SUAHTULNAK 2 - Ngawm Bible

Moses Suahnak

¹ Mah hun laih takin Levi mi pa khatin, a phunpih numei pa khat huai hi.

² A zi cu naupai in capa hing a, deih awhzet tih cu a nu in amuh ten ha thum sung sel hi.

³ Mahnaven a sel theih ngawl toh hangin phaikung tuah bawm pa khat phansakin, mah bawm sungah tui tum thei tuk ngawlin cingnai le khuai-ngap maat hi. A sungah nauno cu sialin ngunmawk hampa sauzet umnakah koih hi.

⁴ A u nu in khawla thim pen iti um tuk hum tih thei nuamin cuan hi.

⁵ Kumpipa i canu cu mah ngunah tuibual tukin hungsuk a, a umlawh numeite cu ngunmawkah vak li haw hi. Phawhkhak ngawlin hampa sauzet sungah bawm cu amuh ten la tukin a umlawhnu hah hi.

⁶ Kumpipa i canu in bawm cu a hon ten nau pano cu mu hi. Nauno cu kap li in, hehpihzet hi. “Hebru tei nauno si!” ti hi.

⁷ A u nu in, “Hebru numei pa khat nauno a cingkhawi saktu tuk hawhin samsak nang maw?” tin dong hi.

⁸ Kumpipa i canu in, “Samsakin hi,” ti hi. Mah nu cu hawhin, nauno i nu loli sam hi.

⁹ Kumpipa i canu in, “Hi nauno hi cingkhawi sak inna, na thaman cu pia tung,” ti hi. Mah hangin nauno cu nu in la in, komno cingkhawi hi.

¹⁰ Nauno cu a upat deuh ten nupi nu in, Kumpipa i canu lakah hawhpihin, kumpi canu in ama capa in bawl hi. “Tui sung pen ka suahmi hi,” ti in, a min Moses sa hi.

Midian Ah Moses Tai

¹¹ Moses cu khangto dedeuhin, ni khat cu a miphun tei lakah a len ten, a miphun cu Izipt miten nadeh haksa a dehtik haw cu mu hi. Mah hum pen Izipt pa in, a miphun pih Hebru mi pa khat a thah na mu hi.

¹² Moses in, a piam le pam zo in, kuamah amuh ngawl ten, Izipt pa cu thatin, a luang cu philnel sungah sel hi.

¹³ A zingten a phunpih tei lakah hawh lehin, Hebru mi pa nih a sualdun lih haw cu mu hi. A sual saw deuh pa i lakah, “Ita na phunpih cu vat cim,” ti hi.

¹⁴ Mahpa in, “Akua in kaw ka hum uhah uktu le thukhentu tukin nang a bawl? Izipt pa na thah bangin keimah thah tum bok cim?” ti hi. Moses cu a thinsu in, “Mipi in ka bawlmi hi thei zo haw na hi si!” tin ti hi.

¹⁵ Mah thu cu kumpipa in, a zak ten Moses cu thah tum hi. Mahnaven Moses cu tai in, Midian ngamah tai hi. Ni khat cu tuikhuk pa khat elah Moses cu cawl hi.

¹⁶ Midian ngam a, thiampi Jethro i canu salih cu tuikhukah, a pa i tuu le keel piak tuk tuicawi in, ngan tei tui innak tuk kuang sungah pam li haw hi.

¹⁷ Mahnaven tuucing dang ten Jethro i canute cu hawlvawk haw hi. Moses in, numei cu panin, a ngan haw tui piak sak hi.

¹⁸ A pa haw lakah a kihleh haw ten a pa haw in, “Ita tuni peng khawmano in pin si uh ci?” tin dong hi.

¹⁹ “Izipt pa in tuucing tei lak pen a pat hang hi,” tin ti haw hi. “Tui cawisakin, ka ngan uhte piak sak hi,” tin ti haw hi.

²⁰ “Mahpa cu atu ilai ah kaw?” tin a canute dong hi. “Ita mahpa cu zam uh cim? Hawh unna, eimuh tuah an ei tukin sawmta un,” tin, a canute samlehtik hi.

²¹ Moses cu mahlai ngamah um tuk a lungkim hangin, Jethro in, a canu Zipporah tuah huaiduntik hi.

²² Zipporah in capa nei in, “Ngamdangah mikhual ing hi,” ti in, a min Gershom sa hi.

²³ Kum a ngeithim ten Izipt kumpi cu thi hi. Mahnaven Israel mite cu sal a thuaknak haw hangin bawmtu tuk samin, tau in, au kio li haw laih hi. A taunak haw aw cu Pathian nelah hengin,

²⁴ a tau le kio lihnak aw cu Pathian in zain, Abraham, Isaak le Jakob tuah a thutepmi cing leng hi.

²⁵ Israel tei sal a thuaknak haw cu Pathian in mu in, a hum hawah hehpihnak nei hi.