in thei haw ma toh; A heng tukmi khan hei cu, A khanglehte hei in, thei haw tukma toh hi.

Thuhilhtu i Muhsuahmi

¹² Kei Thuhilhtu hi, Jerusalem ah Israel kumpi ing.

¹³ Van nuai a, thil umdan hempoh hi cihnak mangin theihcian le mu suak tukin ngaisung ing. Pathian in, mihing humah haksatnak a piakmi ka zoh ten khawngaihhuai ngangai hi.

¹⁴ Leihum a, na bawlmi hempoh hi mu zo ing. Zo hem un, phukthong haw hi, phukthong haw hi; huih hil li ahin mah tuah bangve.

¹⁵ A kawi sa mi cu camlehtik theih ma hi, A um ngawlmi cu sial theih ma hi.

¹⁶ Keimah le keimah cu: “Ka laih ngawl a, Jerusalem a uktu hempoh sangin cihnak tam saw nei ing. Ka lungmu in, cihnak le theihnak cu nase zetin nei ing hi,” tidun li ing.

¹⁷ Cihnak le silnak, theihnak le mibat ngawlnak a lamdannak zei ing. Mah vang cu phukthong haw hi, huih hil li bang leng thong haw poh hi.

¹⁸ Cihnak a tam ten buainak tam, Theihnak a tam ten khaw-ngaihnak vang tam sesem hi.