SUAHTULNAK 6 - Ngawm Bible

¹ Pathian in Moses lakah, “Tu pepanin kumpi lak a, ka bawl tukmi cu mu tuk ci. Ka mihingte hah tukin ka cahnak tuahtik hihim tung. Mahnung ten amah hihimin, a ngamsung pen nuam ngawl zazalin hawlvawk tuk,” ti hi.

Pathian In Moses Samleh

² Pathian in Moses lakah, “Keimah cu Topa ing.

³ Ihempoh tithei Pathian tin Abraham, Isaak le Jakob lakah lang ing. Mahnaven a lak hawah Topa tihmi ka min thiangtho tuah langduntik mang hi.

⁴ ngamdangmi bangin a um awngnak haw Kanaan ngam cu pia tung hi, tin amuh tuah thutepnak bawl zo ing.

⁵ Atu-in Izipt miten sal a mat haw mi Israel tei taunak cu za ing a, ka thutepmi komno in cingleng ing.

⁶ Mah hangin nangmah in Israel tei lakah ka thu cu hilhin hi, ‘Keimah cu Topa ing. Izipt mitei nadeh haksazet sung pen luattik tung a, a sal haw na hihnak sung uh pepan tung hi. A lauhuai bawlsiatnak tuah a thu haw khen tung a, ka baantha ngil tuah hup tung hi.

⁷ Ka mihingin bawl tung a, keimah cu na Pathian uh hi tung hi. Izipt mitei sal hihnak pen a suahtultu Topa na Pathian uh ka hihlam thei tuk uh ci.

⁸ Ka tepsa mi ngamah henpih tung a, Abraham, Isaak le Jakob lakah ka tepsa mi cu nangmuta tukin pia tung hi. Keimah cu Topa ing,’ ti hi,” tin ti hi.

⁹ Moses in Israel tei lakah Pathian i hilh bangin hilh hi. Mahnaven Moses i thu hilhmi cu ngai kha haw ma; itahim titale a sal thuaknak haw nase leita hangin a lungbing le amthongin, a um khawng haw hang hi.

¹⁰ Topa in Moses lakah,

¹¹ “Izipt kumpi lakah hawh inna, Israel mite cu a ngamsung pen suaktik hihimin, tin hilhin hi,” ti hi.

¹² Mahnaven Moses in, “Israel mite hei in ka thu ngai haw ma si, itin kaw kumpi in ka thu cu a ngaih tuk? Awn kam tingsamzet ing,” ti hi.

¹³ Topa in Moses le Aaron tei lakah: “Izipt ngamsung pen Israel mite puitul tukin ka thupiakmi cu Israel le Izipt mitei lakah hilh un,” tin thupia hi.

Moses le Aaron Tei Innkua Sialsiahnak

¹⁴ A casuan haw cikhaihtu cu: Israel i catawntil Reuben capa pa li: Hanok, Pallu, Hezron, le Karmi hi.

¹⁵ Simeon i casuan cikhaihtu cu: Simeon i capaah Jemuel, Jamin, Ohad, Jakhin, Zohar le Kanaan nu i capa Shaul hi.

¹⁶ Levi i casuan cikhaihtu cu: Levi i capa tei min cu, a canau haw tuah Gershon, Kohath, le Merari hi. Levi cu kum za le sawm thum le kum salih nung hi.

¹⁷ Gershon i capate cu Libni le Shimei hi haw in, casuan tampi nei haw hi.

¹⁸ Kohath i capate cu Amram, Izhar, Hebron le Uzziel haw hi. Kohath cu kum za le sawm thum le kum thum nung hi.

¹⁹ Merari i capate cu Mahli le Mushi hi. Hi cu Levi innkua a casuan haw tangthu vang hi bok hi.

²⁰ Amram in, a pa i celnu Jokhebed huai in, Aaron le Moses hing hi. Amram cu kum za le sawm thum le kum salih nung hi.

²¹ Izhar i capa pa thum cu Korah, Nefeg, Zikhri hi.

²² Uzziel i capa pa thum cu Mishael, Elzafan le Sithri hi.

²³ Aaron in Amminadab i canu, Nashon i celnu Elisheba huai in Nadab, Abihu, Eleazar le Ithamar hing hi.

²⁴ Korah i capa pa thum cu Assir, Elkanah, le Abiasaf hi. Hihi Korah casuan cikhaihtu hi.

²⁵ Aaron i capa Eleazar in Putiel i canu lak pen pa khat huai in, Finehas hing hi. Hihi a innkua ten haw pen Levi hin cikhaihtu hi.

²⁶ Aaron le Moses hi Topa in, “Izipt ngam pen Israel mite cu puitul pih un,” tin hilh hi.

²⁷ Izipt kumpi lakah Israel mite Izipt ngam pen hah tukin a hilhtu cu amuhte haw hi.

Moses le Aaron Nelah Topa i Thupiak

²⁸ Topa in Moses lakah Izipt ngam pen thu a hilh ten,

²⁹ “Keimah cu Topa ing. Ka hilhmi hempoh cu Izipt kumpi lakah hilhin,” ti hi.

³⁰ Mahnaven Moses in Topa i lakah, “Na theihsa bangin awn lamah tingsam leita ing; Izipt kumpi in ka thu cu itin ngai nuam tuk kaw?” tin ti hi.