SOLOMON LA 7 - Ngawm Bible

Pano:

¹ Bawimang canu mawi cuang, zaang bawl kedamno na but; Na ke tuah khawthuzet si, kut thiamte i bawl mawino suang.

² Na pawng ngono ung cu maw, sabit hum koihnak kuang kualno bang. Na pawngta sangvut ummi; Lily pak coih kuangno bang,

³ Na mawino pa nihte cu zuksano phil mawino bang.

⁴ Na ngawngno ung cu maw, saiho tausangno bang, Na mitno ung cu maw; Heshbon khua elno a, tuinimno bangkek vei, na naalno ung cu maw, Lebanon tausangno bangkek hi.

⁵ Na lu ta cu Karmel mual bang, na saisam sawm mawi tale, Sandup de linglengno bang; bawimang pa i lenlung tianin; Lenleng thong thei si mei!

⁶ Thuang mawibel le mel mawibel, vangkim lungkuaibel sisi.

⁷ Na thuang mawi dan cu maw, ngam lak um tumkungno bang; na awm a, nawite cu tum ngah bawk bang kek vei.

⁸ Tuumkungah kai in, a ngah thawi tuk veng, Na nawi bawknote cu maw, tum ngah bawk bang kek si. Na haihawh ung cu maw, apple ngah bangkek hi.

⁹ Thutdunnak ung cu maw, sabitzu bangin uk. Luang zihziah li poh henna, a ha bul le muk tian.

Numei:

¹⁰ Kei cu nata hi veng, na thin sungah cam veng.

¹¹ Ngaihno aw, ngamlakah vak ngel pah nung, Mahlai Sabit dumah in, cam ngelta hih pah nung.

¹² Zingtungno in thatho ngelin, dum sung vak ngel pah nung; Thing paakte palh maw tih le Tale pak toh maw tin, Mahlai a huan sungno pen, deihnakno hilh tung.

¹³ Zaawl-ai kung namtuino nam, kongka elah maw, Eih theih namkimin um. Nopnak lun le nopnak thak, Nang ca in koih sak veng.