SUAHTULNAK 29 - Ngawm Bible

Aaron Capa Tei Pumpiaknak

¹ “Aaron le a capate cu ka ca in thiampi dek tukin a pum haw a piak haw ten, hi bangin na bawl un hi. Sonbang ngawl khuicangno pa khat le tuucang pa nih na la un hi.

² Naman hel ngawlmi cangho, naman hel ngawl le situi tuah bawlmi cangho cunte le naman tel ngawl le situi tuah bawlmi cangho pheng vang la un hi. Hi cangho cu a phazet mi sangvut tuah bawl un hi.

³ Kho sungah koih unna, khuicang le tuucang pa nih na ngawh uhten kho sung a, cangho cu ka lakah pia un hi.

⁴ “Keima umnak puanbuk kongka ah Aaron le a capate cu na hunpih unna, tuibual haw hen hi.

⁵ sungsilh angki, a hum a, silhmi angki cualpi, awmkhaih, awmbelh le taikhap cu Aaron silhtik unna, taikhap vang khaptik un hi.

⁶ Lupawng vang a luah khimtik unna, mah humah calbelh vang belh un. Calbelh humah, “Topa i lak a piakmi,” tin khen un hi.

⁷ sathau la unna, a lu humah leihin, sathau na thih un hi.

⁸ “A capate hunpih unna, angki silhtik un hi.

⁹ A tai hawah tai kennak tuah na ken unna, a lu hawah lukhu khutik un hi. Thiampi hihnak kip le kho leleng tukin Aaron le a cate na bawl tuk uhmi hi. Amah le a casuan ten Keima nadek leleng haw tuk hi.

¹⁰ “Keima umnak Puanbuk maiah khuicang hunpih unna, Aaron le a capa ten a lu humah a khutsuan haw tuk hi.

¹¹ Khop khawmnak Puanbuk tumnak kongka, Topa i mai ah khuicang cu ngo un hi.

¹² Khuicang i thisan cu na kut mikawk uhin tok unna, biaklandawh hum a, thingzum na bulh uhmi humah mat un hi. A tanglaih mi a thisan cu biaklandawh bulah lei khawng un hi.

¹³ Mahceng ten a sungngil tuamtu a thau, a thinbom le a kal pa nih a tuamtu a thau cu la unna, biaklandawh humah Keimah na biaknak uhah haal un hi.

¹⁴ Mahnaven a taksa, a vun le a sungngil hempoh cu buk pualamah haal khawng un hi. Hihi cu thiampi a sual haw thianthoh biakpiaknak tukin piakmi hi.

¹⁵ “Tuucang pa khat la unna, Aaron le a capa ten a lu humah a khut haw suang haw hen hi.

¹⁶ Ngo unna, a thisan suahin, biaklandawh kimsuakin lei un hi.

¹⁷ Tuucang sa cu atcen unna, a kete som ciang un hi. Mahceng ten a lu le a cik dang tei humah koih un hi.

¹⁸ Biaklandawh humah tuucang cik hempoh cu Keimah biaknakin, haal un hi. Hihi cu Topa i ca in halkang biakpiaknak hi, mei tuah biakpiaknak hi a Topa i lak pen a namtui mi hi.

¹⁹ “Tuucang dang pa khat la unna, Aaron le a capa ten a lu humah a khutnga haw hen hi.

²⁰ Ngo unna, a thisan khenkhat la in, Aaron le a capa tei taklam beng humah, a taklam khutpi humah le a taklam kepi humah maat un hi. A tanglaih mi thisan cu biaklandawh kimsuakah leih khawng un hi.

²¹ Biaklandawh hum a, thisan cu la unna, noihmi sathau tuah na cawhhel nung uhten Aaron le a capa tei puan humah theh un hi. Aaron, a capate le a puan cu a thianglimmi in suak tuk hi.

²² “Tuucang i thau, a mei thau, a sungngil tuamtu thau, a thinbom, a kal pa nih hum a thau le a taklam kawng la un hi, itahim titale hi tuucang cu thiampi dek tukin khut suannak a maanmi hi.

²³ Topa i mai a koihmi cangho kho sung pen naman tel ngawl cangho pa khat, situi tuah bawlmi cangho cuun khat le cangho pheng khat la un hi.

²⁴ Hi cangho cu Aaron le a capa tei khut sungah koih unna, humlamah dangto in Topa i lakah pia haw tuk hi.

²⁵ Mah nungten a khut hum a cangho cu la unna, biaklandawh hum a, halkang biakpiaknak humah koihin, Topa i ca in namtui tukin haal un hi. Hihi cu Topa i lakah mei tuah biakpiaknak hi.

