THIAMPI NADEHNAK 17 - Ngawm Bible

Thisan Thiangtho Biakpiaknak

¹ Topa in Moses nelah,

² Aaron, a capate le Israel mi hempoh tei nelah a nuailam daan hilh tukin, thupia hi.

^3-4 Israel mi pa kha khatin khui hihen, tuu le keel hihen Topa i nelah biakpiaknak a bawl ten, Topa i umnak kongka sial ngawl, mundangah a ngo tale daan palcattu hi. Thisan a tultik hangin amah cu Pathian i hinnamah sialcih tuk kha ma toh hi.

⁵ Hi thupiakmi i tihnuam mi cu Israel miten mun dadangah a ngawh mek haw mi, ngan cu Topa i nelah hunpih khawng kul tihnak hi. Puanbuk kongka a, ummi cu thiampi nelah hunpih haw tuk a, lemnak biakpiaknak tukin ngo haw tuk hi.

⁶ Puanbuk kongka el a, ummi biaklandawh kimsuakin thiampi in mah thi cu theh tuk hi. A thau cu Topa i ca in, a namtui hi tukin haal tuk hi.

⁷ Israel miten a ngan haw cu mun dadangah ngo in keel khawhuai tei lakah biakpiaknak a bawl haw hangin, Topa i mai ah numei pha ngawl bangin suak haw naven, mah ti bang cu hi haw tukma toh hi. Hi daan cu Israel miten a zui leleng haw tukmi hi.

⁸ Israel mi pa kha khat ahimata Israel tei lak a, ummi ngamdangmi pa kha khatin halkang biakpiaknak le biakpiaknak dang hihen,

⁹ Topa i nelah a piak ten Puanbuk tumnak kongka ah hi ngawlin, mundangah a pia tale amah cu Pathian miphunin sialcih hi tukma toh hi.

¹⁰ Israel mi pa kha khat ahimata Israel tei lak a, um nam dangmi pa kha khatin sathi a ei tale, Topa i mitmai pha ngah tukma hi. A hinnam sung hei pen suah hi tuk hi.

¹¹ Iti bang ngamsa ahi vangin a nunnak cu a thi sungah um hi. Mah hangin thi hempoh cu mihing tei sualhahnak tukin biaklandawh humah leih un hi, tin Topa in thu a piaknak hi. Nunnak ahi mi thisanin sual thiangtik hi.

¹² Mah hangin Israel mi le ngamdangmi hihen sathi ei pahsuh un tin, Topa in, a tihnak hi.

¹³ Israel mi pa kha khat, ahimata a lak haw a, ummi ngamdangmi pa kha khatin eih thiangmi ngamsa le vano hihen a man tale, a thi cu leihumah lei henna, leivul tuah khuh hen hi.

¹⁴ Itahim titale ngamsa i nunnak cu a thisan sungah um hi; mah hangin sathi ei pahsuh un. Sathi a eitu cu a miphun sung pen suah hihen tin, Topa in Israel mite a tihnak hi.

¹⁵ Israel mi hihen, hinnam dang hihen, a mahno a thi cawm mi ngamsa, ahimata sahang i matmi cik a ei tale, a puansawp khawng hen hi. Tuibual tuk a, mah ni taklam tian mithiang ngawl hi tuk hi.

¹⁶ Mahti bangin a bawl ma tale, a mawhnak cu amah in thuak tuk hi.