THIAMPI NADEHNAK 12 - Ngawm Bible

Nauhin Nungten Thianthoh Dunnak

¹ A nuailam a daan hi Israel tei zui tukin Topa in

² Moses nelah pia hi. Numei pa khatin capa a hin ten, ha sial a neihmi numeidan i hangin mi thiangtho ngawlin sial a hih bangin, ni salih sung mi thiangtho ngawl hi.

³ Ni liatnak ten a capa cu vunceptan hi tuk hi.

⁴ A thianthohleh laklawh ni sawm thum le ni thum ngak hen hi. A thianthohdun hun a kim laklawh a thiangthomi na zen pahsuh henna, Puanbuk thiangtho sung heiah tum hih ma hen.

⁵ Canu a hing tale ha sial a neihmi thi hangin mi thiangtho ngawl a hih bangin ni sawm le ni li sung mi thiangtho ngawl hi. A thi tulnak pen a thianthoh laklawh ni sawm luk le ni luk sung ngak hen hi.

⁶ Capa hingin, ahimata canu hingin, a thianthohdun hun a hen ten kum khat kim tuuno pa khat halkang biakpiaknak tukin Topa i umnak Puanbuk tumnak kongka a, um thiampi nelah hunpih tuk hi. Laileng pa khat ahimata khulo pa khat vangin sualhah biakpiaknak tukin hunpih hen hi.

⁷ A ken mi biakpiaknak cu thiampi in Topa i nelah piak tukmi a nawngkainak thiangtho tukin biakpiaknak bawl tuk hi; mahbek ten numei thiangtho in suak tuk hi. Hi cu nauhing nawngkai thianthohnak tukin numei in, a zui kulmi daan hi.

⁸ Numei in tuuno pa khat hei a nei mata, khulo pa nih ahimata laileng pa nih, pa khat cu halkang biakpiaknak tuk, a dang pa khat cu sualhah biakpiaknak tuk hunpih tuk hi. A nawngkainak thiangtho tukin thiampi in biakpiaknak bawlsak tuk a, mah nu cu mi thiangtho in suak tuk hi.