SUAHTULNAK 10 - Ngawm Bible

Khaau

¹ Topa in Moses lakah, “Kumpi lakah hawh inna tawkin hi. Hiti bang nalamdang ka bawl theihnak tukin amah le a khutnuai bawi tei lungmu cu khohtik zo ing.

² Amu lakah hiti bang nalamdang bawlin, Izipt mite cekpan bawlnakin ka man hi, na tu le ca tei lakah na hilh tukmi hi. Topa ka hihlam na venghawng uhin theileh tuk uh ci,” ti hi.

³ Mah hangin Moses le Aaron cu Kumpi lakah hawh haw in, a lakah, “Hebru mitei Pathian, Topa i a hilhmi cu; ‘ka maiah niamkhiat nuam ngawlin ituk tian kaw na um tuk? Keimah a biak theihnak haw tukin ka mihingte cu hawh haw hen.

⁴ Ka mihingte hah tuk na el leleng ahi tale zingten na ngam sungah khaau hah tung hi.

⁵ Kuamah in Lei neuno hei mu thei ngawl tianin dim haw tuk hi. Nial i siatsuah ngawlmi hempoh ei haw tuk a, na ngamsung a, thingkung hempoh ei khawng haw tuk hi.

⁶ Na kumpi inn, na khutnuai bawi tei inn le na mihing hempoh tei inn vang dim khawng haw tuk hi. Na pu le pa, na cikhaihtu tei hi ngamah a hen sem haw laih pepanin, amuh awng haw ngawlmi thilpha ngawl hi tuk hi,’ tin,” ti hi. Moses cu hek kiklehin kumpi lak pen tul hi.

⁷ Kumpipa i khutnuai bawi ten, “Ituk tian kaw hi pa in ohte cimnak a piak tuk? Topa a Pathian, a biak theihnak tukin panote cu hawh haw poh hen. Itahim titale Izipt ngam sia zo tih hi mu ma cim?” tin kumpi cu ti haw hi.

⁸ Mah hangin Moses le Aaron cu samkik haw a, kumpi in, a lak hawah, “Hawhta unna, Topa na Pathian uh bia pah ni uh ci! Mahnaven akua zong hawh tuk nge uh cim?” ti hi.

⁹ Moses in, “Ka venghawng uhin hawh tuk ung, ka casuante, ka pitek le putek tel haw tuk hi. Ka capa le canu, tuu, keel le khui tuah hawh tuk ung, itahim titale Topa biakpiaknak puai bawl tuk ung,” ti hi.

¹⁰ Kumpipa in, “Topa in bawm henna, na canau le na numei cu hawhtik pahsuh un. Ka hum uhah haksatnak suaktik tukin suam li uh ci tih cu ciang hi.

¹¹ Hawh viang haw tukma! Pano bebek hawh unna, Topa cu bia un hi. Na nget uhmi cu mahmi si,” ti hi. Mahnung ten Moses le Aaron cu kumpi lak pen hawlvawk haw hi.

¹² Topa in Moses lakah, “Izipt ngam sungah khaau a hennak tukin na baanphalhin hi. Thingkung, hamkung a nungmi hempoh le nial i siatsuah ngawlmi hempoh cu ei khawng haw tuk hi,” ti hi.

¹³ Mah hangin Moses cu a thiangkhut tungto hi, Topa in nisuahnak lam pen huih theutikin sun nilui le zan khua theu hi. Zinglamah huihin khaau cu theu cih hi.

¹⁴ Izipt ngam khua tihkimah hengin, a ngam buppiah dim hi. Hitih bang a tam zetmi khaau mu awng haw ma hi. Mailam heiah muleh haw tukma toh hi.

¹⁵ Lei lang ngawlvo in, a khuh khawng hangin lei cu hang menmun hi. Nial i siatsuah ngawlmi thingkung, hamkung le thingngah hempoh ei khawng haw hi. Izipt ngamsung hempoh ah thingkung le hamkung humah cehhing pa khat hei tang lehma toh hi.

¹⁶ Mahten kumpi in Moses le Aaron manlangzet samin “Topa na Pathian uh mai le nangmu maiah sual zo ing.

¹⁷ Atu vei khat cu ka sualnak ngaidam unna, ka tawh uhmi bawlsiatnak hi ka lak pen la kikleh tukin Topa na Pathian uh i lakah kut sak zal un” tin ti hi.

¹⁸ Moses cu kumpi lak pen tulin Topa i lakah thungen hi.

¹⁹ Mahceng ten Topa in nisuahnak lam huih cu nitumnak lam huih ngilzet tuah thek a, khaau cu Izipt ngam buppiah pa khat hei tang ngawltohin, Tuipi San sungah mutvawk khawng hi.

²⁰ Mahnaven Topa in kumpi i lungmu cu khohtik lengin, Israel mite cu hawhtik nuamcuang ma hi.

Thimzing Tung

²¹ Topa in Moses lakah, “A sahzet mi thimzingin Izipt ngamsung khuh khawng tuk a, na baan cu vanah zaakin hi,” ti hi.

²² Moses in, a baan cu vanah zakin, Izipt ngam cu thimzing sah zetin ni thum sung khuh khawng hi.

²³ Izipt cu pa khat le pa khat mudun thei ngawlin ni thum sung kuamah pualeu lamah tul thei haw ma hi. Mahnaven Israel tei umnak ngamah khuavak leleng hi.

²⁴ Kumpipa in Moses cu samin, “Topa bia tukin hawh unna, numei le na naupangte vang na lak uhah hawh haw hen hi. Mahnaven na tuu, keel le na khui cu zam un hi,” ti hi.

²⁵ Moses in, “Topa ka Pathian uh lakah, halkang biakpiaknak le biakpiaknak dang man tuk ngan cu nangmah in, na ngaihsutsak kul tuk hi.

²⁶ Mahma tale, a hawh haw khawng kul hi; pa khatno hei zam tukma ung hi. Topa ka Pathian biaknak a, ka man tuk uhmi ngan cu teng tuk ung a, mah mun ka hen laih ngawl uhin keimuh hei in, Topa ka biaknak tukin, i mang tuk ung kaw tih thei bokma laih ung hi,” ti hi.

²⁷ Topa in kumpi lungmu a khohtik laih hangin Israel mite hawhtik nuam ma hi.

²⁸ Moses lakah, “Ka lak pen tai un! Ka muh tuk hei in kik toh pahsuh un. Ka muhleh ni cu na thih ni hi tuk hi,” ti hi.

²⁹ Moses in, “Na tih bangin hihen, ituk hei ten ka mai muleh tukma toh ci,” ti hi.