SUAHTULNAK 34 - Ngawm Bible

Vei Nihnak Thukham Suangpek

¹ Topa in Moses lakah, “Amasa a, suangpeek bangin suangpeek pa nih bawlleh inna, na sukkeh siksek mi suangpeek hum a, ka ngat bangin nganleh tung hi.

² Zingten tuangtim ham inna, Sinai Mual humah kai in mualkulah keimah hu tawkin hi.

³ Kuamah na lakah hawh haw pahsuh hen; mual humah kuamah um haw ma hen; tuu le khui vang Sinai Mual elkimah tahaw pahsuh hen,” ti hi.

⁴ Mah hangin Moses in bawllehin Topa i thupiaknak bangin Sinai Mual humah suangpeek kengin, zingtungno in hawh hi.

⁵ Topa cu meingo sung pen tolhsuk a; Moses elah dingin, Topa tihmi a min cu phuang hi.

⁶ Topa cu Moses i maiah hawh vawkin, “Pathian Topa cu lainatnak le hehpihnak tuah a dimmi Pathian ing. Ka thinsau in, muantakmi le itnak a nei lelengtu ing.

⁷ A khomi ka ihnak cu khang thawng tampi tian kimtik ing, a mawhnak haw, a siatnak haw le a sualnak haw ngaidam ing. Mahnaven a pa tei sualnak hangin a canau haw le a casuan haw cu khang thum khang li tian thukleh tung,” ti hi.

⁸ Moses cu manlangzet lei tawngkha in, a lu kuunin Topa cu bia hi.

⁹ Moses in, “Topa ka humah na lungdam ahi tale hu hawhpih bok zalin hi. Hi Israel mite hi mi lungmu ngeng ngangai haw hi; mahnaven ka siatnak uh le ka sualnak uh cu ngaidam inna, nangma mihing ngangai in hu co zalin hi,” tin ngen hi.

Thutepnak Thaklehtik

¹⁰ Topa in Moses lakah, “Nangmuh tuah thutepnak bawl tung hi. Israel tei mitmuhah leihum miphun hempoh lakah bawl awng ngawlmi na lamdang bawl tung hi. Topa i thil a bawl theih daan cu nangmuh tuah a ummi hempohin mu haw tuk hi; itahim titale nohtei ca in thasiahhuai zetmi bawl tung hi.

¹¹ Tuni ka piak tummi thukham cu phano in zui un hi. Na mai uhah na hawh ngut uhten Amor mi, Kanaan mi, Hit mi, Periz mi, Hiv mi le Jebus mite cu hawlvawk khawng tung hi.

¹² Hi Kanaan ngam a, ummi mihingte tuah pawlkomnak thutiam na bawl ngawlnak tuk uhin cingcai zetin, na um un hi; itahim titale hite tuah pawlkomnak thutiam na bawl uh ahi tale nangmuh siatsuahtu thang bang hi tuk hi.

¹³ Mah sangin amu biaklandawh siatsuah khawng saw un hi; a suang thiangtho haw sukeh khawng un hi. Asherah milim vang phuk khawng saw un hi.

¹⁴ “Pathian dang bia pahsuh un,” itahim titale “Keimah cu micing thei Pathian ing,” ti hi.

¹⁵ Hi ngam a, mihingte tuah thutepnak bawl pahsuh un; itahim titale numei pha ngawl bangin a pathian haw bia in, biakpiaknak a bawl haw ten nohte vang khingkhai haw tuk a, biakpiaknak an ei sual tuk uh ci.

¹⁶ A canu haw vang na capa tei ca tukin huai in, mah numei ten numei pha ngawltu bangin a pathian haw ca in, na a deh haw hangin, na capa uhte cu pui sual haw tuk hi.

¹⁷ “Nangmu ca in thik huan tui in, milim bawl pahsuh un hi.

