THIAMPI NADEHNAK 19 - Ngawm Bible

Thianthohnak le Dikcangnak Daan

¹ Israel mipi tei nelah hilh tukin,

² Topa in Moses nelah hi bangin hilh hi, “Keimah ka thiangtho bangbokin thiangtho un hi. Topa na Pathian uh ing.

³ Kuakua hei in mah i nu le pa cu upat tek unna, ka thupiakmi bangin Sabbath ni cang un hi. Keimah cu Topa na Pathian uh ing.

⁴ Ka lak pen tai in milim bia pahsuh un; daal tuah pathian zuk bawlin bia pahsuh un. Keimah cu Topa na Pathian uh ing.

⁵ “Pawlkom biakpiaknak tukin ngan na ngawh uhten ka piaksa mi daan zui unna, mahten na piak uhmi biakpiaknak cu sang tung hi.

⁶ Na ngawh uhmi cik cu na ngawh ni-in, ahimata a zingten ei un hi. A ni thumnak a tangmi cik cu mei tuah haal un.

⁷ Itahim titale cik thiangtho ngawl a hih hangin mi pa kha khatin, a ei ahi tale na bawl uhmi biakpiaknak cu sang tuk mang hi.

⁸ Ka lak a, piaksa mi a eih hangin le na thiangtho a simsial ngawl hangin misualah cang hi. Mah hangin amah cu ka hinnam sungah sialcih hi tukma toh hi.

⁹ “Na lo sungah an na lak uhten lo ngi a um tianin la pahsuh un; na zamsa uhmi ansangte vang zeileh pahsuh un.

¹⁰ Na lak khelh uhmi sabit ngah, ahimata leihum a cakmi sabit ngah zeileh tukin na dum uhah hawhleh pahsuh un. Mah mite cu mi ca-ngah le mi khual, sakzin, hangzin mitei ca in zam un hi. Keimah cu Topa na Pathian uh ing.

¹¹ “Nguca pahsun; mizol pahsun, zol thu son pahsun.

¹² Na zui tuk ngawlmi thutepnak ka minin bawl pahsun; ka minsiatik ci. Keimah cu Topa na Pathian uh ing.

¹³ “Nangma metnak tuk hangin mi nauneh pahsun: midang thil sut pahsun. Midang i nilawh man cu zan khatno hei kem hih pahsun.

¹⁴ Bengbul tamsia pahsun; mitcaw pa bah hen tin, a maiah thil pa kha khat koih pahsun. Keimah kihca in, Topa na Pathian ing.

¹⁵ “Midang tei thu na khen ten pat bul nei ngawlin thuman le lamcam zetin sonin hi; mi ca-ngah pan cuang pahsun; mihau vang lau cuang pahsun.

¹⁶ Zolthu son pepel pahsun; mi pa kha khatin nunnak le thihnak thu a son ten na thu sonmi a nemcuam tuk tale maisong ngawlin hilhin, keima cu Topa ing.

¹⁷ “Na unau huat mi nei pahsun; amah hangin misual na hih ngawlnak tukin khial hi na titale ciangno in hilh saw in hi.

¹⁸ Kua i hum hei ah phuba la pahsun; mi na huatnak vang na lungmu sungah cingleng pahsun; nangmah na ihdun bang bokin midangte it in hi. Keimah cu Topa ing.

¹⁹ “Ka thupiakmi zui un. Inn ngulh ngan phun bangten ngawl ca nei tukin phialduntik pahsuh un. Lo pa khat sungah anci nam nih cing kop pahsuh un. Nim nam nih a tahmi puan silh pahsuh un.

²⁰ “Mi pa khatin ama sila nu cu midang pa khat i zineu tukin zuak tukin thutiam naven, a man a ngah laih ngawlin mah a sal nu cu a sualpih tale, a pa nih haw in thah hi haw tukma hi; a salnu hi leleng laihin, a luat laihngawl a hih hangin dantat piak tuk bek hi.

²¹ Mahpa in tuucang pa khat mawhnak ca biakpiaknak tukin ka umnak Puanbuk kongka ah hunpih tuk a,

²² mahmi tuah a sualthiannak tukin thiampi in thiantiknak bawl tuk a, Pathian in ngaidam tuk hi.

²³ “Kanaan ngam hengin, thingkung na phut uhten masa beel kum thum sung mah thingngah cu a thiangtho ngawlmi thingngah hi, tin ngaisung unna, ei pahsuh un.

²⁴ A kum linak ten thingngah hempoh cu keimah na Topa uh humah lungdam langtiknakin ka nelah ap khawng un hi.

²⁵ Mahnaven a kum nganak ten a ngahte cu ei un hi. Hitih bangin na bawl uh tale na thingkungte cu tam sesemin ngah tuk hi. Keimah cu Topa na Pathian uh ing.

²⁶ Thisan telmi cik cu ei pahsuh un. Pol le mizial bawl hihim pahsuh un.

²⁷ Mi thi ngaih hangin, na phu dip hum uh a sam met pahsuh un.

²⁸ Mithi ngai in, na mai uh caantik pahsuh un, na taksa uh vang sun pahsuh un. Keimah cu Topa ing.

²⁹ “Na canu uhte cu biakinn a, numei pha ngawl hihnak tuah a mai haw nintik pahsuh un. Mahti bangin na bawl uh tale Pathian dang tei nelah tai hi tuk uh ci a, hi ngam cu nu le pa sual nawngkainak tuah dim tuk hi.

³⁰ Sabbath ni cang un. Keimah na biaknak uh ka munthiang cu upat un. Keimah cu Topa ing.

³¹ “Mithi hawvang a samthiamtu pol tei lakah kungkhai pahsuh un. Mahti bangin na bawl uh tale mithiang ngawl hi tuk uh ci. Keimah cu Topa na Pathian uh ing.

³² “Kum upa upat unna, kihcaknak nei un. Keimah kihca un. Keimah cu Topa ing.

³³ “Na ngamsung uh a, um bokmi ngamdangte bawlsia pahsuh un.

³⁴ Israel miten na zohdun uh bangbokin, amuh vang zo bok un. Nangmuh le muh na ngaihsakdun uh bangin amu ca ngaihsutsak bok un. Izipt ngam sungah mikhual na hih uh laih khi phawk ngil pahsuh un. Keimah cu Topa na Pathian uh ing.

³⁵ “A com le sau tehnak, a ngit le ngit ngawl khainak, a tam le a dem sialnakin hihen, thil man ngawl mangin, mizol pahsuh un.

³⁶ A com le sau tehnakin, a man mi tehnak mang un: a ngit le ngit ngawl khainakin, a man mi cuai mang unna, a tam le a dem sialnakin, a man mi nate mang un. Keimah cu Topa na Pathian uh ing. Izipt ngam pen nangmuh a suahtu ing.

³⁷ Ka daan le ka thupiakmi hempoh zui un. Keimah cu Topa ing,” ti hi.