²⁶ “Tuucang awm, Aaron i pumpiaknak cu la unna, Topa i lakah zakto in, biaknakin mang un hi. Hi tuucang cik cu nangmu co hi tuk hi.

²⁷ “Aaron le a capa tei pumpiaknak a manmi tuucang cik sung pen a awm cu khut tuah zaakto in, biaknakin mang unna, a kawng cu thiampi teita tuk hi.

²⁸ A khelleh awng ngawlmi ka thupiakmi bangin, hi cik cu Aaron le a capa teita tukin Israel tei piakmi hi tuk hi. Israel tei pawlkom biaknak cik sung pen hi cik a awm le a kawng cu thiampi teita tukin a dangno in koihmi cik hi. Topa i lakah a laksawng haw hi.

²⁹ “Aaron i capate thiampi a hih theih hawnak tukin Aaron a thih ten a puan thiangtho cu a capa tei lakah pia khawng unna, khutsuannak a ngah haw ten mah puan cu silh haw tuk hi.

³⁰ Aaron i thiampi nadeh a dawntu a capa cu mun thiangthoah thiampi nadek tukin tawhdun khawmnak buk sungah a tum ten, mah puan cu ni salih sung silh tuk hi.

³¹ “Pumpiaknak tukin manmi tuucang cu la unna, mun thiangthoah a cik cu huan un hi.

³² Keima umnak Puanbuk tumnak kongka ah Aaron le a capa ten tuucang cik le kho sung a, cangho cu ei haw tuk hi.

³³ A pumpiaknak haw le sathau thih laihin, a lak haw, a ngaihdamnak a hengtiktu cu amuh ten ei haw tuk hi. Hi an cu a thiangmi a hih hangin thiampi bekin ei haw tuk hi.

³⁴ Cik hihen, cangho hihen, zinglam tian a tangmi a um tale halkang khawng hi tuk hi. Eileh tuk hi ma toh hi. Itahim titale a thiangtho a hih hangin hi.

³⁵ “Aaron le a capa tei ca in ka thupiakmi bang cikcekin bawl un hi. A pumpiaknak haw cu ni salih sung bawl un hi.

³⁶ Nisialin sual thianthoh biakpiaknakin khuicang ngo unna, sual ngaihdamnak um tuk hi. Sual ngaihdamnak tukin khuicang na ngawh uh hangin biaklandawh pen sualnak cu pai tuk hi. Biaklandawh cu sathau noih unna, Pathian nelah pia un hi.

³⁷ Ni salih sung biaklandawh ca in sual thianthoh biaklandawh cu thiangthozet tuk a, thil zehsahin suak tuk hi; mah hangin biaklandawh a zentu hempoh cu a zehsahmi in suak bok haw tuk hi.

Nisial Biakpiaknak

³⁸ “Biaklandawh hum a, biakpiaknak na bawl tuk uhmi cu hite tuk hi. Nisial, catngawlin kum khat a kimmi tuuno pa nih ngo leleng un hi.

³⁹ Zinglamin tuuno pa khat ngo unna, taklamin, a dang tuuno pa khat ngo un hi.

⁴⁰ Situi phazet khuat thum helmi sangvut phazet cuai li tuah amasa a, tuuno na ngawh uhmi cu biakpiaknakin bawl un hi. Inmi biakpiaknak tukin Sabittui khuat thum vang hel un hi.

⁴¹ Tuuno a pa nihnak cu taklam ten, zinglam a na bawl uh bang lengin eihmi biakpiaknak le inmi biakpiaknak tuah na pia cih un hi. Topa i ca in mei tuah halin biakpiaknak namtui hi tuk hi.

⁴² Hi halkang biakpiaknak cu Topa keima maiah keima umnak Puanbuk sung tumnak kongka ah khang khat nung khang khat catngawlin, na bawl leleng un hi. Mahlaiah ka mihingte tawk tung a, na lak uhah thuhilh tung hi.

⁴³ Mahlaiah Israel mite cu tawk tung a, keima sunloihnak khuavak tuah mah mun cu mun thiangtho in suak tuk hi.

⁴⁴ Puanbuk le biaklandawh cu thiangthotik tung hi; Aaron le a capate cu keima thiampi nadehnak tukin a dangno in koih tung a, thiangthotik tung hi.

⁴⁵ Israel tei lakah um tung a, Pathian haw hi tung hi.

⁴⁶ Keimah cu amu lakah ka um theihnak tukin Izipt ngam pen a suahtultu, a Topa Pathian ka hihlam thei haw tuk hi. Keimah cu Topa a Pathian haw ing.