¹⁸ “Naman hel ngawl Cangho Puai cu bawl leleng un hi. Thu ka piak zo bangin ha masabelin naman tel ngawl cangho cu ni salih sung ei un hi; itahim titale mah ha, in Izipt ngam pen tul uh ci.

¹⁹ “Mihing hihen ngan hihen catawntil pawpoh cu kata hi; na khui uh hihen, na tuu uh hihen a hin masabel a pa pawpoh cu kata hi.

²⁰ Mahnaven laak i catawntil pawpoh cu mah ai-in tuu pa khat pia in tanleh un hi. Na tanleh uh ma tale, a ngawng melh ek un hi. Na catawntil pawpoh uh cu tan un hi. “Akua hei hihen biakpiaknak bawl ngawlin khut nguakcangin ka maiah hung thei tukma hi.

²¹ “Ni luk sung nadek unna, lo ngih hun le ancop hun ahi hei in ni salih ni ten nadek pahsuh un.

²² “Na sangvut uhte cop hunin, na cop pat uhten Anthak Puai bawl unna, kum a bo hun an na cop uhten Ancop Puai bawl un hi.

²³ “Na pano hempoh uh cu kum khatah vei thum Topa, Israel Pathian, Keimah bia un hi.

²⁴ Na mai uh pen miphun dang hawlvawk khawngin, na ngam uh ka zaltik ceng ten Topa na Pathian uh Keimah i maiah kum khatah vei thum puai bawl tukin na hun uh sungin kuamah in, na ngam uh cu neh tum haw tukma hi.

²⁵ “Ka ca in biakpiaknak ngan na piak uhten naman helmi cangho cu mang hihim pahsuh un hi. Kaltan Puai bawlin ngan na ngawh uhmi cik cu a zingleh tian koih pahsuh un hi.

²⁶ “Na lo sung uhah an na cop uh masabel mi sung pen a phabel cu Topa i innah hunpih un hi. “Tuu dawnno cu a nu i nawitui in huan pahsuh un hi” tin ti hi.

²⁷ Topa in Moses lakah, “Hi ka hilhmite hi nganin hi, itahim titale nangmah le Israel mi lakah thutiamnak ka bawlmi cu hi ka muk le kam pen a tulmi ka awnte hangin ka bawlmi hi,” tin ti hi.

²⁸ Mah hangin Moses cu sun sawm li le zan sawm li an ei ngawl le tui in ngawlin Topa i lakah um hi. Thutepnak awnkam Thukham sawm khat sung a, ummi Pathian awnkam cu suangpeek humah Moses in ngan khawng hi.

Mualhum Pen Moses Tolhsuk

²⁹ Moses cu suangpeek pa nih hum a, ngatmi Thukham Sawm khat cawi in, a tolhsuk ten, Topa tuah a otpihdun lih haw hangin, a mai cu al khawng hi; mahnaven amah in theidun ma hi.

³⁰ Aaron le Israel miten Moses cu zo in, a mai al amuh haw ten lau in nek ngam haw ma hi.

³¹ Mahnaven Moses in samin, Aaron le Israel mi puitute cu a lakah hawhleh haw hi. Moses in, a lak hawah thu hilh hi.

³² Mah nungten Israel mite cu a lakah hung khawng haw hi. Sinai Mual humah Topa i piakmi thukham hempoh cu Moses in Israel tei lakah pia hi.

³³ Thuhilh a celh ten Moses in mai khuhnak puan pa dildelno tuah a mai khuh hi.

³⁴ Topa tuah otpihdun tukin Topa i umnak Puanbuk sungah a tumsial ten a maikhuh cu hongin, buk sung pen a tulleh ten khuhleh hi. Buk sung pen a tul ten Topa i thupiak hempoh cu Israel mi lakah hilh sawlawn mek hi.

³⁵ Moses i mitmai cu al zetin mu haw hi. Thuhilh a celh ten a mai khuhnak tuah khuhleh hi. Topa tuah otpihdun tukin Puanbuk sungah a tumleh laklawh a mai cu khuh leleng hi.