THIAMPI NADEHNAK 18 - Ngawm Bible

Khammi Nupa Sualnak

¹ Topa in Moses lakah,

² “Keimah cu Topa na Pathian uh ing.

³ Na um awngnak uh Izipt ngam tei nuncan bangin nung pahsuh un, ka henpih tukmi Kanaan ngam mihing tei bawl bang vangin bawl pahsuh un.

⁴ Keima daan bek zui unna, ka thupiakmite zui un hi. Keimah cu Topa na Pathian uh ing.

⁵ Bawl tuk a, ka tihmite bawl unna, zui tuk ka piak mi daan zui un hi; mahti bangin na bawl uh tale nung tuk uh ci. Keimah cu Topa ing hi,” ti hi.

⁶ Topa in, a nuailam a daan hi, amuh tei nelah pia hi. Kua hei hihen mai unaupihte tuah nupa sualnak bawl pahsuh un.

⁷ Na nu tuah sualin, na pa i zahcak mualphonak bawl pahsun. Nangmah hingtu na nu a hih hangin a mai nintik pahsun.

⁸ Na pa i zi dang tuah sualin, na pa i mualphonak bawl pahsun.

⁹ Inn khat sungah khuasa mi na hi uh hei in, na hi uh ngawl hei in hihen, na celnu ahimata nu dang hin na celnu sualpih pahsun.

¹⁰ Na tu nu sualpih pahsun, na mualphonak hi tuk hi.

¹¹ Na pa i zileh canu kenmi sualpih pahsun, na celnu hi bok hi.

^12-13 Na ni ahimata na nu le na pa tei unau sualpih pahsun.

¹⁴ Na pa i suahpih tei zi tuah sual pahsuh un, na nu hi bok hi.

¹⁵ Na capa i zi tuah sual pahsun.

¹⁶ Na mo tuah sual pahsun.

¹⁷ Na sualpih mi numei nu i canu ahimata tu nu tuah sual pahsuh un; na unau pih hi leng bok hi, mahtibang cu thil nawngkai zetmi hi.

¹⁸ Na zi a nun sung hempoh cu na zi i unau cu zi in huai pahsun.

¹⁹ Numei daan a nei laih hunin numei zaupih pahsun, itahim titale mi thiangtho ngawl hi.

²⁰ Midang tei zi sualpih pahsun, itahim titale mi thiangtho ngawlin suak tuk ci.

²¹ Molek pathian biaknakah na ca pia pahsun; itahim titale Topa na Pathian i min siatiktu in suak tuk hi. Amah bek hi Topa hi.

²² Pano akua bang hei hihen a dang pano tuah sual pahsuh hen, mahti bang cu Pathian i huatmi hi.

²³ Pano hihen, ngamsa tuah sual pahsuh un hi; mahti bangin nawngkai in, na um uh tale mi thiangtho ngawl hi tuk uh ci.

²⁴ A hum a, khammi hi bawlin mi thiangtho ngawlin bawlduncop pahsuh un. Hi ngam na hen uh laih ngawlin a umtu Pathian thei ngawltu ten a hum a, kham mite a bawl haw hangin mi thiangtho ngawlin suak haw hi. Mah hangin noh ten a umnak haw na luah theihnak tukin, Topa in hawlvawk sak hi.

²⁵ A bawlmi haw hangin a ngam haw tianin ngam thiangtho ngawlin suak hi. Mah hangin Topa bawlsia in, a ngam haw vang lawlin um hi.

^26-27 Hiti bang ningdelhhuai thil bawlin a ngam haw cu nintik khawng zo haw hi. Mahnaven noh cu Topa i daan le thupiakmite zui unna, Israel mi hihen, na lak uhah ummi ngamdangmi hihen, kua hei in, hi tih bang thil sual cu bawl pahsuh un hi.

²⁸ Mah tih bangin na zui uh tale na mu laih ngawlin a umtu Pathian thei ngawlte a lawl bangin noh cu hi ngam pen lawl tukma hi.

²⁹ Hitih bang thil nawngkai le ningdelhhuai a bawltu cu Pathian hinnamin sialcih khak tukma toh hi tih cu thei tuk ci.

³⁰ Topa in, “Ka thupiakmite hi zui un hi; hi ngam na hen uh laih ngawlin a ummi tei nuncan cu zui pahsuh un; a nuncan haw zui in, mi nawngkai in bawlduncop pahsuh un. Keimah cu Topa na Pathian uh ing,” ti hi.