SUAHTULNAK 37 - Ngawm Bible

Thutiam Kuang Bawl Haw

¹ Bezalel in Thutiam Kuang cu thingha tuah bawlin, tong nih le lang sau, tong khat le lang zal, tong khat le lang sang hi.

² A sunglam hihen, a pualam hihen sui ngek luanin, a kimsuakin sui tuah bawlmi hi.

³ Suikual pa li bawlin langkhat lamah pa nih veve in, a ke pa liah bulh hi.

⁴ Thingha tuah a zawnnak ngolh pa li cu bawlin suikhu luan hi.

⁵ Thutiam Kuang zawnnak cu langkhat lam veve a, suikualah holh hi.

⁶ Thingkuang sin cu sui ngeh bawlin tong nih le lang sau in tong khat le lang zal hi.

⁷ A kuang sin i langkhat lam mawk veveah Cherub tihmi ngamsa zuk pa nih sui tuah bawlin,

⁸ mawk khatah pa khat veve koih hi. Adangno hi ngawlin a sin tuah pehdun khawng hi.

⁹ Cherub tihmi ngamsa zuk cu a humah a ha haw phalhin, kuangsin cu a ha haw in lim hi. Mai hekdunin kuangsin cu zo veve haw hi.

Cangho Luihnak Tuk Cabuai Bawl

¹⁰ Amah in thingha tuah cabuai bawlin tong nih sau, tong khat zal, tong khat le lang sang hi.

¹¹ Sui ngek tuah luanin, a kimsuak cu sui tuah khup hi.

¹² A mawk khapnak cu zung li zal, bawlin, a kimsuak cu sui leleng tuah khup hi.

¹³ Suikual pa li bawlin, a ke el cabuai kil liah bulh hi.

¹⁴ Mah suikual pa li cu cabuai zawnnak a lentu a hih hangin cabuai mawk khupnak zawnkekah bulh hi.

¹⁵ Zawnnak ngolh cu thingha tuah bawlin suikhu luan hi.

¹⁶ Cabuai hum a inmi biakpiaknak a, man tukin pakante, keute, khuat le kuangte cu sui ngekin bawl haw hi.

Meivaknak Khuam Bawl

¹⁷ Amah in meivaknak khuam cu sui ngek tuah bawl hi. A tawdam le a khuam cu pha zetin sukmi sui tuah bawl hi. A mawitiktu pak, a kuhkuum le a palh cu a khuam tuah pehdun khawng haw hi.

¹⁸ A khuam pen a kak pa luk tulin langkhatah kak thum veve um haw hi.

¹⁹ A kak tihkimah almond pak bangin a kuhkuum le a palh tuah a mawitiktu pak pa thum ten um haw hi.

²⁰ Meivaknak khuamah almond pak bangin a kuhkuum le a palh tuah a mawitiktu pak pa li um haw hi.

²¹ A kak kop khat nuaiah pak kuhkuum pa khat ten um hi.

²² Pak kuhkuum le a kak cu meivaknak khuam tuah pehdun khawng haw hi; sukmi sui pa khat tuah bawlmi hi.

²³ Meivaknak khuam pa khat humah meivak salih bawlin caiceh le daal kuangte cu sui tuah bawl hi.

²⁴ Meivaknak khuam le a na hempoh bawlnakin sui pawng za khat mang hi.

Namtui Halnak Biaklandawh

²⁵ Thingha tuah namtui halnak tukin biaklandawh bawl hi. A tung le a vang cu canve hi, tong khat sau le zalin, tong nih sang hi. A hum a bulhmi thingzum cu biaklandawh tuah pehdun khawng hi.

²⁶ A humah hihen, a hum a thingzum bulhmi le a mawk pa li hihen, suikhu luanin, a kimsuak cu sui tuah khup hi.

²⁷ Suikual pa nih bawlin mah biaklandawh puaknak ngolh holhnak tukin a mawk lek a, nuailam mawk nihah mah suikual cu bulh hi.

²⁸ A zawnnak ngolh cu thingha tuah bawlin suikhu lot khawng hi.

Sathau le Namtui Bawl

²⁹ A thiangthomi sathau thihnak tukin situi le zimui bawltu tei a bawl mek haw bangin a namtui zetmi zimui bawl hi.