THIAMPI NADEHNAK 3 - Ngawm Bible

Lemnak Biakpiaknak

¹ Mi pa khatin lemnak biakpiaknak tukin a khui a pia, tale khuicang ahimata khuipi sonbang ngawlmi hi tuk hi.

² A khui lu humah a khutsuan tuk a, Topa i umnak Puanbuk kongka ah a khui cu ngo tuk hi. Aaron casuan thiampi ten biaklandawh ningli ah khui thisan cu theh haw tuk a,

³ a nuailam a, cik cu Topa i nelah pia haw tuk hi; a sungngil hum a, kopmi a thau,

⁴ a kal le a hum a, ummi a thau le a thinkak hum a, kopmi a thau hi tuk hi.

⁵ Hi hempoh cu halkang biakpiaknak a, piakmi tuah thiampi ten biaklandawh humah haal haw tuk hi. Hi halkang biakpiaknak ngim cu Topa i ca in, a namtui mi hi.

⁶ Lemnak biakpiaknak tukin tuu ahimata keel hihen a piak haw ten a nu ahimata, a cang hei hi thei; mahnaven sonbang ngawlmi hi loli tuk hi.

⁷ Mi pa khatin tuu a pia tale,

⁸ Mah a tuu i lu humah a khutsuan tuk a, Puanbuk kongka pen ngo tuk hi. A tuu thi cu Aaron hin thiampi ten biaklandawh ningli ah theh haw tuk hi.

⁹ a nuailam a cik cu Topa i nelah pia tuk hi; a sunglam a, ummi a lap hempoh,

¹⁰ a kal le a hum a, um a thau le a thinkak hum a, um a thau hempoh hi tuk hi.

¹¹ Topa i lak piak mite cu thiampi in biaklandawh humah haal khawng tuk hi. Hi cu Topa i nelah halkang biakpiaknak a, piakmi an hi.

¹² Mi pa khatin keel a pia tale,

¹³ a keel lu humah a khutsuan tuk a, Puanbuk maiah ngo tuk hi. Thiampi ten a thi cu biaklandawh ningli ah theh haw tuk a,

¹⁴ a nuailam a, cik cu Topa i nelah pia haw tuk hi; a sungngil hum a, um a thau hempoh,

¹⁵ a kal le a kal hum a, um a thau le a thinkak hum a, ummi a thau hempoh hi tuk hi.

¹⁶ Hi hempoh cu Topa i lakah halmi namtui hi tuk a thiampi in biaklandawh humah haal tuk hi. Hi cu Topa i lakah halkang biakpiaknak a, piakmi an hi, a thau hempoh cu Topa ta hi.

¹⁷ A thau ahimata, a thi hihen, Israel mi in ei hihim pahsuh un hi; hi thu cu khang tawntung, ilai banglaiah na um uh hei in, na zui tuk uhmi daan hi.