THIAMPI NADEHNAK 16 - Ngawm Bible

Lemdunnak Ni

¹ Topa i nelah a thiangtho ngawlmi halkang biakpiaknak a bawl haw hangin Aaron i capa pa nih a thih nung haw ten, Topa in Moses nelah hi bangin thu hilh hi.

² “Na u Aaron phano in hilh inna, puanzak nung a, Mun Thiangthobel ah a hun ngawlpi in tum tuk ngawl hilhin hi. Itahim titale a hun ngawl pi in, a tum kha tale thi tuk hi. Mah laih mun cu Thutiam Kuang sin humah meingo sung pen ka langnak mun a hih hangin hi.

³ Sualhah biakpiaknak tukin khuicang le halkang biakpiaknak tukin tuucang a hunpih bek ten Mun Thiangthobel ah tum thei tuk,” ti hi.

⁴ Topa in, a nuailam a daan pia hi. Mun Thiangthobel sungah a tum laih ngawlin Aaron cu tuibualta tuk a, thiampi thuam angki cual manpha, sungsilh, taikilh le lupawng thuam tuk hi.

⁵ Israel mipi ten Aaron nelah sualnak biakpiaknak tukin keelcang pa nih, halkang biakpiaknak tukin tuucang pa khat pia haw tuk hi.

⁶ Ama sualhahnak le a innkua tei sualhahnak tukin khuicang pa khat biakpiaknak tukin pia tuk hi.

⁷ Mah nungten Topa i umnak Puanbuk kongka ah keelcang pa nih cu hunpih tuk hi.

⁸ Mahlaiah “Topa i ca tuk” tihmi le “Azazel ca tuk” tihmi suangphut pa nih tuah aisannak bawl tuk hi.

⁹ Topa i ca in tenmi keelcang pa khat cu Aaron in sualhah biakpiaknak tukin pia tuk hi.

¹⁰ Azazel khawhuai ca tukin ten mi keelcang cu a nungin, Topa i nelah ap hi tuk a, Israel hinnam tei sualhahnak tukin phillawn khawhuai Azazel nelah hah tuk hi.

¹¹ Aaron in ama sualhahnak le a innkua sualhahnak tuk khuicang biakpiaknakah a piak ten,

¹² biaklandawh pen meiling khuang khat le namtui pham nih la in, Mun Thiangthobel ah hunpih tuk hi.

¹³ Mahlai a, Topa i umnak munah namtui cu haal tuk a, namtui khu in Thutiam Kuang cu tuam tuk hi; mahten Thutiam Kuang sin cu mu ngawlin thi tukma hi.

¹⁴ Khuicang thi khenkhat cu la tuk a, khut mikawk tuah kuang sin i mailam mawkah theh tuk hi. A khenkhat cu Thutiam Kuang i mailam mawkah vei salih tian theihbok tuk hi.

¹⁵ Mah nungten Israel tei sualhahnak tukin Keel cu ngo in, a thi cu Mun Thiangthobel ah hunpih tuk hi. Khuicang thi a theh bangbokin mah thi cu Thutiam Kuang sin le mailam mawkah theh tuk hi.

¹⁶ Mah bangin Israel hinnam i thianthoh ngawlnak le sualnak pen Mun Thiangthobel cu thiangthotik tukin biakpiaknak bawl tuk hi. A ciang ngawlmi ngiahnak laizangah a um hangin Aaron in Puanbuk cu mah ti bangin thiangtik tuk hi.

¹⁷ Thiangthotik tukin Mun Thiangthobel ah Aaron cu tumin, a tulleh laklawh kuamah Puanbuk sungah um haw tukma hi. Amah le a innkua ca le Israel mipi ca in thiannak a bawl khawng tuk hi.

¹⁸ Mun Thiangthobel pen tul tuk a, halkang biakpiaknak bawl tukin le biaklandawh thiangtik tukin biaklandawhah hawh tuk hi. Khuicang thi khenkhat le keelcang thi khenkhat cu hunpihin, biaklandawh a kil a um ki cu a kimsuakin noih tuk hi.

¹⁹ A khut kak tuah mah thi a khenkhat cu biaklandawh vei salih tian theh tuk hi. Israel hinnam sualnak pen biaklandawh cu thiangtik tuk a, thiangthomi in bawl tuk hi.

Ai-awhtu Keelcang

²⁰ Aaron in Mun Thiangthobel ah, Topa i umnak Puanbuk sung hempoh le biaklandawh thiangtik tukin biakpiaknak a bawl ceng ten a nungmi keelcang cu Topa i nelah pia tuk hi.

²¹ Mah keel lu humah a khut pa nihin suan tuk a, mah lu humah Israel hinnam tei phatngawlnak, sualnak le Pathian a dodalnak hempoh cu phuang khawngin, mahten keelcang humah hengtik khawng tuk hi. A cial haw mipa in keelcang cu phillawnah hawlvawk tuk hi.

²² A sualnak haw hempoh cu kuamah um ngawlnak ngamkhing lamah keelcangin pua khawng tuk hi.

²³ Puanbuk sungah Aaron cu tum tuk a, Mun Thiangthobel sung a tum laih ngawlin a silhmi thiampi thuamte cu dukin, koih tuk hi.

²⁴ Mun Thiangtho ah tuibualin ama puansilh tuk hi. Mahnung ten tulin Israel hinnam i sualnak le ama sualnak hahnak tukin halkang biakpiaknak bawl tuk hi.

²⁵ Sualhah biakpiaknak ngan i thau cu biaklandawh humah haal tuk hi.

²⁶ Phillawn khawhuai Azazel nelah keelcang hawlvawktik mipa in, Israel hinnam umnak munah a kihleh laihngawlin tuibualta tuk a, puan sawp ciang khawng tuk hi.

²⁷ Sualhahnak tukin a ngawh haw mi khuicang le keelcang sualhah biakpiaknak tukin a thisan Mun Thiangthobel munah a ken mi cu a ngiahnak pen pualamah tulin haal haw tuk hi. A vun, a cik, a sungngil haw tian haal khawng hi tuk hi.

²⁸ A haltu pa cu ngiahnak munah a kihleh laih ngawlin, a puan sawp ciang khawng tuk a, tuibual tuk hi.

Lemnak Ni Can Daan

²⁹ A nuailam a daan hi a kumkhua in, na zui tukmite hi. Ha salih ha, ni sawm ni-in Israel mi hempoh le amuh tei nelah a ummi hinnam dang cu ancang haw tuk a, imah dek haw tukma hi.

³⁰ Mah ni-in, a thianthohnak haw tukin le a sualnak hempoh pen a thianthohnak tukin thiantiknak bawl haw tuk hi.

³¹ Mahmi cu ni thiangtho ngangai hi tuk hi. Ancang haw tuk a, kuamah nadek haw tukma hi. Hi daan cu kumkhua in zui haw tuk hi.

³² A pa i nadeh dawntu tukin komno in, sathau thihmi le Pathian nelah piakmi Thiampi Sang in thianthohtiknak cu bawl tuk hi. Thiampi thuam silhin,

³³ Mun Thiangthobel, Topa i umnak Puanbuk sung hempoh, biaklandawh, thiampi le Israel mipi a venghawng ca tukin thianthohnak cu bawl tuk hi.

³⁴ Hi daan cu mailam a nun sung hempoh ah a zui haw tukmi hi. Hih thianthohnaktik cu Israel mite a sualnak haw hah tukin le thiangthotik tukin kum khatah vei khat bawl hi tuk hi. Topa i thupiak bangin Moses in bawl hi.