SUAHTULNAK 17 - Ngawm Bible

Suangpi Pen Tui Tul

¹ Israel mite a venghawng haw in, Sin phillawn pen tulin, Topa i thupiak bangin mun khat pen munkhatah thawn pepel haw hi. Vei khat cu Redifim ah ngiak haw a, mahlai munah intuk tui umma hi.

² Israel miten “Tui intuk pia in,” tin Moses cu hauhpih haw hi. Moses in, “Itakaw kei na hauhpih uh? Ita Topa cu khingkhai kam uh ci?” tin ti hi.

³ Mahnaven mipi a dangdum leita haw hangin Moses hauhpih leng haw hi. “Ita Izipt ngam pen tulpih li cim? Keimuh le ka casuante, ka ngan uh tianin dangdumin thihtik khawng tuk na deih hangin maw i kaw?” tin ti haw hi.

⁴ Moses in Topa i lakah thungenin, “Itin kaw ka bawl tuk? Keimah lehlam suang tuah seh hup tuk mansa haw si,” ti hi.

⁵ Topa in Moses lakah, “Israel mi puitu lak pen a khenkhat pui inna, mipi maiah hawh ham un. Nail ngun na vahnak na thiangkhut cawi thahin hawh un hi.

⁶ Na mai a, Sinai Mual suangpi humah ding tung hi. Suangpi cu vat inna, mipi tei intuk tui tul tuk hi,” ti hi. Topa i tihnak bangin Israel mi puitu tei maiah Moses in bawl hi.

⁷ Mah mun cu, “Sualsohnak le phuknak, tin sam haw hi; itahim titale Israel mite cu haudun haw a, Topa cu khingkhai in, Topa hi a lak uhah um maw umma heng?” tin, a tihnak haw mun hi.

Amalek Mite Do Haw

⁸ Israel mite cu Refidimah Amalek ten do haw hi.

⁹ Moses in Joshua lakah, “Eimu lak pen mi khenkhat teng inna, zingten Amalek do tukin hawh un hi. Kei cu Pathian i piakmi thiangkhut lenthahin, mual humah ding tung,” ti hi.

¹⁰ Moses i thupiaknak bangin Joshua in bawl a, Amalek do tukin hawhin; Moses, Aaron le Hur cu muallekah kaito haw hi.

¹¹ Moses in, a baan a dan toh sung hempoh cu Israel miten ngal neh pepel haw naven a baan a khiaksuk ten Amalek ten neh haw hi.

¹² Moses cu cawlzet toh hangin, a baan zawng tak cu, Aaron le Hur in suang la in, a nuaiah koih haw, mah humah Moses cu khung a, amu pa nih cu a sik le sikah ding haw a, a baan lenin, domtoh sak haw hi. Taklam nitum tian a baan cu letsak leng haw hi.

¹³ Mahti bangin Joshua in Amalek neh khawng hi.

¹⁴ Topa in Moses lakah, “Cin leleng tukin, hih ngalnehnak thu hi laibu sungah nganin; mahten Joshua vang hilh inna, Amalek mite cu pailal khawng tukin bawl tung,” ti hi.

¹⁵ Moses in biaklan dawhin, “Topa cu ka nehnak limlaktu,” tin minsa hi.

¹⁶ Moses in, “Topa i nehnak cu dangto un. Itahim titale Topa in, Amalek mite cu catngawlin do leleng tuk,” ti hi.