SOLOMON LA 5 - Ngawm BiblePano: 1 Cang tepsa ka ngaihno aw, ka dum sungah hawh zo veng! Mura le namtui khawm ing; khuaiphang le a hum ei ing, Sabit le khuinawi in ing. Ei un, in un, thin thino in, khanpihno camlualte aw. Numeite: La Cing Linak 2 Lemcang mang ka zau hei in, kongka kiu maw ngaihno in tin um lemnak nei ma veng. Tum pah nang na elno ah, ka lokhu le thin nemtu, Ka lu daita in kawt khawng, ka sam suum zunin kawt khawng. Pano: Numei: 3 Ka silh puan duk khawng zo veng, silhleh thong tung maw ikaw? Ka ke le somsa ven, nin lehtik tuk hi tung maw? 4 Kong kalhnak, len ngaihno, um thiam ma veng. 5 A sung luhtum tuk hun cuan ing, ka khutte mura noihin, Tumnak kong hon tukin a kongbiang le, kong kalhnak len pah ing. 6 Ngaihno kong hon pah ing, amah umleh toh si ngawl; Thuak zo mang khendun ten? Sam hei ten donleh toh si ngawl. Zei li naveng mu ma thong veng. 7 Khua kulh cing ten kei mu in, a vahnak haw liam veng, Ka silh puan vang longin hi. 8 Jerusalem zozaamte aw, ngaihno na mu uh tale, Zun ngaih dol bangin zuan ing tin, ngai na hilhsak u maw. Numeite: 9 Zozaam lak pen mawicuangbel, na tup sangbel valpa cu tih lawlawm kam thiam? Numei: 10 Ka ngaihno mawi san silsel, mi thawng sawm sung pen mawi cuang. 11 A lu ta cu sui bangin thiang, a saisam hang le kil cu. kil sipsep lawiva zun bang. 12 A maimit ung cu maw ciktui el lokhuno bang. Nawitui tuah som ciangmi, cik mawk ding lokhuno. 13 A biangta pak le namtui, dum sung bangkek vei. A muk cu lily pak bang, mura zimui in kawt. 14 A kut mawi sawi tuk um ngawl, Suang manpha zungbut bun; Suangsan mangpha belh, saihono bang kek vei, a thuang mom zilzel vei. 15 Sui kuang sung a, suang ngo koih bangin a cawnval pempum vei. A thuangcawm ung cu maw, Lebanon mualhum a um Sidar thing bang kek vei. 16 A awn hum zuzungno cu, zaknop cuang hi ti ing. Jerusalem zozaamte aw, ka ngaihno deih awh cuang vei. |
Ngawm Bible © Bible Society of Myanmar, 2014.
Bible Society of Myanmar