SUAHTULNAK 20 - Ngawm Bible

Thukham Sawm

¹ Pathian in, a lak hawah hi bangin hilh hi;

² “Keimah cu sal na tannak uh Izipt ngam pen a suahtultu Topa na Pathian uh ing.

³ “Keimah sial ngawl pathian dang bia pahsuh un.

⁴ “Vancungah hihen, leihumah hihen, leinuai tuisungah hihen a ummi tei mellim cuangin, na ca uhin, milim bawl pahsuh un hi.

⁵ Milim bia pahsuh un; a maiah na lu uh hei kun pahsuh un, itahim titale keimah cu Topa na Pathian uh ing hi a, micing thei Pathian ing. Keimah a haw tu tei humah a sualnak haw hangin dantat tung a, a casuan tei khan, khang thum khang li tian dantatnak hengtik tung hi.

⁶ Mahnaven keimah a deihtu le ka thukham a zuitu i humah ka ihnak cu khang thawng tampi tianin lak tung.

⁷ Topa na Pathian uh i min cu a thawthongin sal pahsuh un; itahim titale Topa Keimah in ka min mahti bangin a mangsualtu cu dantat tung hi.

⁸ “Sabbath ni thiangno in cang un.

⁹ Ni luk sungin na hempoh dek un,

¹⁰ ni salih ni cu Sabbath ni a hih hangin Topa na Pathian uhta hi. Mah ni-in nadek pahsuh un hi, nangmuh hihen, na cano uh hihen, na sal, na ngan le na khuasung a, um miphun dangte vang hihen nadek pahsuh un hi.

¹¹ Ni luk sung Topa in van le leipi, tuipi le a sungum hempoh bawlin a ni salih ni-in cawl hi. Mah hangin Topa in Sabbath cu muicu pia a, ama ca in thiangtik hi.

¹² “Na nu le na pa upat un; mahten Topa na Pathian uh i ka piakmi ngamah in khansau in nung tuk uh ci.

¹³ “Mi that pahsuh un.

¹⁴ “Nupa sualnak bawl pahsuh un.

¹⁵ “Nguca pahsuh un.

¹⁶ “Na innnel tei humah theihpihtu man ngawl hi pahsuh un.

¹⁷ “Mi thil hawza pahsuh un. Mi inn hihen, mi zi le pasal hihen, a khui, a cipuh le midang tei neihmi hempoh hawza pahsuh un hi,” tin ti hi.

Israel Mite Lau Haw

¹⁸ Israel miten vanthum le tuucangki tummi thawm za haw in, khuaphelep zawzok le meikhu tul lualuangmi mual amuh haw ten, lau leita in can tawtok haw a, khawlapi ah ding haw hi.

¹⁹ Moses lakah, “Nangmah in keimu lakah awn inna, ngai tuk ung hi; Pathian keimu lakah a awn ahi tale thi ngangai tuk ung hi,” tin ti haw hi.

²⁰ Moses in, a lak hawah, “Lau pahsuh un! Itahim titale Pathian cu amah kihca in, na sual ngawlnak tuk uhin, nangmuh sualloih tuk bekin hung hi, tin ti hi.

²¹ Pathian umnak meikhu lamah Moses a hawh ten Israel mite cu lam khawlapiah ding haw hi.”

Biaklandawh Ca Daante

²² Topa in, Moses lakah Israel tei lakah hi bangin na hilhin hi, “Van pen nangmuh ka otpihnak mu zo toh uh ci.

²³ Noh ten keimah tuah na biak kop tuk uhin sui le ngun pathian bawl pahsuh un.

²⁴ Lei tuah bawlmi biaklandawh ka ca in bawl unna, a humah halkang biakpiaknak le pawlkom biakpiaknakin, na tuu le na khui tuah bawl un hi. Keimah bia tukin ka hilhnak mun tihkimah nangmu lakah hung tung a, muicu pia tung hi.

²⁵ Ka ca in suang biaklandawh na bawl uhten cikut mangin khen pahsuh un hi, itahim titale nawngkaitik sual kawn uh ci.

²⁶ Ka biaklandawh na sak uhten a hum kainak tuk tin kailawn thuah sa pahsuh un; na bawl uh tale na kai uhten na zahmawh uh langtik sual tuk uh ci, tin, hilhin hi,” ti hi.