SOLOMON LA 2 - Ngawm Bible

Numei

¹ Ka thuang cawm ung cu maw, Ngam lak Sharon pakno le lawnlai lily pak bang poh veng.

Pano

² Zozaam lak pen lung ka tup, lingcam lily pakno bang.

Numei

³ Lung ka tup, ka valpa cu val dang cam lak sung pen, tuthing apple bang cuangcung, a lim nuai ah khungleng, kei ca a ngah hum cuang.

⁴ A puai khanah kei pui deihnak ka humah puanzak.

⁵ Na zun dol bangin zuan veng, lemleh vele na ngaihno, apple sabit humno in;

⁶ Na veilam khut san inna, taklam khut tuah kawi in hi.

Tangval

⁷ Jerusalem zozaamte aw, ngam lun zuksa le thaksa, salin, thutiam un, ka ngaihno khang aw maw tin phot tuk phal mang.

La Cing Nihnak Numei

⁸ Ka ngaihno awn nging za veng, tai leleuh li mualhum pen, mualte kanin ngaihno, ka nel zuan li pah ei.

⁹ Ka lungtup leelsano bang, mom thiutheu zuksano thuang; Pangbulno ah dingin, maimitno in suan, Suat awng pen dong sung cuan,

¹⁰ Ka nelah ti ngaihno in, hung poh vele, ngaihno tin, zei awno in ti a le.

Tangval

¹¹ Phalbi heng zo, van nial nguah vang bo zo.

¹² Ham lak pak vang pak zo. Lasaknak hun heng zo; lokhu khuan nging thang zo.

¹³ Thei ngahte vang min zo, huihhiono lakah nam vilvel, sabit pak namtuino nam bingbeng. Tho inna, hungin, ka nelah, tin ti e, ka ngaihbelno in hi.

¹⁴ Daidenno in lum sung suang kua, ka lokhu deih awhno. Na mitmai cuan leng nuam veng, za leng nuam ing, na zei aw.

¹⁵ Cingnete vang man unna, a note vang man un; Huan sung sabit paknote, a siattik laih ngawlin hi.

Numei

¹⁶ Kei deihtu ca poh veng, amah hei kata vei. Lily pak lakah, a tuute khal pah ei.

¹⁷ Zingtungno in, huihhiono theu, zinglam khuavak ciang ten, cubel kikleh toh inna, Bethel mualhum thaksa le zuk bangkekin hi.